Tajriba, muloqot va amaliy bilimlar — Media haftaligining uchinchi kuni markazida
2026-06-18 13:00:00 / Yangiliklar
Sirdaryoda davom etayotgan Media haftalikning uchinchi kuni axborot xizmati xodimlari hamda ijtimoiy tarmoq faollari uchun tashkil etilgan mazmunli trening mashg‘ulotlari bilan yodda qoldi.
Kun davomida media va kommunikatsiya sohasida katta tajribaga ega mutaxassislar o‘z faoliyatida sinovdan o‘tgan yondashuvlar, amaliy tajribalar va zamonaviy media makonidagi dolzarb masalalar yuzasidan ma’ruzalar bilan ishtirok etdilar.
Xususan, Anhor.uz muharriri Bobur Karimov sifatli kontent yaratish, auditoriya bilan samarali muloqot o‘rnatish va zamonaviy jurnalistikaning bugungi talablari haqida fikr yuritdi. Avtomobil yo‘llari qo‘mitasi Axborot xizmati rahbari Nilufar Jumayeva davlat organlari faoliyatini yoritishda ochiqlik, tezkorlik va professional kommunikatsiyaning ahamiyati bo‘yicha tajribasi bilan o‘rtoqlashdi. Davlat ekologik ekspertiza markazi Axborot xizmati rahbari Shahzoda Akramova esa ijtimoiy ahamiyatga ega mavzularni jamoatchilikka samarali yetkazish, axborot kampaniyalarini tashkil etish va media bilan ishlashning amaliy jihatlariga to‘xtaldi.
Treninglar davomida ishtirokchilar nafaqat yangi bilimlarga ega bo‘ldi, balki soha mutaxassislari bilan ochiq muloqot qilish, o‘zlarini qiziqtirgan savollarga javob olish va amaliy tavsiyalar bilan tanishish imkoniyatiga ham ega bo‘ldi.
Media haftaligi Sirdaryoda tajriba almashish, yangi g‘oyalarni muhokama qilish va media sohasidagi kasbiy mahoratni oshirish maydoni sifatida davom etmoqda.