Sirdaryo viloyati Sirdaryo tuman hokimligi

Dastlab, Sirdaryo tumanining “Xazina” va “Ishonch” mahallalari, Ulug‘ yo‘l ko‘chasida joylashgan noturar obyektlar bilan bog‘liq masalalar o‘rganildi.

Mazkur hududlarda jamoat ehtiyojlari uchun renovatsiya ishlarini amalga oshirish, infratuzilmani yaxshilash hamda zamonaviy shaharsozlik talablariga mos sharoitlarni yaratish maqsadida qator loyihalarni amalga oshirish rejalashtirilgan.

Ochiq muloqot davomida 24 ta noturar joy mulkdorlari, tadbirkorlar hamda aholi vakillari bilan uchrashilib, ularning fikr-mulohazalari, taklif va murojaatlari tinglandi.

Muloqotda mulkdorlarni qiziqtirayotgan masalalar atroflicha muhokama qilinib, ularning savollariga mas’ullar tomonidan tegishli tushuntirishlar berildi.

Shundan so‘ng, ishchi guruhning keyingi manzili “Bahor” va “Yoshlik” mahallalari hududi bo‘ldi.

Mazkur mahallalardan o‘tuvchi Guliston va Ishbilarmonlar ko‘chalarining jami 0,64 kilometr qismida qurilish-ta’mirlash ishlari amalga oshirilishi munosabati bilan yo‘l vaqtincha yopilishi ma’lum qilindi.

Loyiha doirasida hududda kanalizatsiya va ichimlik suvi tarmoqlari, avtomobil yo‘li, piyodalar yo‘laklari hamda lotoklar barpo etilishi rejalashtirilgan.

Tuman hokimi Azizbek Turdimurodov uchrashuvlar davomida har bir masalani joyida o‘rganish, fuqarolar va tadbirkorlarning qonuniy manfaatlarini inobatga olish, barcha jarayonlarni ochiq va qonuniy asosda olib borish muhimligini ta’kidladi.

Shuningdek, bildirilgan taklif va murojaatlarni belgilangan tartibda o‘rganish, mavjud muammolarni bartaraf etish hamda kelgusidagi ishlarni aholi va tadbirkorlar bilan hamkorlikda tashkil etish yuzasidan mas’ullarga tegishli topshiriqlar berildi.