O‘zbеkistоn Rеspublikаsi Sоg‘liqni saqlash vаzirligi

Xususan, so'nggi yillarda Respublika ixtisoslashtirilgan tibbiyot markazlari soni — 10 tadan 25 taga, ularning hududiy filiallari 2 tadan qariyb 300 taga etkazildi. 

Kasalliklarni davolash samaradorligini oshirish maqsadida 2017-2024 yillarda diagnostika usullari — 70 tadan qariyb 550 taga, davolash usullari — 60 tadan 800 taga ko'paydi. 

Hududlarda yuqori texnologik operasiyalar ulushi 61 foizga etkazilib, poytaxtga kelib davolanish ko'rsatkichi 24 foizga qisqardi.

Jumladan, Respublika ixtisoslashtirilgan gematologiya ilmiy-amaliy tibbiyot markazida donordan olingan suyak ko'migi o'zak hujayralari transplantasiyasi yo'lga qo'yildi. 

Respublika ixtisoslashtirilgan kardiologiya markazida yurak nuqsonidan aziyat chekuvchi bemorlarda 3D-endoskopik usulda murakkab jarrohlik amaliyoti o'tkazish o'zlashtirildi. 

Endi zamonaviy kardioxirurgik xizmat olis va chekka tumanlarga ham kirib boryapti. Shu maqsadda faoliyat boshlaganiga ko'p bo'lmagan Milliy tibbiyot markaziga Evropadan zamonaviy ko'chma kardiojarrohlik majmualari olib kelindi. 

Ushbu unikal texnika olis hududlarda istiqomat qiladigan, ayniqsa, nogironligi bor, kasallik sabab to'shakka mixlanib qolgan og'ir bemorlarni yashash joyining o'zida ko'rikdan o'tkazish va ularda zarur operasiyalarni bajarishga xizmat qilyapti. 

Bunday amaliy sa'y-harakatlar Respublika ixtisoslashtirilgan tibbiyot markazlarining tumanlar darajasiga tushib ishlayotgani, ushbu muassasalar etakchi shifokorlarining joylardagi tor soha mutaxassislari bilim ko'nikmalarini oshirishga yaqindan ko'maklashayotgani dalolatidir.

Bu kabi yutuqlarimiz jahon miqyosida ham munosib e'tirof etilmoqda. 2024 yilda bolalar milliy tibbiyot markazi xalqaro darajadagi JCI sertifikatini oldi. 

Respublika ixtisoslashtirilgan ona va bola salomatligi ilmiy-amaliy tibbiyot markazi hamda Respublika ixtisoslashtirilgan dermatovenerologiya va kosmetologiya ilmiy-amaliy tibbiyot markazi ham xalqaro akkrdetasiyadan o'tdi.

Bundan tashqari, quyidagi muassasalarga ISO 9001:2015 va ISO 7101:2023 xalqaro sifat standartlari joriy etilganligi munosabati bilan maxsus sertifikatlar topshirildi:

 Respublika ixtisoslashtirilgan xirurgiya ilmiy-amaliy tibbiyot markazi; 

 Respublika ixtisoslashtirilgan endokrinologiya ilmiy-amaliy tibbiyot markazi; 

 Respublika ixtisoslashtirilgan pediatriya ilmiy-amaliy tibbiyot markazi; 

 Respublika ixtisoslashtirilgan dermatovenerologiya va kosmetologiya ilmiy-amaliy tibbiyot markazi.

Binobarin, Milliy tibbiyot markazida ISO 9001:2015 xalqaro sifat standartlari joriy etildi.

O'zbekiston 2026 yil oxiriga qadar OIV, sifilis va gepatit V ning onadan bolaga yuqishini yo'q qilish bo'yicha "yo'l xaritasi"ni ishlab chiqib, gepatit V ga qarshi kurashish bo'yicha oraliq maqsadli ko'rsatkichlarga erishish uchun salmoqli ishlar olib bordi.

Natijada Jahon sog'liqni saqlash tashkilotining Evropa mintaqaviy byurosi O'zbekistonning gepatit V ga qarshi kurashish bo'yicha mintaqaviy maqsadli ko'rsatkichlarga erishganini tasdiqlovchi sertifikatni taqdim etdi. 

Aytish joizki, ayni paytda yurtimizdagi ixtisolashtirilgan tibbiyot markazlari va ularning filiallarida har yili o'rtacha 100 ming nafar imtiyozli toifaga mansub bemorlar imtiyozli yo'llanma asosida davolanmoqda.

Bu orqali qanchadan-qancha bemorlar ortiqcha vaqt va mablag'sarflab, chet eldagi klinikalarga borish tashvishidan qutilyapti.

Endilikda bu ko'rsatkichlarni yanada yaxshilash uchun yuqori texnologik innovasion dignostika va ilg'or davolash usullarini tumanlar darajasiga tushirish choralari ko'riladi.

Sog'liqni saqlash vazirligi
Matbuot xizmati.