Toshkent vilоyati hоkimligi

Zangiota tumanida viloyat hokimi Zoyir Mirzayev raisligida xavfsiz muhitni shakllantirish hamda jamoat xavfsizligini samarali ta’minlash masalalariga bag‘ishlangan kengaytirilgan yig‘ilish bo‘lib o‘tdi. Yig‘ilishda O‘zbekiston Respublikasi Prezidenti tomonidan Toshkent shahrida xavfsiz muhitni shakllantirish bo‘yicha o‘tkazilgan tanqidiy selektor yig‘ilishida belgilangan vazifalar, xususan, uyushgan jinoyatchilik, narkojinoyatlar, kiberjinoyatchilik va yashirin iqtisodiyotga qarshi kurashish bo‘yicha “poytaxt namunasi”ni poytaxtga tutash hududlar, jumladan, Zangiota tumanida joriy etish masalalari muhokama qilindi. Ta’kidlanganidek, so‘nggi yillarda tuman aholisi soni va transport qatnovi keskin ortgani, ijtimoiy infratuzilmaning kengayishi xavfsizlikni ta’minlash borasida mutlaqo yangi yondashuvlarni talab etmoqda. Shu bois, kriminogen vaziyatga ta’sir etuvchi omillarni barvaqt aniqlash va oldini olishga qaratilgan tizimli ishlar tashkil etish ustuvor vazifa etib belgilandi. Yig‘ilishda 2025-yil davomida tumanda jinoyatchilik holati, jumladan, “qizil”, “sariq” va “yashil” toifaga kiritilgan mahallalar kesimida tahlil qilindi. Ayrim mahallalarda oldini olish mumkin bo‘lgan jinoyatlar, yoshlar, voyaga yetmaganlar, ishsizlar hamda muqaddam sudlangan shaxslar ishtirokidagi huquqbuzarliklar salmog‘i yuqoriligicha qolayotgani tanqidiy qayd etildi. Shuningdek, giyohvandlik va psixotrop moddalar bilan bog‘liq jinoyatlar, internet orqali sodir etilayotgan kiberjinoyatlar, ijtimoiy profilaktika ishlaridagi kamchiliklar, aholini bandlik bilan ta’minlash, migratsiyadagi fuqarolar va voyaga yetmaganlar bilan ishlashdagi muammolar atroflicha muhokama qilindi. Viloyatda aniqlangan narkojinoyatning 116 tasi Zangiota tumaniga to‘g‘ri keladi. Aniqlangan holatlar davomida 25 kg giyohvandlik vositalari hisobga olingan. Zangiota tumani yoshlari orasida ushbu moddalarga talab ortib borayotganligi kishini havotirga soladi. Shu bois, viloyat hokimi tomonidan mas’ul idoralar rahbarlari, mahalla yettiligi, profilaktika inspektorlari, yoshlar yetakchilari va ta’lim muassasalari rahbarlarining faoliyati tanqidiy baholanib, jinoyatchilikka qarshi kurashda formal yondashuvga yo‘l qo‘ymaslik, har bir mahallada aniq natijaga qaratilgan ishlar tashkil etish zarurligi ta’kidlandi. Yig‘ilish yakunida jinoyatchilikka barvaqt kurashish, ijtimoiy profilaktika ishlarini kuchaytirish, yoshlar va voyaga yetmaganlar o‘rtasida huquqbuzarliklarning oldini olish, ishsizlik va migratsiya bilan bog‘liq muammolarni bartaraf etish bo‘yicha mas’ullarga aniq vazifa va muddatlar qo‘yildi. Viloyat rahbari ushbu masalalar yuzasidan har bir rahbardan shaxsiy javobgarlik talab etilishini qayd etib, belgilangan vazifalar ijrosi doimiy nazoratda bo‘lishini ta’kidladi.