O‘tkir koronar sindromi bilan kasallangan bemorlarni davolash yo‘lga qo‘yildi
2025-01-14 12:00:00 / Yangiliklar
O‘tgan yilning sentyabr oyida o‘z faoliyatini boshlagan rentgenologik endovaskulyar jarrohlik bo‘limi o‘z navbatida shifoxonaga shoshilinch yurak-qon tomir patologiyasi bilan olib kelingan bemorlarning diagnostikasi va ularni davolashda juda qo‘l kelmoqda. Eng asosiysi, bemorlarga kasallikning ilk bosqichlarida yuqori aniqlikda tashxis qo‘yish imkonini bermoqda.
– O‘tkir koronar sindrom bilan shifoxonaga olib kelingan bemorlarda dastlabki davrda diagnostik koronarografiya va yurak toj tomirlarini stentlash amaliyotlari o‘tkazilmoqda, – deydi Respublika shoshilinch tez tibbiy yordam ilmiy markazi Sirdaryo viloyat filiali bosh shifokori Sharof Soatmurodov. – Oldinlari viloyatimizda bunday imkoniyat yo‘q edi. Shu boisdan ushbu turdagi amaliyotlarni bajarish uchun bemorlar poytaxtga, xorijga borishardi. Bu bo‘lsa, bemorlarga qator noqulayliklarni keltirib chiqarayotgan edi. Ushbu bo‘limning ochilishi viloyatimiz tibbiyoti sohasida ulkan burilish yasadi.
Quvonarli tomoni, ushbu apparat yordamida mazkur muassasaning malakali mutaxassislari tomonidan, o‘tgan qisqa vaqt ichida 100 dan ortiq amaliyot o‘tkazildi.
– Bilasizmi, yurak-qontomir kasalliklari nogironlik va o‘lim ko‘rsatkichi bo‘yicha birinchi o‘rinda turadi, – deydi Sh. Soatmurodov. –Shu boisdan bu bo‘lim faoliyatining Respublika shoshilinch tez tibbiy yordam ilmiy markazi Sirdaryo viloyat filialida yo‘lga qo‘yilgani nogironlik va o‘lim ko‘rsatkichlarini pasaytirishda katta ahamiyatga ega.
Ayni vaqtda mazkur muassasada tibbiy yordamga muhtoj bemorlarning yurak koronar qon tomirida, uyqu arteriyasi va oyoq son arteriyalarida yuqori texnologik tekshiruvlarni o‘tkazish ishlari olib borilib, rentgenendovaskulyar jarrohlik yo‘li orqali bemorlarning yurak-qon tomir va uyqu arteriyasida angioplastika va stentlash amaliyotlari o‘tkazilyapti.