Shahrisabz tuman hokimi Samad Xasanovning tabrik so‘zi!
2025-08-26 18:00:00 / Rahbariyatning bayonotlari va nutqlari
Assalomu alaykum, qadrli yurtdoshlar!
Muhtaram otaxon va onaxonlar!
Yurtimiz kelajagi bo‘lgan yoshlar!
Hurmatli mehmonlar!
Siz, azizlarni, xalqimizni bugungi ulug‘ ayyom bilan chin qalbimdan tabriklab, barchangizga o‘zimning yuksak hurmatim, ezgu tilaklarimni izhor etishdan baxtiyorman.
Qutlug‘ va unutilmas ayyom – mamlakatimiz Mustaqilligining 34 yilligi bilan barchangizni chin qalbimdan samimiy muborakbod etaman.
Ushbu shodiyonalar “VATAN UCHUN, MILLAT UCHUN, XALQ UCHUN ! ” degan shior ostida nishonlanmoqda.
Qadrli do‘stlar!
Mana shu hayajonli daqiqalarda hammamiz milliy istiqlolimiz naqadar bebaho ne’mat ekanini, uning tarixiy ahamiyatini yanada chuqur his etmoqdamiz.
Aynan mustaqillik tufayli milliy davlatchiligimiz qayta tiklandi. O‘zbekiston yangi tarixiy davrga qadam qo‘ydi. Aynan istiqlol tufayli Jahon hamjamiyatidan munosib o‘rin egalladik.
Bu bilan har qancha faxrlansak, g‘ururlansak arziydi.
Shunday qutlug‘ kunda O‘zbekiston mustaqilligi uchun kurashgan vatanparvar ajdodlarimiz xotirasini minnatdorlik bilan yodga olishimiz tabiiy, albatta.
Ular – o‘z xalqini taraqqiyot sari boshlagan jadid bobolarimiz, milliy ozodlik yo‘lida jon fido etgan ulug‘ ajdodlarimizdir. Ular – g‘oyat og‘ir sharoitda ham milliy istiqlol va hurriyat g‘oyalariga sodiq qolgan qahramonlarimizdir. Bugun ularning ezgu g‘oya va tamoyillariga tayanib, yangi hayot, yangi jamiyat poydevorini yaratmoqdamiz.
Bu fidoyi zotlarning nomlarini hech qachon unutmaymiz!
Ularning xotirasi qalbimizda, yuragimizda hamisha yashaydi!
Ruxsatingiz bilan, tumanimizda o‘tgan yillar davomida ijtimoiy, iqtisodiy, qurilish va obodonlashtirish yo‘nalishlarida amalga oshirilgan vazifalar to‘g‘risida gapirib o‘tsam.
MAKROIQTISODIY KO‘RSATKICHLAR bo‘yicha
Tumanimizning asosiy iqtisodiy ko‘rsatkichlarida, xususan, sanoat mahsulotlari ishlab chiqarish, qishloq xo‘jaligi, xizmatlar ko‘rsatish va qurilish sohasida yildan-yilga o‘sishga erishilib borilmoqda.
Xususan, 6 oylik natijalarimiz bo‘yicha sanoat mahsulotlari ishlab chiqarish hajmi 106,8 foizga
(602,2 mlrd so‘m), xizmat ko‘rsatish hajmi 112,3 foizga (692,5 mlrd so‘m), qishloq xo‘jaligi mahsulotlari hajmi 105,9 foizga (1,3 trln so‘m), qurilish ishlari hajmi
108,7 foizga (256,1 mlrd so‘m) o‘sishiga erishildi.
Bugungi geosiyosiy vaziyatda “muqobil yashil energiya” manbalaridan oqilona foydalanish, yangi energiya resurslarini joriy etish bo‘yicha Muhtaram yurtboshimizning olib borayotgan islohotlari zamirida tumanimizda ham yirik loyihalarni amalga oshirilayotganligi xalqimizning ulkan minnatdorchiligiga sabab bo‘lmoqda.
Tumanimizda qiymati 79 mln. dollarlik, quvvati soatiga 24 MVt bo‘lgan 3 ta: Tamshush, Chappasuv va Rabot mikro GESlari qurish ishlari olib borilmoqda.
Shuningdek, Angliya davlatida doimiy yashab kelayotgan vatandoshimiz tadbirkor Mavlyanov Sanjar tomonidan
“SD EKO” MCHJ tashkil etgan holda qiymati 12 mln. dollarlik, quvvati 3,5 MVt bo‘lgan 1 ta mikro GES va mehmonxona qurish ishlari olib borilmoqda.
Qolaversa, Agroturizmni rivojlantirish maqsadida “Uloch” mahallasidagi lalmi maydonlardan 520 gektar yer o‘zlashtirilib, dastlabki loyiha qiymati 94 mlrd so‘m bo‘lgan zamonaviy bog‘ va uzumzorlar hamda lavanda plantatsiyasi tashkil etildi, mehmonxona va restoranlar qurildi, mevalarni saralash, saqlash korxonasi va o‘quv markazi qurilmoqda.
Loyiha amalga oshirilishi natijasida 1 500 taga yaqin ish o‘rinlari yaratiladi. Hududda 7 500 tonna mahsulot yetishtirilib, yiliga 2,5 mln dollar eksport qilish imkoniyati yaratiladi.
Mazkur yirik loyihalarning ishga tushirilishi natijasida tumanimizning byudjet salohiyati ham sezilarli darajada o‘sganini ko‘rishimiz mumkin.
Xususan, 2021 yilda 77 mlrd. so‘m tushum tushirilgan bo‘lsa, 2024 yilda 113 mlrd. so‘m tushirilishiga erishilib, byudjet tushumlari +36,4 mlrd. so‘m ko‘payganini ko‘rishimiz mumkin.
Kelgusida ham tumanimizning barcha mavjud imkoniyatlari va zaxiralarimizni safarbar etgan holda iqtisodiy ko‘rsatkichlarimizda o‘sishni ta’minlab boramiz.
QISHLOQ XO‘JALIGI sohasida
Tumanimiz hududida fermer xo‘jaliklari va kasanachilar tomonidan 354 tonna PILLA xomashyosi yetishtirilib, undan qariyb 14 mlrd so‘m daromad olinishiga erishildi.
2025 yilda GʻALLA yetishtirish uchun 6 250 gektar yer maydoniga boshoqli don ekinlari ekilib, fermer xo‘jaliklarimiz tomonidan 85 syentnerdan 53 125 tonna don mahsulotlari yig‘ib olindi.
Shundan, 38 syentnerdan shartnoma asosida 24 ming tonna g‘alla topshirildi, qolgan 29 000 tonna g‘alla fermerlarning o‘ziga va ishchi-xodimlariga qo‘shimcha daromad sifatida qoldi.
Bundan tashqari, joriy yilda 3570 gektar yer maydoniga chigit qadalib, 15 351 tonna paxta hosilini terib olishni rejalashtirganmiz.
INVESTISIYA sohasida
Tumanimizda 2024-2025 yillarda qiymati qariyb
2,7 trln so‘m bo‘lgan 172 ga yaqin yirik va o‘rta loyihalarni amalga oshirish ishlari boshlab yuborildi.
Misol uchun, yirik loyihalarimizdan “Yuksalish Group” MCHJ tomonidan Birlashgan Arab Amirligi davlatining “BIGHATTI Holding” bilan hamkorlikda 20 gektar yer maydonida qiymati 34,0 mln. dollar bo‘lgan
3 400 ta xonadonli ko‘p qavatli uylar, xizmat ko‘rsatish ob’yektlari, bolalar bog‘chasi, o‘quv markaz va xususiy maktab qurish loyihasi bo‘yicha yer ajratilib qurilish ishlari boshlangan.
TURIZM sohasida
Shahrisabz tumanida Prezidentimiz Shavkat Mirziyoyevning bevosita tashabbuslari bilan turizmni rivojlantirish borasida keng ko‘lamli ishlar amalga oshirilmoqda.
Xabaringiz bor, Shahrisabz tumanining «Miraki», «Amir Temur», «Uloch» va «Polmon» mahalla fuqarolar yig‘inlari hududida zamonaviy xizmat ko‘rsatish majmualari va turizm infratuzilmasi ob’yektlarini, jumladan mehmonxonalar, mehmon uylari, sog‘lomlashtirish, savdo-ko‘ngilochar ob’yektlarini joylashtirishni nazarda tutuvchi master-reja loyihasi ishlab chiqildi hamda «Shahrisabz turistik markazi» tashkil etildi.
Master reja hududida qiymati 412 mln. dollar bo‘lgan 117 ta yirik va o‘rta yangi xizmat ko‘rsatish loyihalarini amalga oshirilishi hamda 2 700 ta doimiy ish o‘rinlari yaratilishi belgilab olingan.
Misol qilib aytadigan bo‘lsam,
1. “Miraki Hostel” MCHJ tomonidan qiymati 21,8 mln. dollar bo‘lgan 5 gektar yer maydonida 300 o‘rinli 4 qavatli mexmonxona hamda 300 o‘rinli 1 qavatli hostel, restoran, sport zal, bolalar maydonchalarida qurilish ishlari yakunlandi.
Loyiha doirasida 1 kunda o‘rtacha 600 nafar sayyohlar qabul qilinsa,
1 oyda 12 ming, 1 yilda 84 ming nafar tashrif buyuruvchilarga turizm xizmatlari ko‘rsatiladi.
2. “Miraki Mountains” MCHJ tomonidan qiymati 24,7 mln. dollar bo‘lgan 4,6 gektar 300 o‘rinli 4 qavatli mexmonxona va 5 ming kv.metrlik 2 qavatli savdo kompleks va restoran qurildi.
Loyiha doirasida 1 kunda o‘rtacha 300 nafar sayyohlar qabul qilinsa,
1 oyda 6 ming, 1 yilda 42 ming nafar tashrif buyuruvchilarga turizm xizmatlari ko‘rsatiladi.
3. “Miraki Ropeway” MCHJ tomonidan qiymati 12 mln. dollar bo‘lgan 2,1 km uzunlikdagi dor yo‘li, avtoturargoh va restoran tashkil qilindi.
Dor yo‘lida 20 ta 8 o‘rinli kabina bo‘lib, 1 soatda 660 nafar sayyohlarga xizmat qiladi. Loyiha doirasida 1 kunda o‘rtacha 4 ming nafar,
1 oyda 100 ming, 1 yilda 700 ming nafar tashrif buyuruvchilarga xizmat ko‘rsatiladi.
Bundan tashqari, hududda bo‘sh turgan yerlardan samarasiz foydalanayotgan o‘zimizning tadbirkorlar uchun jozibadorligi oshishiga, yangidan turizm loyihalarining ko‘payishiga ham o‘z ta’sirini ko‘rsatdi.
Misol uchun, “Hisorakgidroqurilish” MCHJ tomonidan 15 mln. dollar mablag‘ evaziga 8 gektar yer maydonida dam olish maskani kompleksi, 3,7 gektarga ekopark va “Miraki” hududiga tashrif buyuruvchilar uchun transport xizmatlarini ko‘rsatuvchi avtoturargoh tashkil etish rejalashtirilgan. Hozirda, ushbu loyiha doirasida 22 ta noan’anaviy kempinglar qurildi.
“Miraki” mahallasi tumanimizning tog‘li mahallalari uchun bo‘sag‘a hisoblanadi. “Miraki”da turizmning rivojlantirilganligi Suv ombori va uning atrofida, Hisorak, Sarchashma, Sayyod, Suvtushar, G‘elon, Ko‘l va
Hazrati Sulton kabi diqqatga sazovor joylarimizni turizm zanjiri sifatida bir biriga bog‘ladi.
Tumanimizda 22 yildan buyon ishlamasdan turgan aeroport faoliyati qayta yo‘lga qo‘yildi. Bu esa, tumanimizga bir haftada 4 marotaba aviaqatnovlar
(ATR-72 70 o‘rinli, L-410 17 o‘rinli) amalga oshirilib, mahalliy va xorijiy sayyohlarni jalb qilmoqda.
Bu ham, Shahrisabz nomining nafaqat respublikamiz balki qo‘shni davlatlarda ham kengayishiga, tumanimizning rivojlanishiga turtki berdi.
Bu yerda hozirda, turizm bilan birgalikda madaniy, ijtimoiy-iqtisodiy va sport tadbirlari o‘tkazilmoqda.
Bundan tashqari, "Oqdaryo daryosi" qirg‘og‘ida
23 mlrd. so‘mlik mahalliy byudjet mablag‘lari hisobidan 10 km uzunlikda salomatlik, piyodalar va velo yo‘laklar qurildi. Uning atrofida 50 ta ko‘chma savdo ob’yektlari tashkil etildi.
Yo‘lak bo‘ylab turizm xizmat ko‘rsatish turlari tashkil etilib, savdo do‘konlari, muzqaymoq va kofe sotish,
rasm tushish, elektrokarda sayr qilish, velosiped va elektrosamokatlar ijarasi shuningdek, hududda WI-FI zonasi tashkil etildi.
Mazkur yo‘lak “Miraki” mahallasidagi turizm ob’yektlarini ham bir-biriga uzviy bog‘lab tashrif buyuruvchilar va aholiga qulaylik yaratadi va sayyohlar uchun kunduz va kechki paytlari sayr qilish, tabiatni tomosha qilish imkonini beradi.
Joriy yilda Prezidentimizning Qashqadaryo viloyatiga tashrifi davomida Shahrisabz tumanida amalga oshirilgan ishlar yuksak bahoga sazovor bo‘lgani, bu borada barcha tumanlarga namuna sifatida ko‘rsatilib, o‘z ko‘zlari bilan ko‘rishlari kerakligi ta’kidlangani - biz uchun katta e’tirofdir.
Ushbu jarayonlarda barcha korxona xodimlari,
keng jamoatchilik, “mahalla yettiligi”, obodonlashtirish, yo‘l-qurilish, elektr ta’minoti, ichimlik suvi tizimi va boshqa ko‘plab soha xodimlarining fidokorona mehnati mujassam. Ularning mehnatini alohida ta’kidlab, samimiy minnatdorchilik bildiraman.
Miraki hududida boshlangan ishlar – bu hali boshlanishi, oldinda yanada ulkan rejalar va loyihalar amalga oshirilishi kutilmoqda. Shubhasiz, bu ishlarning barchasi Shahrisabz tumanining ravnaqi va kelajagi uchun xizmat qiladi.
Bundan tashqari, Shahrisabz tumanida Rossiyalik investorlar bilan birgalikda loyiha qiymati
300 mln dollar bo‘lgan tog‘li G‘elon va Sarchashma qishloqlari o‘rtasida 3 000 gektar umummavsumiy tog‘-chang‘i kompleksi tashkil etish ishlari boshlanmoqda.
Natijada bir vaqtning o‘zida 7 000 nafar mahalliy va xorijiy sayyohlarni qabul qilish imkoni yaratiladi.
Bundan tashqari, tashrif buyuruvchilarga sifatli turizm xizmatlarini ko‘rsatish maqsadida kadrlarni tayyorlash, tashrif buyuruvchilarga sifatli turizm xizmatlarini ko‘rsatish yuzasidan yoshlarni o‘qitish va o‘rgatish rejalashtirilgan.
TADBIRKORLIK va SANOAT sohasida
Tumanimizda tadbirkorlikni rivojlantirishda mavjud imkoniyatlarimizdan tashqari, qo‘shimcha imkoniyatlarimizni ham aniqlab, ulardan foydalanishni yo‘lga qo‘ymoqdamiz. Bu esa, tadbirkorlarimiz sonini ko‘payishida o‘zining samarasini bermoqda.
2019 yilda tumanimizda 937 ta tadbirkorlik sub’yektlari faoliyat yuritgan bo‘lsa, 2025 yilga kelib 3 199 ta tadbirkorlik sub’yektlari faoliyat yuritmoqda. Ya’ni, oxirgi 6 yillikda tadbirkorlik sub’yektlari 2 263 taga oshdi yoki 3,4 barobarga ko‘paydi.
Muhtaram Prezidentimiz qabul qilgan qaror natijasida tadbirkorlarni har tomonlama qo‘llab-quvvatlash va ularga yetarlicha shart-sharoitlar yaratib berayotgan imkoniyatlari asosida tumanimizda oxirgi 4 yil ichida 12,5 gektar yer maydonida 4 ta kichik va yoshlar sanoat zonalari tashkil etilishi ham katta rol o‘ynamoqda.
Tumanimizda jami 325 mlrd. so‘mlik 41 ta sanoat loyihalari amalga oshirilib, 610 ta ish o‘rinlari yaratiladi.
Natijada, sanoat korxonalarimiz soni 188 tadan 350 taga ko‘paydi. Bunda, tumanimizda yangi turdagi sanoat mahsulotlari: mebelchilik, polietilin quvurlar,
tekstil-trikotaj, yashil energiya ishlab chiqarilishi yo‘lga qo‘yildi.
Misol uchun:
- “Oqsaroy tekstil” MCHJ tomonidan 2021-2023 yillarda umumiy qiymati 77 mln. dollar xorijiy kredit hisobiga sun’iy tola aralashmali ip-kalava va mato ishlab chiqarish bo‘yicha
3 ta fabrikalar ishga tushirilib, 1 000 dan ortiq yangi ish o‘rinlari yaratildi.
QURILISH sohasida
Oxirgi 3 yillik davomida tumanimizdagi 203 ta ijtimoiy-iqtisodiy ob’yektlarda qurish va ta’mirlash ishlari olib borilib, jami 613 mlrd. so‘m mablag‘ yo‘naltirildi.
Shundan, joriy yilning o‘zida 42 ta ob’yektlarni qurish va ta’mirlash ishlari uchun jami 253 mlrd. so‘m mablag‘ ajratilib, bugungi kunda jadallik bilan qurilish ishlari amalga oshirilmoqda.
Bundan tashqari, fuqarolarimiz ham mahallalarni obodonlashtirish va infratuzilma ob’yektlarini yaxshilashda o‘z faolliklarini ko‘rsatishmoqda. Birgina, “OPEN BYUDJET” dasturi doirasida 2021-2025 yillarda 55 ta mahallalarda 68 ta tashabbuslari g‘olib dyeb topilib, jamg‘arma tomonidan 73 mlrd. 325 mln. so‘m mablag‘ moliyalashtirilib, qurilish-ta’mirlash ishlari bajarildi.
MAKTABGACHA VA MAKTAB TA’LIMI sohasida
Tumanimizda 86 ta umumta’lim maktablari hamda davlat, xususiy va oilaviy 301 ta maktabgacha ta’lim tashkilotlari faoliyat olib bormoqda. Boshlanayotgan
2025-2026 o‘quv yilidan umumta’lim maktablari soni 86 taga yetkazildi.
2023-2024 o‘quv yilida 2 424 nafar bitiruvchidan
1 091 nafari, ya’ni 45 foizi Oliy o‘quv yurti talabasi bo‘lgan bo‘lsa, 2024-2025 o‘quv yilida 2 258 nafar o‘quvchidan 1 035 nafari, ya’ni 46,4 foizi oliy ta’lim muassasalari talabasi bo‘lishdi.
Birgina, tumandagi ixtisoslashtirilgan maktabdan
29 nafar 28 nafari Davlat oliy ta’lim muasssalariga,
1 nafari Webster universitetiga qabul qilingan.
2024-2025 o‘quv yilida 11-sinf o‘quvchilaridan
16 nafari oltin va 14 nafar kumush medallar bilan tugatdi.
11-sinf bitiruvchilaridan 150 nafari 6,7 % muddatidan oldin oliy o‘quv yurti talabasi bo‘lish imkoniyatini qo‘lga kiritdi.
Tumandagi umumiy o‘rta ta’lim maktablarida faoliyat ko‘rsatayotgan 415 nafar o‘qituvchilar milliy va xalqaro sertifikatlarga egadir.
SPORT bo‘yicha
Sport sohasida yaratib berilgan imkoniyatlar natijasini tumanimiz yoshlarining erishgan yutuqlarida ham o‘z aksini topmoqda.
Yoshlarimizdan “Chorshanbe” mahallasida yashovchi Aliyeva Dilnura Bohromjon qizi, Yoshlarimizdan “Chorshanbe” mahallasida yashovchi Aliyeva Dilnura Bohromjon qizi, “Nurafshon” mahallasidan Tog‘ayev Sherzod Yo‘ldosh o‘g‘li, “Chorshanbe” mahallasidan Xushvaqtov Xushnud Xurshid o‘g‘li Osiyo va O‘zbekiston chempionatlarida yuqori o‘rinlarni egallab, Vatanimiz bayrog‘ini yuksaklarga ko‘tarishmoqda.
Ularga keyingi musobaqalarda ham omad tilab qolamiz hamda yoshlarimizning bu muvaffaqiyatli natijalarga erishgani bilan ota-onalari va ustozlariga o‘z minnatdorchiligimizni bildirib qolamiz.
Aziz va muhtaram vatandoshlar!
Fursatdan foydalanib, islohotlarimizni faol qo‘llab-quvvatlab, ularni amalga oshirishda doimo fidoyilik ko‘rsatib kelayotgan mehnatkash, olijanob va bag‘rikeng tumanimiz aholisiga chin dildan minnatdorlik bildiraman.
Siz, azizlarni, butun tumanimiz xalqini davlatimiz mustaqilligining o‘ttiz to‘rt yillik bayrami bilan yana bir bor chin qalbimdan tabriklayman.
Yurtning kuchi – birlikda, qadri esa tinchlikdadir!
Ezgu orzu-niyatlarimiz amalga oshsin!
Yaratganning o‘zi barchamizni panohida asrasin!
Yurtimiz tinch, xalqimiz omon, Mustaqilligimiz abadiy bo‘lsin!