Samarqand viloyati hokimligi

Samarqand shahrida “Mehnat faxriysi” ko‘krak nishonlarini topshirishga bag‘ishlangan tadbir bo‘lib o‘tdi. 

Unda fidoyi, tashabbuskor hamda hayot yo‘li yoshlar uchun ibrat bo‘ladigan nuroniylar mehnati munosib e’tirof etildi.

Keksalarni e’zozlash, ularga hurmat va ehtirom ko‘rsatish xalqimizga xos azaliy qadriyatlardan hisoblanadi. Bugungi kunda bu an’ana yangi mazmun bilan boyib, muhim ahamiyatga ega tarbiya maktabiga aylanib bormoqda.

“Nuroniy” jamg‘armasi Vasiylik Kengashi qaroriga ko‘ra, mamlakatimiz iqtisodiy, ijtimoiy va madaniy sohalarida ko‘p yillar davomida samarali mehnat qilgan faxriylar “Mehnat faxriysi” ko‘krak nishonlari bilan taqdirlandilar. Ular orasida 78 nafar samarqandlik nuroniylar ham bor.

Tadbirda viloyat hokimi Adiz Boboyev ishtirok etib, faxriylarni qutladi. Viloyat rahbari o‘z so‘zida nuroniylarning hayot tajribasi va mehnati yoshlar uchun namuna ekanini ta’kidlab, ularga minnatdorlik bildirdi.

- Nuroniylarimiz barcha sohalarda faollik ko‘rsatib, jamiyat taraqqiyotiga hissa qo‘shib kelmoqdalar. Ularning faolligi, duolari barcha ishlarimizga unum, baraka bag‘ishlaydi,- dedi Adiz Boboyev.

Tadbirda bu kabi tashabbuslar keksalarga bo‘lgan e’tibor va ehtiromning yorqin ifodasi ekanligi ta’kidlandi.