Guliston tumanida agrar soha keskin tanqid ostida: fermer xo‘jaliklari faoliyati muhokama qilindi
2026-01-09 16:35:00 / Yangiliklar
Guliston tumanida fermer xo‘jaliklari faoliyati tahliliga bag‘ishlangan tanqidiy-tahliliy muhokama bo‘lib o‘tdi. Muhokamada Erkinjon Turdimov agrar sohadagi mavjud holat, yillar davomida to‘planib qolgan muammolar hamda amalga oshirilmagan rejalarni ochiq-oydin ko‘rsatib o‘tdi.
Yig‘ilishda fermer xo‘jaliklarining katta qismida yer va resurslardan samarasiz foydalanish, qarzdorliklarning keskin oshib ketishi, ayrim chorvachilik va bog‘dorchilik xo‘jaliklarida real ish faoliyati yo‘qligiga qaramasdan rasmiy hisobotlarda soxta ko‘rsatkichlar berilayotgani qatʼiy tanqid qilindi. Shuningdek, yaroqsiz holga kelib qolgan bog‘lar, o‘zlashtirilmagan yer maydonlari, sust olib borilayotgan irrigatsiya ishlari hamda suv tejovchi texnologiyalarni joriy etishdagi loqaydlik alohida qayd etildi.
Viloyat rahbari masʼul idoralar va fermerlar oldiga aniq vazifalar qo‘yib, qarzdorliklarni qisqa muddatda undirish, ishlamay turgan xo‘jaliklarni xatlovdan o‘tkazish, samarasiz yer ijara shartnomalarini bekor qilish bo‘yicha huquqiy choralarni kuchaytirish, shuningdek, 2026 yil hosili uchun rejalashtirilgan zamonaviy agrotexnologiyalarni so‘zda emas, amalda joriy etish yuzasidan qatʼiy ko‘rsatmalar berdi.