Toshkent vilоyati hоkimligi

Viloyat hokimiga yoshlarga oid davlat siyosati doirasida 2025 yil davomida amalga oshirilgan ishlar hamda 2026 yilda belgilangan ustuvor vazifalar bo‘yicha batafsil taqdimot qilindi.
 

Taqdimotda ta’kidlanganidek, bugungi kunda viloyatda 732 ming 617 nafar yoshlar istiqomat qilmoqda. Ularning 52 foizini erkaklar, 48 foizini ayollar tashkil etadi. Yoshlarni ijtimoiy holatiga ko‘ra tahlil qilish natijasida ularning asosiy qismi “yashil” toifaga mansub ekani, shu bilan birga “sariq” va “qizil” toifadagi yoshlar bilan ham manzilli ish olib borilayotgani qayd etildi.
 

2025 yil davomida “Yoshlar daftari” platformasi orqali 6 ming 173 nafar yoshga 18,3 mlrd so‘m miqdorida moddiy va ijtimoiy ko‘maklar ko‘rsatildi.
 

Jumladan, kontrakt to‘lovlari, davolanish xarajatlari qoplandi, safarbarlik chaqiruvi rezervi to‘lovlari amalga oshirildi hamda minglab yoshlarning bandligi ta’minlandi.
 

Yoshlarning bo‘sh vaqtini mazmunli tashkil etish, iqtidor va salohiyatini ro‘yobga chiqarish maqsadida “Besh tashabbus olimpiadasi” doirasida 1 milliondan ortiq yoshlar qamrab olindi. Respublika bosqichlarida viloyat yoshlari tomonidan 27 ta medal qo‘lga kiritildi. Shuningdek, so‘ngi 3 yilda mahallalarda 70 ta zamonaviy sport maydonchalari barpo etildi.
 

Yoshlar bandligini ta’minlash yo‘nalishida ishlab chiqilgan “Yoshlar bandlik dasturi” doirasida 29 ming nafardan ziyod yoshlar qamrab olinib, dastur ijrosi 89 foizga yetkazildi. Minlab yoshlar doimiy ish o‘rinlariga joylashtirildi, kasb-hunarga o‘qitildi, tadbirkorlik faoliyatiga jalb etildi va ta’limning keyingi bosqichlariga yo‘naltirildi.
 

Shuningdek, “og‘ir” toifadagi ishsiz yoshlar bilan manzilli ishlash, otaliqqa olingan yoshlarni ijtimoiylashtirish, migratsiyadagi yoshlarni Vatanga qaytarish va ularning bandligini ta’minlash borasida samarali natijalarga erishildi. Yoshlar va voyaga yetmaganlar o‘rtasida jinoyatchilik ko‘rsatkichlari o‘tgan yilga nisbatan sezilarli darajada kamaygani alohida ta’kidlandi.
 

Taqdimotda 2026 yil uchun belgilangan ustuvor vazifalar ham aniq rejalar asosida ko‘rsatib o‘tildi. 
 

Xususan, 2026 yilda yoshlar bilan ishlashda ustuvor vazifalar sifatida huquq-tartibot va mudofaa organlari hamda mahalliy hokimliklar tomonidan otaliqqa olingan 1 907 nafar huquqbuzarlikka moyil yoshlar bilan amalga oshirilgan ishlar tahlili chuqurlashtiriladi. Yoshlar o‘rtasida jinoyatchilik ko‘rsatkichlari yuqori bo‘lgan Quyi Chirchiq, Bekobod tumanlari va Ohangaron shahrida vatanparvarlik ruhini kuchaytirish, jinoyatchilikning oldini olishga qaratilgan manzilli chora-tadbirlar amalga oshiriladi. 
 

Shuningdek, xatlov natijasida aniqlangan 7 119 nafar ishsiz yoshlarni tashkilot rahbarlariga nomma-nom biriktirish orqali ularning bandligi qat’iy nazoratga olinadi. Dehqonchilik bilan shug‘ullanish istagida bo‘lgan 1 950 nafar yoshlarga 1 613 gektar yer maydonlari ajratish, “2+6” dasturi doirasida 1 500 nafar yoshlarni chet tillariga o‘qitish uchun subsidiyalar berish rejalashtirilgan.
 

Yoshlarni zamonaviy kasb va xorijiy tillarga o‘qitish maqsadida “Qizlar akademyasi”, “Ustoz AI” va “Ibrat farzandlari” mega loyihalari orqali 100 mingdan ortiq yoshlar qamrab olinadi. Shu bilan birga, 1 500 nafar yoshni kasb va chet tillariga o‘qitish orqali tartibli mehnat migratsiyasiga yo‘naltirish hamda tadbirkorlik qilish istagidagi 3 450 nafar yoshlarga Prezidentning tegishli qarorlari asosida imtiyozli kreditlar ajratilishida amaliy ko‘mak ko‘rsatiladi.
 

Taqdimot yakunida viloyat hokimi yoshlar bilan ishlashda har bir hudud, har bir mahalla kesimida manzilli yondashuvni kuchaytirish, natijadorlik va shaxsiy mas’uliyatni oshirish zarurligini ta’kidlab, bir qancha yo‘nalishlarda o‘z takliflarini bildirdi.