Samarqand viloyati Toyloq tumani hokimligi

Shu maqsadda Bog‘izog‘on agrofirmasiga qarashli "Norqul Doston bog‘lari" fermer xo‘jaligida namunaviy loyiha sifatida 3 sotix yer maydonida yengil konstruksiyali tovuqxona barpo etildi. Ayni paytda bu yerda 4,5 ming bosh jo‘ja parvarish qilinmoqda.

Mazkur tajribani hududdagi boshqa fermer xo‘jaliklarida ham keng joriy etish maqsadida amaliy seminar tashkil etildi. Unda Toyloq tumani hokimi Behzod Raxmatullayev, tuman IIB boshlig‘i Eldor Rahmatov, sohaga mas’ul tashkilotlar vakillari hamda agrofirma hududidagi fermer xo‘jaliklari rahbarlari ishtirok etdi.

Seminar davomida yengil konstruksiyali tovuqxonalar tashkil etishning iqtisodiy samaradorligi, parrandachilik orqali qo‘shimcha daromad olish imkoniyatlari, fermer xo‘jaliklari va ularning ishchilarining manfaatdorligini oshirish masalalari yuzasidan fikr almashildi.

Shuningdek, bunday loyihalar nafaqat fermer xo‘jaliklarining daromadini ko‘paytirishi, balki aholini sifatli va arzon parranda mahsulotlari bilan ta’minlash, ichki bozorda mahsulotlar hajmini oshirish hamda oziq-ovqat xavfsizligini mustahkamlashga xizmat qilishi alohida ta’kidlandi.

Seminar yakunida fermerlarga ushbu tajribani o‘z xo‘jaliklarida ham joriy etish, mavjud imkoniyatlardan samarali foydalanish hamda Prezident qarorida belgilangan vazifalarni to‘liq amalga oshirish bo‘yicha tegishli tavsiyalar berildi.