Toshkent vilоyati hоkimligi

Davlatimiz rahbarining 2025-yil 26-dekabr kuni Oliy Majlis va O‘zbekiston xalqiga yo‘llagan Murojaatnomasida yurt obodligi, avvalo, mahalladan boshlanishi, aynan mahalladagi yo‘l, suv, elektr va transport ta’minoti, bog‘cha, maktab va oilaviy poliklinikadagi shart-sharoitlarga qarab, odamlar islohotlarimizga baho berishi ta’kidlangan edi. Aynan shuning uchun  6 ta ustuvor yo‘nalishdan iborat bo‘lgan dasturning birinchi ustuvor yo‘nalishi etib mahalla infratuzilmasini yanada yaxshilash, ularga Yangi O‘zbekiston qiyofasini olib kirish belgilab olindi. Tanlab olingan “Yangi O‘zbekiston qiyofasidagi 33 ta tuman (shahar) va 330 ta sharoiti og‘ir mahallalarga barcha manbalar hisobidan 8,5 trillion so‘m mablag‘ ajratilishi orqali ularni aholining yashashi va tadbirkorlik faoliyati bilan shug‘ullanishi uchun namunali hududga aylantirish muhim vazifa sifatida belgilab olindi. O‘zbekiston Respublikasi Oliy Majlis Qonunchilik palatasi Demokratik institutlar va fuqarollik jamiyatini rivojlantirish masalalari qo‘mitasi deputatlari N.Umarov, N.Tilavoldiyev, Ye.Smesova va G.Avezdurdiyeva Toshkent viloyatida Yangi O‘zbekiston qiyofasidagi tuman (shahar)lar va Yangi O‘zbekiston qiyofasidagi mahallalarda amalga oshirilayotgan ishlarning holatini nazorat tahlil tartibida o‘rganishmoqda. Dastlab deputatlar Chirchiq shahri va Bo‘ka tumanida viloyat va hududiy hokimliklar mas’ullari, mahalliy kengash deputatlari ishtirokida davlatimiz rahbarining 2025 yil 8 oktyabrdagi “Alohida tuman (shahar) va mahallalarni aholining yashashi va tadbirkorlik faoliyati bilan shug‘ullanishi uchun namunali hududga aylantirish chora-tadbirlari to‘g‘risida”gi qarorida belgilangan vazifalarni muhokama etishdi. Muhokamalar jarayonida tanlab olingan mahallalarning belgilangan mezonlarga mos kelishi, O‘zbekiston qiyofasidagi mahallalarni kompleks rivojlantirish bo‘yicha “Taraqqiyot va yetakchilik maskani” dasturlari qabul qilinganligi, mahalla markazi uchun master rejalarning ishlab chiqilganligi masalalariga alohida e’tibor qaratildi. Shundan so‘ng deputatlar hududlarda Yangi O‘zbekiston qiyofasidagi mahalla sifatida tanlangan Chirchiq shahridagi barcha mahallalar, Bo‘ka tumanidagi “Chavlisoyli” va “Jag‘aybayli” mahallalarida ham bo‘lib, rejalashtirilayotgan loyihalar bilan yaqindan tanishdilar. Tadbirkorlikni rivojlantirish, aholiga yanada qulayliklar yaratish, umuman, loyiha doirasidagi bunyodkorlik ishlarini o‘z vaqtida va sifatli bajarish yuzasidan tavsiyalar berdilar. Ikkinchi kuni Oliy Majlis Qonunchilik palatasi deputatlari Yangiyo‘l shahri va Chinoz tumanida ayni masala yuzasidan nazorat-tahlil tartibida o‘rganishlar o‘tkazishdi.