Bolaning begonasi bo‘lmaydi
2026-02-10 17:30:00 / Yangiliklar
Inson qalbining eng qimmat neʼmatlaridan biri – mehr. Ayniqsa, bu mehrni mehrga muhtoj bolalarga bag‘ishlash uning qadri yana-da oshadi va qalblarda iliqlik uyg‘otadi.
Nurafshon shahrining Muqimiy mahallasida yashovchi Raʼno Bozorova o‘z 2 farzandi yoniga yana 5 nafar mehrga muhtoj bolani qabul qilib, oilaviy mehr-muruvvat va fidoyilik namunasini ko‘rsatmoqda.
– Vazirlar Mahkamasining 2024-yil 27- dekabrdagi 893-son qarori bizga katta turtki bo‘ldi. Har bir bola baxtli bo‘lishga loyiq. Biz ularning hayotida shu baxtni yaratishga harakat qilamiz, – deydi
R. Bozorova.
Bolalar orasida Bohodir tadbirkor bo‘lishni orzu qiladi, Ilya shifokor bo‘lishga intiladi, Artur futbolga qiziqadi, Diana pazandachilikka, Muhammad esa kelajakda ichki ishlar xodimi bo‘lishni xohlaydi.
Har bir bola o‘z orzulariga intiladi va oilaning iliq muhiti bunga katta yordam beradi.
Oilada kitobxonlik alohida qadrlanadi. Kun kitob mutolaasi bilan boshlanadi. Kitob bilan boshlanadigan tong, mehr bilan to‘ldiriladigan uy, har bir bolaning ruhiy va intellektual rivojlanishi uchun mustahkam poydevor yaratadi.
Bunday oilalar bor ekan, jamiyatda mehr so‘nmaydi, saxovat yo‘qolmaydi va har bir bola o‘z orzusiga yetish uchun imkoniyatga ega bo‘ladi.