Xitoyda Sirdaryo uchun yangi sanoat loyihalari muhokama qilinmoqda
2026-05-20 10:20:00 / Yangiliklar
Ayni kunlarda Xitoy Xalq Respublikasida bo‘lib turgan Sirdaryo viloyati delegatsiyasi viloyat hokimi Erkinjon Turdimov boshchiligida qator kompaniya vakillari bilan muzokaralar o‘tkazmoqda.
Uchrashuvlar asosan Prezident Shavkat Mirziyoyev tomonidan joriy yil 11 mart kuni o‘tkazilgan selektor yig‘ilishida berilgan topshiriqlar doirasida Sirdaryo viloyatida kimyo sanoatini rivojlantirish, yangi ishlab chiqarish quvvatlarini yo‘lga qo‘yish va eksportbop mahsulotlar ishlab chiqarishni kengaytirish masalalariga bag‘ishlandi.
Xususan, Oq oltin tumanida 100 gektar maydonda kimyo sanoatiga ixtisoslashgan yirik sanoat hududini tashkil etish, ushbu hududda 200 taga yaqin loyihalarni amalga oshirish masalalari TK China Group, China Ocean Capital, Tyanszin texnologiya universiteti sanoat markazi, Huajian Group zamonaviy arxitektura instituti hamda O‘zbekiston-Xitoy Savdo palatasi vakillari bilan atroflicha muhokama qilindi. Uchrashuvlarda zamonaviy texnologiyalar, infratuzilma, investitsiyalarni jalb qilish, yuqori qo‘shimcha qiymatli mahsulotlar ishlab chiqarish va yangi ish o‘rinlari yaratish bo‘yicha hamkorlik masalalari yuzasidan fikr almashildi.