Toshkent vilоyati hоkimligi

Bugun Nurafshon shahridagi “Cyber university” davlat universitetida tuman va shaharlar hokimliklari hamda tegishli boshqarma va tashkilotlar Axborot xizmatlari rahbarlari uchun o‘quv-amaliy seminar o‘z ishini boshladi. Viloyat hokimligi tashabbusi bilan tashkil etilgan seminardan ko‘zlangan maqsad axborot xizmatlari faoliyat samaradorligini tanqiliy ko‘rib chiqqan holda, matbuot kotiblarining sohaga doir bilim va ko‘nikmalarini yanada oshirish, buning uchun maxsus seminar-treninglar tashkil etishdan iboratdir. Shunga muvofiq bugun ish boshlagan amaliy mashg‘ulotlarda tinglovchilar qonunchilik mezonlari, tashkilot haqida ijobiy imidj yaratish,  raqamlar bilan ishlash, sun’iy intellekt imkoniyatlaridan samarali foydalanish, krizis vaziyatlardan chiqish, jamoatchilik oldida gapirish, raddiya, boyonotlar berish borasida o‘z bilim va malakalarini yanada mustahkamlaydilar. O‘quv-mashg‘ulotlarni taniqli siyosatshunos va mass-media sohasi bo‘yicha olim-ekspert Beruniy Alimov boshchiligidagi “NMEC” malaka markazining  tajribali mutaxassislari va ekspertlari olib borishadi.  Uch kun mobaynida tinglovchilarga  6 modulda 21 soat dars tashkil etilgan. Xususan, birinchi kun dasturidan kommunikatsiya jarayonlarini samarali tashkil etish, ommaviy axborot vositalari bilan hamkorlikni yo‘lga qo‘yish, feyk xabarlar va axborot xurujlariga qarshi turish, inqirozli kommunikatsiyalarni boshqarishga oid mashg‘ulotlar o‘rin olgan.  Ikkinchi va uchinchi kunlarda esa zamonaviy PR texnologiyalari, raqamli media va sun’iy intellekt imkoniyatlaridan foydalanish, sifatli kontent yaratish masalalariga doir darslar o‘tiladi hamda bilimlarni mustahkamlovchi jonli  muloqot va diskussiyalarga keng o‘rin beriladi.  Shuningdek, barcha ishtirokchilarning bilim va ko‘nikmalari seminargacha va seminardan keyingi holat shaklida test  orqali baholanadi.