Toyloq tumanida ijtimoiy muammolarni hal etish bo‘yicha samarali ishlar olib borilmoqda
2026-07-15 09:30:00 / Yangiliklar
Xususan, bugun tuman hokimi Behzod Raxmatullayev, tuman prokurori U.Oqbo‘tayev, MIB mas'ullari hamda mutasaddi tashkilotlar rahbarlari ishtirokida yordamga muhtoj, og‘ir ijtimoiy ahvolga tushib qolgan, aliment qarzdorligi mavjud hamda ajrashish yoqasidagi oilalar bilan navbatdagi uchrashuv o‘tkazildi.
👨👩👧👦 Uchrashuv davomida:
10 ta oila bilan yakka tartibda suhbat o‘tkazilib, ular yarashtirildi (joriy tadbirlar boshidan 41 ta oila yarashtirilgan).
Shuningdek, aliment to‘lashdan bo‘yin tovlagan 18 nafar qarzdorga nisbatan sayyor sud majlislari o‘tkazilib, ularga tegishli jazo tayinlandi. Olib borilgan chora-tadbirlar samarasida jami 222,7 million so‘mlik aliment qarzdorligi undirilib, o‘z egalariga yetkazib berildi.
E’tiborlisi, tizimli ishlar natijasida aliment to‘lovlari bilan bog‘liq murojaatlar soni o‘tgan yilning mos davriga nisbatan 30,6 foizga kamaydi.
Bu kabi manzilli chora-tadbirlar nafaqat oilalarda totuvlikni mustahkamlash, balki hududda ijtimoiy barqarorlikni ta’minlash, fuqarolarning qonuniy huquq va manfaatlarini himoya qilishda ham muhim ahamiyat kasb etmoqda.