Toshkent vilоyati hоkimligi

Bugun Toshkent viloyati Ichki ishlar Bosh boshqarmasida “Aholining kibermadaniyatini yuksaltirish va kibergigiyenani shakllantirish” mavzusida matbuot anjumani tashkil etildi. Unda viloyat IIBB mas’ul rahbarlari, ommaviy axborot vositalari vakillari, jamoatchilik faollari hamda blogerlar ishtirok etdi. Mazkur anjumandan ko‘zlangan maqsad aholini axborot texnologiyalari sohasida sodir etilayotgan turli firibgarlik usullari bilan tanishtirish, kiberjinoyatlarning oldini olish va fuqarolarda kibermadaniyatini yuksaltirish hamda kibergigiyenasini shakllantirishdan iboratdir. Mas’ullar tomonidan taqdim etilgan ma’lumotlarga ko‘ra, joriy yilning o‘tgan 10 oyi davomida Toshkent viloyatida sodir etilgan umumiy jinoyatlarning 44 foizi kiberjinoyatlarni tashkil etgan. Bu ko‘rsatkich o‘tgan yilga nisbatan 14 foizga ko‘p degani. Shuningdek, kiberjinoyatlarning asosiy usullari sifatida quyidagilar qayd etilgan: zararli havolalar orqali bank karta yoki akkauntni egallab olish; tovar va xizmatlar uchun oldindan to‘lovni talab qiluvchi soxta bitimlar; soxta kriptobirjalar orqali firibgarlik; nomiga onlayn kredit rasmiylashtirish; telefon qo‘ng‘iroqlari orqali aldov yo‘li bilan mablag‘ o‘g‘irlash holatlari. Bu kabi holatlar, axborot texnologiyalari rivojlanishi bilan bir qatorda, shaxsiy ma’lumotlar xavfsizligini ta’minlash madaniyatini kuchaytirish zaruratini yana bir bor ko‘rsatmoqda.  Buning uchun har bir fuqaro internetdan foydalanishda ehtiyotkorlikni kuchaytirishi, shubhali havolalarni ochmasligi, begona shaxslarga bank ma’lumotlari yoki SMS kodlarni bermasligi lozim. Tadbir davomida mas’ullar fuqarolarni kibergigiyena qoidalariga qat’iy amal qilishga va har qanday shubhali holat yuz berganda darhol tegishli huquqni muhofaza qiluvchi organlarga murojaat etishga chaqirishdi. Matbuot anjumanida jurnalist va blogerlar o‘zlarini qiziqtirgan savollarga batafsil javob oldilar.