Qoraqalpog'iston Respublikasi Taxtako'pir tumani hokimligi

Taxtako‘pir tumanida O‘qituvchi va murabbiylar kuni munosabati bilan tantanali bayram tadbiri bo‘lib o‘tdi

Bugun, 1-oktyabr — O‘qituvchi va murabbiylar kuni munosabati bilan Taxtako‘pir tumanida ta’lim sohasi vakillari, faxriy ustozlar hamda keng jamoatchilik ishtirokida tantanali bayram tadbiri tashkil etildi.

Tadbirda Taxtako‘pir tumani hokimi J.Adilov ishtirok etib, ta’lim-tarbiya sohasida samarali mehnat qilayotgan ustoz va murabbiylarni kasb bayrami bilan samimiy muborakbod etdi. O‘z tabrigida pedagoglarning yosh avlodni har tomonlama barkamol etib tarbiyalash, ularga zamonaviy bilim va ko‘nikmalar berish, yurt ravnaqi hamda jamiyat taraqqiyotiga munosib hissa qo‘shishdagi o‘rni va ahamiyatini alohida ta’kidladi.

Tantanali tadbirda davomida ta’lim sifatini oshirish, yoshlar tarbiyasi, ma’naviy-ma’rifiy ishlar hamda o‘quvchilarni turli yutuqlarga yo‘naltirish borasida alohida faollik ko‘rsatib kelayotgan bir guruh pedagoglarga tuman hokimligining faxriy yorliqlari va esdalik sovg‘alari tantanali ravishda topshirildi.

Shuningdek, joriy yilda o‘tkazilgan "Yil o‘qituvchisi - 2026" tanlovida Taxtako‘pir tumanidagi 3-sonli ayrim fanlar chuqurlashtirib o‘qitiladigan sinflari mavjud umumiy o‘rta ta’lim maktabining o‘zbek tili fani o‘qituvchisi Qipchoqboyeva Aynura Paraxatovna g‘olib deb topildi.

Tantanali tadbirda tuman hokimi J. Adilov ushbu yuksak natija bilan Aynura Paraxatovnani alohida tabriklab, tanlov g‘olibiga bazaviy hisoblash miqdorining 1 400 baravari, ya’ni 616 million so‘m miqdoridagi vaucherni tantanali ravishda topshirdi. Bu e’tirof ustozning ko‘p yillik mehnati, kasbiy mahorati va ta’lim-tarbiya sohasiga qo‘shayotgan hissasining munosib bahosi bo‘ldi.

Bayram tadbiri davomida ustozlarga ehtirom va minnatdorlik tuyg‘ulari mujassam bo‘lgan kuy-qo‘shiqlar hamda badiiy chiqishlardan iborat konsert dasturi namoyish etildi.