Sirdaryo viloyati hokimligi
Sirdaryo viloyati hokimligi (120100, Guliston shahar, Islom Karimov ko‘chasi 60 uy.) – mahalliy davlat boshqaruv organi hisoblanadi.
Sirdaryo viloyati kengashining navbatdan tashqari 8 chaqiriq sessiyasida (1992 yil yanvar) Sirdaryo viloyati hokimligi (Sirdaryo viloyati ijroiya qo‘mitasi negizida) tuzilgan.
Sirdaryo viloyati hokimligi O‘zbekiston Respublikasi Konstitutsiyasi, O‘zbekiston Respublikasining “Mahalliy davlat hokimiyati to‘g‘risida”gi Qonuni (1993 yil 2 sentyabr), O‘zbekiston Respublikasining “Davlat hokimiyati va boshqaruvi organlari faoliyatining ochiqligi to‘g‘risida”gi Qonuni (2014 yil 5 may), O‘zbekiston Respublikasi Prezidentining “Hududlarni kompleks rivojlantirishni taʼminlashda mahalliy davlat boshqaruvi organlari faoliyatini takomillashtirishga oid qo‘shimcha chora-tadbirlar to‘g‘risida”gi qarori (2016 yil 22 fevral), O‘zbekiston Respublikasi Prezidentining “Hududiy davlat boshqaruvi organlari tuzilmasini takomillashtirish to‘g‘risida”gi qarori (2016 yil 24 fevral), Vazirlar Mahkamasining “Viloyatlar, shaharlar va tumanlar hokimliklari boshqaruv apparatlari to‘g‘risidagi namunaviy nizomlarni tasdiqlash haqida”gi qarori (2016 yil 27 aprel), Vazirlar Mahkamasining “Davlat boshqaruvi organlari va mahalliy ijro etuvchi hokimiyat organlari xodimlarining odob-axloq namunaviy qoidalarini tasdiqlash to‘g‘risida”gi qarori (2016 yil 2 mart)ga muvofiq faoliyat yuritadi.
Hokimlik O‘zbekiston Respublikasi Konstitutsiyasida, O‘zbekiston Respublikasining “Mahalliy davlat hokimiyati to‘g‘risida”gi Qonunida va O‘zbekiston Respublikasining boshqa qonunlarida, O‘zbekiston Respublikasi Prezidentining farmonlari, qarorlari va farmoyishlarida, Vazirlar Mahkamasining qarorlari va farmoyishlarida belgilangan vakolatlarini amalga oshirishda davlat organlari va boshqa tashkilotlar bilan hamkorlik qiladi.
Hokimiyat tuzilmasi va xodimlarining cheklangan soni O‘zbekiston Respublikasi Prezidenti va Vazirlar Mahkamasi qarori bilan o‘rnatiladi va o‘zgartiriladi.
Sirdaryo viloyati hokimligi boshqaruv apparati o‘z faoliyatini hokimning rahbarligida amalga oshiradi.
Hokim O‘zbekiston Prezidenti tomonidan tayinlanadi, ozod etiladi va Xalq deputatlari Sirdaryo viloyati Kengashi tomonidan tasdiqlanadi. Hokimning vakolat muddati – 5 yil.