Jizzax viloyati Sharof Rashidov tumani hokimligi

So‘nggi yillarda muhtaram Prezidentimiz Shavkat Miromonovich rahbarligida “Inson qadri uchun” ezgu g‘oyasi asosida hududlarni ijtimoiy - iqtisodiy rivojlantirish, aholi yashash sharoitlari hamda mahallalar qiyofasini tubdan yaxshilash, aholining muammolarni tezkorlik bilan hal etish, bir so‘z bilan aytganda xalqni rozi qilish borasida tizimli ishlar amalga oshirilmoqda.

Shuni ta’kidlash joizki, barcha idora va tashkilotlar hamda xalqimiz bilan birgalikda barcha sohalarda qonuniylikni mustahkamlash, jinoyatchilik va korrupsiyaga qarshi kurashish borasida muayyan ishlar amalga oshirildi.

Jumladan, amalga oshirilgan ishlar va ko‘rilgan choralar natijasida tumanimizda o‘tgan 9 oy davomida nomusga tegish, transport vositasini olib qochish, mulkni qasddan nobud qilish, hokimiyat vakiliga qarshilik ko‘rsatish, tuxmat, haqorat qilish kabi jinoyatlar sodir etilishiga yo‘l qo‘yilmagan bo‘lsa, bosqinchilik (1 ta) jinoyati o‘tgan davrga nisbatan barqaror saqalanib, o‘ta og‘ir jinoyatlar 20 tadan 15 taga yoki -25 foizga xususan, qotillik 3 tadan 2 taga yoki -33,3 foizga,  og‘ir tan jarohati yetkazish 4 tadan 3 taga yoki -25 foizga, talonchilik 2 tadan 1 taga yoki -50 foizga, bezorilik 6 tadan 1 taga yoki -83,3 foizga, o‘lim bilan bog‘liq yo‘l trasport xodisalari 24 tadan
21 taga yoki -12,5 foizga, oilaviy mayishiy zo‘ravonlik 4 tadan 3 taga yoki -25 foizga, xavf ostida qoldirish 2 tadan 1 taga yoki -50 foizga kamayishiga erishilgan.      

Biroq, yaratib berilgan imkoniyatlarga qaramasdan ayrim shaxslar noqonuniy yo‘llar bilan boylik orttirish, fuqarolarni aldash va boshqa vositalar orqali ularning mol - mulkini egallashga urinish jadal davom etmoqda.

Ayniqsa, internet tarmog‘idan foydalangan holda fuqarolarga har hil turdagi ta’sir o‘tkazish orqali hisob raqamlaridagi pul mablag‘larini egallash holatlari ko‘plab uchramoqda.

O‘tgan davrda tumanimizda sodir etilgan jami 456 ta jinoyatlardan 159 tasi yoki 34,8 foizi “kiber” jinoyatlar, shundan axborot texnologiyalaridan foydalanib 76 ta o‘g‘rilik, 81 ta firibgarlik, 2 ta boshqa holatlari bo‘yicha jinoyat ishlari qo‘zg‘atilgani buning yaqqol isboti.

So‘nggi vaqtlarda avj olayotgan zamonaviy jinoyatlardan, o‘tgan davrda nazoratsizlik hamda ta’lim-tarbiya ishlari to‘g‘ri tashkil etilmagani oqibatida 51 nafar yoshlar, 4 nafar voyaga yetmagan ya’ni maktab o‘quvchilari tomonidan jinoyat sodir etilganligi tashvishli holdir.

Yana bir achinarli holat, oilalardagi muhitni yaxshilash, ayniqsa xotin-qizlarning muammolarini o‘rganib hal etishga alohida e’tibor qaratilayotgan bir vaqtda 6 nafar xotin–qizlar tomonidan jinoyat sodir etildi.

Bundan tashqari, ayrim fuqarolarimizning beparvoligi oqibatida o‘zlariga tegishli mol–mulklar, texnika vositalari, chorva mollari yoki uy atroflarini qarovsiz qoldirgani yoki firgarlarning hiylasiga ishonib, o‘z mol-mulkini osongina ular qo‘liga topshirib qo‘yganliklari natijasida 18 ta o‘g‘rilik hamda 31 ta firbgarlik jinoyatlari qayd etilganidan ko‘rishimiz mumkin.

Muhtaram Yurtboshimiz tomonidan oilaviy qadriyatlarni yaxshilash, qo‘ni-qo‘shni, aholi o‘rtasida o‘zaro inoqlikni kuchaytirish borasida qator ishlar amalga oshirib kelinayotgan bir vaqtda, tumanimizda 2 ta qotillik, 3 ta og‘ir, 15 ta o‘rtacha og‘ir va 10 ta yengil tan jarohati yetkazish, 3 ta oilaviy maishiy zo‘ravonlik jinoyatlari qayd etilishi bu borada ishlarni yanada e’tiborli bo‘lishimiz va barcha kuchimizni bunga qaratishimiz lozimligidan dalolat beradi.

Shuningdek, yo‘llarda avtomashinalar soni kundan-kunga ortib, haydovchilarning mas’uliyatini oshirmoqda. Biroq, ayrim haydovchilar yo‘l belgilari, yo‘l qoidalariga rioya etmasdan o‘zboshimchalik bilan tezlikni oshirgani yoki haydovchilik guvohnomasi yo‘q fuqarolarga avtomashinani boshqarishga noqonuniy ruxsat bergani natijasida, jami 66 ta yo‘l transport hodisalari, shu jumladan o‘lim bilan bog‘liq 21 ta yo‘l-transport hodisasi sodir etilganligi ayanchli albatta.

Hurmatli yurtdoshlar!

Tumanimizda mas’ul idoralar va keng jamoatchilik bilan hamkorlikda quyidagi yangi tadbirlarni amalga oshirish yo‘lga qo‘yilganini ma’lum qilmoqchiman.

Jumladan, jinoyatlarning oldini olish, tumanda kriminogen vaziyat barqarorligini ta’minlash bo‘yicha kuchaytirilgan ish tartibi joriy etildi.

Shu maqsadda, mahallalardagi aholi gavjum joylar va ko‘chalarga 510 ta, ko‘p qavatli uylarning hovlilariga 10 ta, mahallalarning asosiy kirish - chiqish joylariga 152 ta, savdo markazlari va bozorlarga 10 ta, maktab va maktabgacha ta’lim tashkilotlari kirish-chiqish joylariga 82 ta, maktablarning ochiq sport maydonlariga 32 ta yuzni va avtoraqamlarni tanib oluvchi kameralar o‘rnatildi.

Mahallalardagi ko‘p qavatli va yakka tartibdagi 600 ga yaqin xonadonlar texnik qo‘riqloviga olindi, ko‘p qavatli uylarning kirish yo‘laklari oldiga 13 ta tashvish tugmalari o‘rnatildi. Shu kabi, mahallalarda 224 ta “namunaviy xavfsiz yo‘lak” va 82 ta “namunaviy xavfsiz ko‘cha”lar tashkil etildi.

Shu bilan birga, tazyiq va zo‘ravolikka uchragan xotin-qizlarning 481 nafariga “himoya orderlar berilib, ularning ishonchli himoyasi ta’minlandi.

Muqaddam sudlangan va ma’muriy nazoratda turgan 42 nafar shaxslarning muammolari o‘rganilishi hamda 12 nafarining ijtimoiy-maishiy muammolari ijobiy hal etildi. Natijada, mazkur tadbirlar kirminogen vaziyatni nazorat qilish, sodir etilgan jinoyatlar bo‘yicha shaxslarni tezkorlik bilan izlab topish hamda jinoyatga jazo muqarrarligi ta’minlashga salmoqli hissa qo‘shmoqda.

Bundan tashqari, sodir etilgan jinoyatlarni har kuni tezkor tahlil qilib, manzilli tadbirlarni belgilash, kunlik so‘rov va nazorat tizimi yo‘lga qo‘yildi. Shu bilan birgalikda, tergov sifati yanada oshiriladi, bu jarayonlarda inson huquq va erkinliklari poymol etilishiga yo‘l qo‘yilmaydi.

Bundan buyon korrupsiyaga qarshi kurashish borasida barcha davlat va nodavlat tuzilmalari, hokimliklar, keng jamoatchilik vakillari bilan hamkorlikni yangi bosqichga olib chiqamiz, jamiyatning barcha qatlamlari salohiyatini birlashtirish yo‘lidan boramiz. Jamiyatda korrupsiyaga qarshi murosasizlik muhitini shakllantirishning barcha choralarini ko‘ramiz.

Aziz vatandoshlar!

Albatta, tumanimizda jinoyatchilik va korrursiyaning oldini olishda, umuman barcha sohalarda qonuniylikni ta’minlashda, eng avvalo, mahalla ahli, yoshlar va nuroniy tashkilotlar faollariga, turli mehnat jamoalaridagi jonkuyar va vatanparvar insonlarga, ularning amaliy yordami va hamkorligiga tayanamiz.

Agarda har bir fuqaro tumanimizni jinoyatdan, korrupsiyadan holi, tinch va xavfsiz o‘lkaga aylantirishga o‘z hissasini qo‘shsa barchamiz bir tanu bir jon bo‘lib birgalikda kurashsak ko‘zlangan maqsadga albatta erishamiz.

Qadrli tumanimiz aholisi!

Jinoyatchilikning oldini olishda har birimiz hushyorlikni oshirishimiz, shubhali internet ilovalariga kirmaslik, notanish shaxslarga hisob raqamlar va tasdiqlash kodlarini bermaslik, mol-mulklarni qarovsiz qoldirmaslik lozimligi haqida yana bir bor ogohlantirib o‘tmoqchiman.

Qonunlarga qat’iy rioya etish, o‘zgalar huquqi, sha’ni va qadr qimmatini, mol-mulki daxlsizligini hurmat qilish, oila mustahkamligini ta’minlash, jamiyatda yurish-turish qoidalariga rioya qilish ham qonuniy ham insoniy burchimiz ekanini ham doimo yodda tutishimiz zarur.

Aziz yurtdoshlar, keling, barchamiz shu yo‘lda muhtaram Prezidentimizga yelkadosh bo‘lib, qonun ustuvor, adolat hukmron bo‘lgan jamiyatni birgalikda barpo etaylik!

KARIMOV JAXONGIR SHUKUROVICH

Sharof Rashidov tumani IIB boshlig‘i