Sharof Rashidov tumanida Yoshlar kuni munosabati bilan tantanali bayram tadbiri bo‘lib o‘tdi
2026-07-01 09:00:00 / Yangiliklar
Tadbirda Sharof Rashidov tumani hokimi Asilbek Ashurov, tuman tashkilot rahbarlari, davlat va jamoat tashkilotlari vakillari, nuroniylar, yoshlar hamda keng jamoatchilik ishtirok etdi.
Bayram tadbiri davomida umumta’lim maktablarini a’lo baholarga tamomlagan bitiruvchilarga oltin va kumush medallar tantanali ravishda topshirildi. Shuningdek, yoshlar siyosatini amalga oshirishda faol ishtirok etib kelayotgan yoshlar yetakchilari hamda turli sohalarda tashabbuskorligi va faolligi bilan ajralib turgan bir guruh yoshlar Sharof Rashidov tumani hokimi tomonidan taqdirlandi.
Tadbirning badiiy qismida Sharof Rashidov tumani Madaniyat bo‘limi ijodkorlari tomonidan tayyorlangan konsert dasturi namoyish etildi. Shuningdek, taniqli xonanda Ravshan Sobirov ishtirokidagi konsert dasturi bayram tantanalariga o‘zgacha mazmun bag‘ishladi.
Yoshlar kuni munosabati bilan o‘tkazilgan mazkur bayram tadbiri yoshlarning bilim va salohiyatini e’tirof etish, ularning yutuqlarini munosib rag‘batlantirish hamda yosh avlodni Vatanga sadoqat, yuksak maqsadlar sari intilish ruhida tarbiyalashga xizmat qiluvchi muhim tadbirlardan biri bo‘ldi.