“Yangi Piskent” – tumanni zamonaviy qiyofaga keltirish bo‘yicha yirik loyihalar taqdim etildi
2026-02-12 12:40:00 / Yangiliklar
Piskent tumanini kompleks rivojlantirish, aholi uchun zamonaviy va qulay infratuzilma yirik loyihalar viloyat rahbariga taqdimot etildi.
Taqdimot davomida tuman markazini obodonlashtirish va yangi qiyofa kasb ettirishga qaratilgan “Yangi Piskent” majmuasi loyihasi alohida e’tibor markazida bo‘ldi.
Mazkur loyiha 11 gektar hududda amalga oshirilib, 19 ta 9 qavatdan iborat ko‘p qavatli uy, 87 ta savdo va xizmat ko‘rsatish ob’yektlari, favvoralar, sun’iy ko‘l va sayilgoh, 800 o‘rinli amfiteatr, bolalar maydonchasi va zamonaviy dam olish maskanlarini barpo etish, mavjudlarini rekonstruksiya qilish rejalashtirilgan.
Loyiha amalga oshirilishi natijasida 4 743 nafar uy-joyga ehtiyojmand aholi uchun yangi imkoniyatlar yaratiladi, 2,5 mingdan ziyod aholi yangi xonadon bilan ta’minlanadi.
Shuningdek, Mo‘minobod MFY hududida joylashgan “Yoshlar” istirohat bog‘i qaytadan rekonstruksiya qilinib, u yerda zamonaviy attraksionlar, bolalar maydonchalari, yashil hudud va sayr yo‘laklari quriladi.
Birlik MFY markaziy ko‘chasida tashkil etiladigan 24/7 ko‘ngilochar va sayyohlik ko‘chasi tuman markazini jozibador hududga aylantirish, xizmat ko‘rsatish sohasini rivojlantirish va yangi ish o‘rinlari yaratishga xizmat qiladi.
Taqdimotda shuningdek, markaziy shifoxona va mahallalarda ko‘p qavatli uylarning oqova suv tarmog‘ini yangilash, 2 700 nafar aholini ilk bor toza ichimlik suvi bilan ta’minlash, 134,3 gektar tomorqa yer maydonlarini oqova suv bilan ta’minlash, 12 km 10V–105 avtomobil yo‘lini mukammal ta’mirlash, Murotali MFYda 22,8 km ichimlik suvi tarmog‘ini tortish kabi muhim tashabbuslar ham muhokama qilindi.
“Yangi Piskent” sanoat zonasi va “Piskent Texnopark” loyihasi kabi investisiya va sanoat loyihalari ham taqdim qilindi.
Taqdimot yakunida viloyat hokimi loyihalarni bosqichma-bosqich va aniq moliyaviy manbalar asosida amalga oshirish, qurilish ishlarida sifat va muddatga alohida e’tibor qaratish bo‘yicha mas’ullarga topshiriqlar berdi.
Qayd etilganidek, mazkur loyihalar amalga oshirilishi natijasida Piskent tumani yangi qiyofa kasb etib, aholi uchun zamonaviy, qulay va jozibador hududga aylanadi.