Samarqand viloyati Toyloq tumani hokimligi

Bu jarayonda Samarqand viloyatining Toyloq tumanida ham xorijiy ishbilarmon doiralar bilan o‘zaro manfaatli hamkorlikni rivojlantirishga alohida e’tibor qaratilmoqda.

Shu maqsadda Xitoyning nufuzli ishbilarmon doiralari vakillaridan iborat delegatsiya Toyloq tumaniga tashrif buyurdi. Tashrifdan ko‘zlangan asosiy maqsad savdo-iqtisodiy, investitsiyaviy hamda qishloq xo‘jaligi yo‘nalishlarida hamkorlikni yanada mustahkamlash, yangi loyihalarni amalga oshirish imkoniyatlarini o‘rganishdan iborat bo‘ldi.

Delegatsiya tarkibida Osiyo-Iqtisodiy Hamkorlik Tashqi Investitsiyalar bo‘yicha Ishchi Qo‘mitasi raisi Chju Tingbin, shuningdek, Zhejiang Tenengtong konchilik texnologiyalari kompaniyasi (Zhejiang Zhongte konchilik tadqiqot instituti) hamda Wenzhou Raqamli fan parki operatsiya va boshqaruv kompaniyasi Direktorlar kengashi raisi Xie Tongdu ishtirok etdi.

Tashrif davomida mehmonlar tumandagi yirik ishlab chiqarish korxonalari va ilmiy-tadqiqot muassasalarining faoliyati bilan yaqindan tanishdilar.

Xususan, “PET AGRO OIL” MCHJ QKda o‘simlik yog‘i, sut va sut mahsulotlarini ishlab chiqarish jarayonlari ko‘zdan kechirilib, korxonaning ishlab chiqarish quvvati va istiqboldagi imkoniyatlari haqida ma’lumot berildi.

“BOG‘IZAG‘ON” MCHJda esa vino va vino mahsulotlarini tayyorlash texnologiyasi, ishlab chiqarilayotgan mahsulot turlari hamda korxonaning rivojlanish istiqbollari namoyish etildi.

Shuningdek, delegatsiya Sabzavot, poliz ekinlari va kartoshkachilik ilmiy-tadqiqot instituti Samarqand ilmiy-tajriba stansiyasida bo‘lib, qishloq xo‘jaligi sohasidagi ilmiy ishlanmalar, tajriba-sinov ishlari va mavjud ilmiy salohiyat bilan tanishdi.

Tashrifning muhim jihatlaridan biri Toyloq tumani hokimi Behzod Raxmatullayev hamda Xitoy ishbilarmon doiralari vakillari o‘rtasidagi uchrashuv bo‘ldi.
Muloqot davomida investitsiya loyihalarini amalga oshirish, savdo-iqtisodiy aloqalarni kengaytirish, zamonaviy texnologiyalarni jalb etish hamda qishloq xo‘jaligi va sanoat yo‘nalishlarida qo‘shma loyihalarni yo‘lga qo‘yish masalalari atroflicha muhokama qilindi.

Uchrashuv yakunida tomonlar o‘zaro hamkorlikni yangi bosqichga olib chiqishga qaratilgan memorandumni imzoladilar.

Mazkur kelishuv Toyloq tumaniga Xitoy investitsiyalarini jalb etish, yangi ishlab chiqarish loyihalarini amalga oshirish, zamonaviy texnologiyalarni joriy qilish va yangi ish o‘rinlarini yaratish borasida muhim qadam bo‘lib xizmat qiladi.