Taxtako‘pir tumanida faoliyat yuritayotgan "Kausar Tegirmon" mas’uliyati cheklangan jamiyatining tantanali ochilish marosimi bo‘lib o‘tdi
2025-12-23 20:05:00 / Yangiliklar
Bugun Taxtako‘pir tumanida faoliyat yuritayotgan "Kausar Tegirmon" mas’uliyati cheklangan jamiyatining tantanali ochilish marosimi bo‘lib o‘tdi.
Tadbirda tuman hokimi J.Adilov ishtirok etib, tadbirkorni ushbu yirik loyiha va korxona faoliyati bilan samimiy tabrikladi va uning hudud iqtisodiyotini rivojlantirish, tadbirkorlikni qo‘llab-quvvatlash, yangi ish o‘rinlari yaratish hamda aholini sifatli oziq-ovqat mahsulotlari bilan ta’minlashdagi ahamiyatini alohida ta’kidladi.
Shundan so‘ng tuman hokimi va tadbirda ishtirok etgan keng jamoatchilik vakillari donni qayta ishlash quvvatiga ega zamonaviy un zavodi faoliyati bilan yaqindan tanishdi.
Ma’lumot o‘rnida aytish kerak, O‘zbekiston Respublikasi Prezidentining Qoraqalpog‘iston Respublikasini ijtimoiy-iqtisodiy jihatdan yanada rivojlantirish, tadbirkorlik subyektlarini qo‘llab-quvvatlashga qaratilgan farmon va qarorlarining ijrosi doirasida jamiyat tomonidan 2024 yilda "Agrobank"ning imtiyozli krediti hisobidan umumiy qiymati 32 mlrd. so‘mlik chorvachilikni rivojlantirish va sutni qayta ishlash loyihasi amalga oshirildi.
Shuningdek, xorijdan 120 bosh naslli qoramol olib kelinib, chorvachilik salohiyati yanada mustahkamlandi. Loyiha doirasida umumiy qiymati 500 mln. so‘mlik sutni qayta ishlash korxonasi ishga tushirilib, 7 nafar fuqaro doimiy ish bilan ta’minlandi.
Bugungi kunda chorvachilik majmuasida Germaniya, Daniya va Ukraina davlatlaridan olib kelingan 170 boshdan ortiq naslli qoramollar parvarishlanmoqda. Jamiyat tasarrufidagi 500 gektar ekin maydonlarida chorva mollari uchun to‘yimli o‘t-o‘lanlar yetishtirilmoqda.
Sutni qayta ishlash korxonasida ayni paytda qadoqlangan qatiq, smetana, yogurt, toraq va tvorog kabi mahsulotlar ishlab chiqarilib, ichki bozorga yetkazib berilmoqda.
O‘zbekiston Respublikasi Prezidentining 2023-yil 8-avgust kungi "Qoraqalpog‘iston Respublikasida tadbirkorlarga qulay sharoitlar yaratishga oid qo‘shimcha chora-tadbirlari to‘g‘risida"gi PP-129-sonli Farmoniga asosan, "Kausar Tegirmon" mas’uliyati cheklangan jamiyatiga tumandagi "Davqara" QFY hududidan 100 gektar yer maydoni ajratilib, jami bahosi 10 mlrd. 300 mln. so‘mlik intensiv mevali bog‘ yaratildi.
Bundan tashqari, jamiyat tomonidan umumiy qiymati 878 ming AQSH dollari bo‘lgan junni qayta ishlash, shuningdek, 46 milliard so‘mlik donni qayta ishlash loyihalari ham bosqichma-bosqich amalga oshirilmoqda. Bunda Turkiya texnologiyasi asosida sutkasiga 45 tonna donni qayta ishlash quvvatiga ega zamonaviy un zavodi barpo etilib, natijada Qoraqalpog‘iston Respublikasida yana bir yangi un ishlab chiqarish korxonasi ish boshladi.
Eng muhimi, ushbu loyiha tumanimizni ijtimoiy-iqtisodiy jihatdan yanada rivojlantirish, aholi bandligini ta’minlash, mahalliy ishlab chiqarish salohiyatini oshirish va bozorni sifatli va raqobatbardosh oziq-ovqat mahsulotlari bilan ta’minlashda muhim ahamiyatga ega bo‘lib, loyihalar doirasida 100 dan ortiq yangi ish o‘rinlari yaratildi.