Aholi murojaati e’tiborda: Sergeli tumani hokimi «Qo‘shqo‘rg‘on» MFYdagi yo‘l masalasini joyida o‘rgandi
2026-08-19 11:30:00 / Yangiliklar
O‘zbekiston Respublikasi Prezidentining Virtual qabulxonasi orqali «Qo‘shqo‘rg‘on» MFY, 4-tor 143A-uyda yashovchi fuqarodan mahalladagi mavjud yo‘lni saqlab qolish va aholi harakatlanishini ta’minlash yuzasidan jamoaviy murojaat kelib tushgan edi.
Murojaatda qayd etilishicha, 268- va 277-sonli maktablar hamda yangi qurilayotgan binolar oralig‘idagi 2018-yildan beri foydalanib kelinayotgan yo‘l kadastr hujjatlari bo‘yicha maktab balansida ekanligi sababli yopilishi ko‘zda tutilgan. Bu esa 30 dan ortiq xonadon aholisi, shuningdek, tez yordam va yong‘in xavfsizligi kabi favqulodda xizmatlar avtomobillarining kirib-chiqishi uchun jiddiy qiyinchilik keltirib chiqarishi ta’kidlangan.
👍 Ushbu masalani atroflicha o‘rganish va mahalla aholisi uchun xavfsiz hamda munosib sharoit yaratish maqsadida Sergeli tumani hokimi Davron Ismatov hududga shaxsan tashrif buyurdi. Tuman hokimi joyida vaziyat bilan yaqindan tanishib, mahalla faollari bilan ochiq muloqot o‘tkazdi hamda yo‘lning holati va muqobil o‘tish joylarini ko‘zdan kechirdi.
O‘rganish yakunlari bo‘yicha aholining xavfsizligi va munosib turmush sharoitini ta’minlash asosiy mezon ekani ta’kidlanib, masalani fuqarolar manfaatini to‘liq inobatga olgan holda ijobiy hal etish yuzasidan mutasaddi tashkilot va bo‘lim rahbarlariga aniq topshiriqlar berildi.
