Sirdaryo vilоyati hоkimligi

Sirdaryo tumanida kutib olingan OAV vakillari hamda blogerlar “Peng-Sheng” O‘zbekiston-Xitoy qo‘shma korxona negizida tashkil qilingan “AWP” va “Peng Sheng charm” korxonalari, Oqoltin tumanidagi “Agromarkaz”, Mustaqillik mahallasida amalga oshirilgan bunyodkorlik ishlari, Yangiyer shahridagi “Mebelsozlik klasteri” va Xovos tumanida Turkiyaning “Cengiz Enerji” kompaniyasi bilan hamkorlikda bunyod etilgan issiqlik elektr stansiyasi faoliyati bilan tanishdi.

“Peng-Sheng” O‘zbekiston-Xitoy qo‘shma korxonasi 2009-yilda ish boshlagan. Umumiy qiymati 26 mln AQSH dollari bo‘lgan loyihaning bugungi investitsion imkoniyati 100 mln AQSH dollariga chiqqan. Yangi ish o‘rinlari 2 mingdan oshdi. Avvaliga faqatgina kerakmik kafel ishlab chiqarilgan bo‘lsa, endilikda bu yerda santexnika mahsulotlari, qayta ishlangan va ishlov berilgan terilar, dekor panellari, tomchilatib sug‘orishda foydalaniladigan yelim quvurlar, maxsus suv o‘tkazgichlar va plyonkalar, ayollar va erkaklar poyabzallari, charm buyumlar kabi o‘ndan ziyod loyihalar ishga tushirildi. Mahsulotlar eksport geografiyasi MDH davlatlari, Xitoy va Yevropagacha cho‘zildi. Joriy yilning aprel oyida qiymati 10 mln. AQSH dollari bo‘lgan marmar toshlaridan 40 turdagi tayyor mahsulot tayyorlash va terining chiqindiga chiqarib yuboriladigan “oqsil” qismidan jelatin ishlab chiqarish loyihalariga start berildi.

“AWP” korxonasining ustav fondi 7,5 mln AQSH dollarini tashkil etadi. Turli xildagi 2 mln donadan ortiq santexnika mahsulotlari ishlab chiqarish quvvatiga ega korxonada 400 kishi ish bilan taʼminlangan. Maqsad sanitar-texnika mahsulotlari uchun yuqori texnologiyalar asosida smestitel, yopish armaturalari(zulfin)ini ishlab chiqarib, ichki bozor talablarini to‘laqonli qondirish va mahsulotlar eksportini oshirishdan iboratdir.

“Peng Sheng charm” – terini qayta ishlash va jelatin ishlab chiqarish loyihasining qiymati 4,2 mln AQSH dollariga teng. Yiliga 1 500 metr kvadrat turli o‘lchamdagi tabiiy charm hamda 468 ming kg jelatin mahsulotlari ishlab chiqariladi. Mahsulotlar Xitoy hamda MDH davlatlariga eksport qilinmoqda.

Qiymati 5 mln AQSH dollarilik "Oqoltin agro markaz" “Sardoba universal klaster” paxta-to‘qimachilik klasteri tomonidan tashkil qilingan. Markazda o‘simliklarni himoya qilish, tuproq va suv tahlili laboratoriyasi, agronom maslahati, urug‘ va ko‘chatlar yetkazib berish, aholi xonadonlariga issiqxonalar qurish va qishloq xo‘jaligi texnikalari xizmatlari ko‘rsatiladi. Shuningdek, markaz qoshida agromarket va veterinariya dorixonasi ham faoliyat yuritib kelmoqda.

Tumanning Mustaqillik mahallasida “Obod xonadon”, “Obod ko‘cha” va “Obod mahalla” mezonlarini joriy etish, hudud infratuzilmasini yaxshilash, aholi bandligini taʼminlash va og‘ir hudud toifasidan chiqarish bo‘yicha keng ko‘lamli ishlar amalga oshirilib, qisqa fursatda hudud qiyofasi zamonaviy ko‘rinishga keltirildi.

Bu yerdagi mavjud 16 ta ko‘p qavatli uylarning barchasi rekonstruksiya qilindi. Bo‘sh maydonlar ko‘kalamzorlashtirildi. 1 kilometr ichki yo‘llar asfaltlanib, yangi lotoklar qurildi. Piyodalar yo‘laklari, o‘rindiqlar, chiqindi qutilari va 50 dona yangi temir beton ustunlar, zamonaviy tungi yoritish chiroqlari o‘rnatildi. 2 ta transformator punkti yangilandi hamda 3 kilometr havo tarmog‘i tortildi. Shuningdek, yangi qurib bitkazilgan mahalla fuqarolar yig‘ini binosi, «Work out», 5 ta bolalar maydonchasi, sunʼiy qoplamali futbol maydoni, 8 ta jamoat hojatxonasi, 6 ta tandirxona va 1 ta hammom, “Bookcafe”, xotin-qizlarni tadbirkorlik va kasb-hunarga o‘qitish markazi foydalanishga topshirildi.

Davlatimiz rahbari joriy yil 7 apreldagi viloyatimizga tashrifi davomida Sirdaryoni sanoat, tadbirkorlik, qishloq xo‘jaligi, taʼlim va tibbiyot bo‘yicha “ilg‘or innovatsiyalar hududi”ga aylantirish zarurligini taʼkidlagan va bu borada Xitoy tajribasiga tayanish qo‘l kelishi aytilgan edi. Chunki bu davlat mazkur sohalarda katta yutuqlarga erishgan. Qolaversa, xitoylik investorlarning ham viloyatga qiziqishi katta. Shu asnoda o‘tgan davr mobaynida viloyatimiz rasmiylari va tadbirkorlardan iborat delegatsiyaning Xitoyga bir necha bor safari uyushtirildi. O‘tkazilgan muzokaralarda ko‘plab manfaatli kelishuvlarga erishildi. Ayni vaqtda esa ushbu kelishuvlar bosqichma-bosqich amalga tatbiq etilmoqda.

Bunga birgina Yangiyer shahrida tashkil qilingan loyiha qiymati 10 million AQSH dollari bo‘lgan mebelsozlik klasteri yaqqol misol bo‘la oladi. Avvallari faqatgina DSP doskalari ishlab chiqarish faoliyati bilan shug‘ullangan korxona vakillari Xitoyga tashrifi davomida hamkor topib, o‘z faoliyatini yana-da kengaytirishga erishdi.

Endilikda bu yerda yiliga 35 milliard 465 million so‘mlik import o‘rnini bosuvchi 3 million metr kvadrat DSP va MDF, shuningdek, turli xildagi mebel mahsulotlari ishlab chiqarilmoqda. Uskunalar Xitoy va Turkiyadan keltirilgan. Buning uchun Xitoyning “Beijing Goods Jiangsu New Material" kompaniyasi 4 million dollari miqdorida sarmoya kiritgan. Yaratilgan yangi ish o‘rinlari soni 100 tani tashkil etmoqda. Kelgusida eksport hajmini 1,5 million dollarga, ish o‘rinlarini 500 taga yetkazish ko‘zda tutilgan.

Xovos tumanida yana bir yirik investitsion loyiha — Turkiyaning "Cengiz Enerji" kompaniyasi tomonidan quvvati 220 MVt bo‘lgan gaz-porshenli elektr stansiyasi qurilishi muvaffaqiyatli amalga oshirildi. Stansiyaga o‘rnatilgan qurilmalarning foydali ish koeffitsiyenti yuqoriligi tufayli stansiya yiliga 1,7 mlrd kVt soat elektr energiyasi ishlab chiqarish va 150 mln kub metr tabiiy gazni tejash imkonini beradi. Tejalgan tabiiy gaz bilan qo‘shimcha 685 mln kVt soat elektr energiyasi ishlab chiqarish mumkin.

Press-tur yakunlangach “Qabullar uyida” viloyat hokimi Akmaljon Maxmudaliyevning OAV vakillari va blogerlar bilan ochiq muloqoti bo‘lib o‘tdi. Viloyat rahbari nihoyasiga yetayotgan yilda amalga oshirilgan ishlar va kelgusi yildagi dolzarb masalalarga to‘xtalib o‘tdi. Jurnalistlar o‘zlarini qiziqtirgan barcha savollariga javob olishdi.

Qo‘shimcha maʼlumotlar uchun telefon: 67 225-23-69