Uchrashuvda Xitoyning Szyansu provinsiyasi, Suqian shahri, Shuyang okrugi va iqtisodiy-texnologik rivojlanish zonasi vakillari, shuningdek, “Vostosun Group Uc” MCHJ bosh direktori Gao Weihua ishtirok etdi. Muloqot davomida gul va ko‘chat mahsulotlarini yetkazib berish, ularni Sergeli tumanidagi mavjud bo‘sh yer maydonlarida yetishtirish va sotishni yo‘lga qo‘yish masalalari muhokama qilindi. Shuningdek, mebel mahsulotlarini import qilish yoki “Yangi avlod” erkin iqtisodiy zonasida Xitoy kapitali ishtirokida ishlab chiqarish korxonasini tashkil etish, yog‘ochdan tayyorlanadigan turli suvenir mahsulotlarini olib kelish hamda hamkorlikda ishlab chiqarish imkoniyatlari ko‘rib chiqildi. Tuman hokimligi tomonidan xorijiy investorlar bilan hamkorlik qilishga tayyorlik bildirilib, mamlakatimizda tadbirkorlar va investorlar uchun yaratilgan shart-sharoitlar, erkin iqtisodiy zonalarda amaldagi qonunchilik asosida taqdim etiladigan soliq va bojxona imtiyozlari haqida ma’lumot berildi. Mazkur uchrashuv Sergeli tumanida investitsiya loyihalarini rivojlantirish, yangi ishlab chiqarish yo‘nalishlarini yo‘lga qo‘yish va o‘zaro manfaatli xalqaro hamkorlikni kengaytirish yo‘lidagi muhim qadamlardan biri bo‘ldi.