Toshkent vilоyati hоkimligi

Bugun Toshkent viloyati hokimi Zoyir Mirzayev rahbarligida Toshkent tumanida jamoat xavfsizligini mustahkamlash va jinoyatchilikning oldini olish masalalariga bag‘ishlangan kengaytirilgan  yig‘ilish o‘tkazildi.  Mazkur muloqot davlatimiz rahbari tomonidan xavfsizlik va jamoat tartibini ta’minlash borasida belgilab berilgan ustuvor vazifalar ijrosini joylarda ta’minlash bo‘yicha zarur choralarni belgilab olish imkonini berdi. Barcha tuman va shaharlarda, ayniqsa, Toshkent shahriga tutash hududlarda tinch va barqaror muhitni har qachongidan ham sog‘lomlashtirish,  huquqbuzarliklarning barvaqt profilaktikasini kuchaytirishni bugun zamonning o‘zi taqozo etmoqda. Qayd etilganidek, maqsad — muammolarni umumiy muhokama qilish emas, balki aniq yechimlar va ta’sirchan mexanizmlarni ishga tushirishdan iboratdir. Tadbirda viloyat va tuman darajasidagi mutasaddi tashkilotlar rahbarlari, huquqni muhofaza qiluvchi idoralar vakillari, ta’lim muassasalari mas’ullari, profilaktika inspektorlari, mahalla fuqarolar yig‘inlari raislari, xotin-qizlar va yoshlar bilan ishlashga mas’ullar, shuningdek, faol jamoatchilik ishtirok etdi. Viloyat rahbari tumanda o‘tgan 2025 yil mobaynida sodir etilgan jinoiy holatlar va ularni keltirib chiqargan omillarni tahlil chig‘irig‘idan o‘tkazar ekan, o‘z xizmat vazifalarini yetarli darajada bajara olmayotgan sohaviy mas’ullar faoliyatini keskin tanqid qildi. Darhaqiqat,  xavfsizlik masalasi faqat bir idora emas, balki butun jamiyat hamkorligi orqali hal etiladigan masaladir. Muhokamalar jarayonida hududdagi kriminogen vaziyatdan kelib chiqib,  jinoyatchilikka qarshi kurashishdagi ustuvor yo‘nalishlar aniq belgilab olindi. Xususan, uyushgan jinoyatchilikka nisbatan murosasiz yondashuvni kuchaytirish, narkotik vositalar muomalasi va kiberjinoyatlarni erta bosqichda aniqlash, oilaviy zo‘ravonlik, talonchilik va jamoat joylaridagi bezorilik holatlarining oldini olish bo‘yicha manzilli choralar ko‘rish zarurligi qayd etildi. Shuningdek, giyohvandlik va yashirin iqtisodiyotga nisbatan jamiyatda mutlaq toqatsiz munosabatni shakllantirish amaliy vazifa sifatida belgilandi. Alohida e’tibor huquqbuzarliklar ko‘p kuzatilayotgan va xavf darajasi yuqori bo‘lgan, shartli ravishda “qizil” toifaga kiritilgan mahallalarga qaratildi. Bu hududlarda profilaktik ishlar faqat umumiy tarzda emas, balki har bir xonadon, har bir oila kesimida olib borilishi, ta’lim muassasalari, mahalla va huquqni muhofaza qiluvchi organlar o‘rtasidagi hamkorlik mutlaqo yangi, samarador formatga o‘tkazilishi zarurligi ta’kidlandi. Viloyat hokimi o‘z chiqishida jamoat xavfsizligi masalasida “mayda” tushuncha mavjud emasligini, har bir murojaat, har bir signal va har bir holat jiddiy e’tiborni talab qilishini ta’kidladi. Profilaktika ishlari faqat sodir bo‘lgan holatga javob qaytarish bilan cheklanmasdan, jinoyatga olib keluvchi omillarni  aniqlab, ularni bartaraf etishga qaratilgan tizimli faoliyatga aylanishi shartligi uqtirildi. Yig‘ilish davomida Toshkent tumanida har bir mahalla kesimida vaziyatni doimiy tahlil qilish, “qizil” hududlarda kompleks profilaktik dasturlarni kuchaytirish, ayniqsa, yoshlar va talabalar o‘rtasida huquqbuzarliklarning oldini olish bo‘yicha aniq amaliy vazifalar belgilab olindi. Uchrashuv yakunida ishtirokchilar tomonidan taklif va mulohazalar bildirildi, mavjud muammolar ochiq muhokama qilindi. Ko‘tarilgan masalalar yuzasidan mas’ullarga manzilli topshiriqlar berilib, ijroni nazorat qilish mexanizmi belgilab qo‘yildi.