Sirdaryo vilоyati hоkimligi

Mehnat faxriysi Sherbo‘ta Pirimqulovning taʼkidlashicha, tashrifgacha tomorqachilikka munosabat sust bo‘lib, yer imkoniyatlari to‘liq ishga solinmagan edi. Tashrifdan keyin har bir xonadonda tomorqadan daromad olish bo‘yicha aniq vazifalar belgilab berildi va aholiga bir yilda bir necha hosil yetishtirish, bozor talabi yuqori mahsulot parvarishi yuzasidan mutaxassislar ko‘rsatmalar berishdi. Bu jarayonda faollar, agronomlar va jamoatchilik ishtirokida aholida yangi mehnat madaniyati shakllandi.
Prezident topshiriqlari asosida “Sayxunobod tajribasi” butun viloyat bo‘ylab amalga oshirilib, umumiy qiymati 229 mlrd so‘m bo‘lgan 7,5 ming mikroloyiha hayotga tatbiq etildi. Shuningdek, 2,3 ming ta xonadonga 37 mlrd so‘mlik qoramol, qo‘y, parranda va asalari uyalari tarqatildi, 25 mlrd so‘m mablag‘ asosida 1 100 ta mini-issiqxona barpo etildi. Gulbuloq mahallasidan Dilfuza Tojibevaning tajribasi bu ishlarning amaliy natijasini ko‘rsatadi: u “Xalq banki”dan 33 mln so‘m kredit olib, issiqxona tashkil etdi va uch marotaba hosil yetishtirib, oilaviy daromadini muntazam oshirayotir, shu bilan birga qo‘shni ayollarni ham ish bilan taʼminlamoqda.
2024 yil aprel–dekabr oylarida o‘tkazilgan uchrashuvlarda 3 217 ta murojaat ko‘rib chiqilib, ularning aksariyati ijobiy hal etildi. “Zarbdor tajribasi” doirasida 1 trln so‘mdan ortiq qiymatdagi loyihalar ishga tushirilib, 3 mingdan ziyod ish o‘rni yaratildi. “G‘ijduvon tajribasi” asosida ham o‘nlab loyihalar amalga oshirilib, minglab fuqarolar bandligi taʼminlandi. 2024 yilning o‘zida viloyatda 1 794 ta yangi tadbirkorlik subyekti tashkil etildi va turli yo‘nalishlarda o‘n minglab ish o‘rinlari yaratildi.
2025 yilda qabul qilingan qarorlarga muvofiq, 1 080 gektar yer maxsus sanoat zonalariga o‘tkazilib, joriy yil oxiriga qadar 2 mlrd dollarlik 62 ta yirik loyiha amalga oshirilishi rejalashtirilgan. 28–29 avgust kunlari Guliston shahrida o‘tgan “Sirdaryoda biznes qiling” xalqaro investitsiya forumida 20 dan ortiq davlatdan investorlar qatnashib, hududning investitsiyaviy salohiyati taqdim etildi. Shu doirada “Peng Sheng Wenren Zhigu” innovatsion sanoat klasteri qurilishi uchun poydevor qo‘yildi.
Ichimlik suvi, energiya va yo‘l-infratuzilma sohalarini yaxshilash bo‘yicha ham keng ko‘lamli ishlar amalga oshirilmoqda. Joriy yilda 161,6 km ichimlik va 36,5 km oqova suv tarmoqlarini qurish va taʼmirlash ko‘zda tutilgan. Guliston shahrida ichimlik suvi 24 soat uzluksiz rejimida yetkazilmoqda, Boyovut va Xovos tumanlarida 32 ming aholi ilk bor markazlashgan suv taʼminotiga ega bo‘ldi. Elektr taʼminotida ham 15 mingdan ziyod xonadon barqaror tarmoqqa ulandi. Yo‘llarda 215 km ichki yo‘l asfaltlanib, yana o‘nlab kilometrga shag‘al yotqizildi hamda bir nechta infratuzilma obyektlari taʼmirlandi.
Sog‘liqni saqlash sohasida tibbiyot muassasalari zamonaviy uskunalar bilan jihozlanib, 26 mlrd so‘mlik dori-darmon va jihozlar yetkazib berildi. 750 ta kompyuter taqdim etilib, elektron retsept va “Reimbursatsiya” tizimlari joriy etildi. Taʼlim sohasida 1 900 dan ortiq bitiruvchi xalqaro va milliy sertifikatlar oldi, o‘quvchilarning nufuzli oliy o‘quv yurtlariga grant asosida qabul qilinishi ortdi va pedagoglarning malakasi oshishi uchun yangi imkoniyatlar yaratildi.

Yoshlar siyosati doirasida “Yoshlar balansi” va “Yoshlar daftari” orqali minglab yigit-qizlar ish bilan taʼminlandi va ijtimoiy qo‘llab-quvvatlandi. Qoramolchilikda esa sanoatlashtirilgan yirik loyihalar amalga oshirilib, yillik sut va go‘sht ishlab chiqarish hajmi sezilarli oshmoqda.
— Buning barchasi Prezident tashrifi chog‘ida berilgan topshiriqlarning bosqichma-bosqich ijrosi, tizimli nazorat va jamoatchilik faolligi samarasidir, — deydi Sherbo‘ta Pirimqulov.
Eng muhimi,  bu o‘zgarishlar odamlar hayotida aks etmoqda. Yangiyerdan Sardobaga, Shirindan Xovosgacha  har bir xonadonda mehnat, islohot va natijaning uyg‘unligini ko‘rish mumkin.