Samarqand viloyati hokimligi

Assalomu alaykum, hurmatli jurnalistlar va muharrirlar!

Qadrli ommaviy axborot vositalari vakillari!

Aziz matbaachilar, noshirlar, axborot xizmati xodimlari, blogerlar va soha faxriylari!

Barchangizni 27 iyun – Matbuot va ommaviy axborot vositalari xodimlari kuni bilan Samarqand viloyati jamoatchiligi nomidan samimiy muborakbod etaman.

Sizlarga mustahkam sog‘liq, xonadonlaringizga fayzu baraka, ijodiy ilhom va ulkan muvaffaqiyatlar tilayman.

Matbuot va axborot sohasi har qanday jamiyat taraqqiyotining muhim ustunlaridan biri hisoblanadi. Chunki axborot insonlarni birlashtiradi, jamiyatni uyg‘otadi, odamlarni ezgu maqsadlar sari chorlaydi. Jurnalist esa voqelik va jamoatchilik o‘rtasidagi ishonchli ko‘prikdir.

Yangi O‘zbekistonda ochiqlik, oshkoralik va so‘z erkinligini ta’minlash davlat siyosatining ustuvor yo‘nalishlaridan biriga aylandi. Davlat organlari va tashkilotlari faoliyatining ochiqligini ta’minlash, jamoatchilik nazoratini kuchaytirish, aholini xolis va tezkor axborot bilan ta’minlash borasida keng ko‘lamli ishlar amalga oshirilmoqda.

Muhtaram Prezidentimiz tomonidan ommaviy axborot vositalari faoliyatini qo‘llab-quvvatlash, jurnalistlarning huquq va manfaatlarini himoya qilish, axborot sohasini zamonaviy talablar asosida rivojlantirishga qaratilgan qator tashabbuslar ilgari surilmoqda. Bu esa mamlakatimiz media makonining yanada taraqqiy etishi uchun mustahkam asos bo‘lib xizmat qilmoqda.

Hurmatli tadbir qatnashchilari!

Samarqand azaldan ilm-fan, ma’rifat va madaniyat markazi sifatida tanilgan. Bugun ham viloyatimizda axborot sohasi izchil rivojlanib bormoqda. Samarqand viloyatida 34 ta gazeta va jurnal nashr etilmoqda.

Viloyatimiz aholisining axborotga bo‘lgan ehtiyojini qondirishda “Zarafshon”, “Samarkandskiy vestnik”, “Ovozi Samarqand” gazetalari hamda shahar va tuman nashrlari muhim o‘rin tutadi. Ularning har bir sonida jahonda, yurtimiz va viloyatimiz hayotidagi muhim voqealar, amalga oshirilayotgan islohotlar, odamlarning hayoti va tashvishlari o‘z aksini topmoqda.

Bugun axborotni tezkor va qulay shaklda yetkazishda internet nashrlarining ham ahamiyati ortib bormoqda. Samarqand viloyatida davlat ro‘yxatidan o‘tgan 10 ta internet nashri faoliyat olib borayotgani bu sohada ham sezilarli o‘sish kuzatilayotganidan dalolat beradi.

Axborot sohasining yana bir muhim bo‘g‘ini bo‘lgan noshirlik va matbaachilik yo‘nalishida ham salmoqli ishlar amalga oshirilmoqda. Viloyatimizda 8 ta xususiy nashriyot faoliyat ko‘rsatib, bir yilning o‘zida yuzlab nomdagi kitoblarni chop etmoqda. Bu esa kitobxonlik madaniyatini yuksaltirish, milliy ma’naviyatimizni boyitishga xizmat qilmoqda.

Shu bilan birga, Samarqandda faoliyat yuritayotgan zamonaviy bosmaxonalar nafaqat viloyatimiz, balki qo‘shni hududlardagi ommaviy axborot vositalarini ham bosma mahsulotlar bilan ta’minlab kelmoqda.

Televidenie va radio bugungi kunda eng ta’sirchan axborot vositalaridan biri bo‘lib qolmoqda. Samarqand viloyati teleradiokanali jamoasi viloyatimiz hayotidagi muhim voqealarni tezkor va xolis yoritish, aholini dolzarb xabarlar bilan ta’minlash yo‘lida fidokorona mehnat qilib kelmoqda.

Teleradiokanalning ijodiy va texnik xodimlari har kuni 18 soat davom etadigan efir orqali yurtdoshlarimizni mamlakatimizda va viloyatimizda amalga oshirilayotgan islohotlar, yangiliklar va muhim jarayonlar bilan tanishtirmoqda. Buning ortida katta mehnat, yuksak mas’uliyat va kasbga sadoqat mujassam.

Yaqinda bir guruh mutaxassislar bilan birga viloyat teleradiokanali faoliyati bilan tanishdik. Albatta, teleradio ijodkorlari bundan-da yaxshiroq sharoitda ishlashlari kerak, degan xulosaga keldik. Shuning uchun tegishli mutasaddilarga televidenie binosini ta’mirlash, ayniqsa studiyalarni zamon talabiga mos qilib jihozlash bo‘yicha ko‘rsatma berdim.

Shu kunlarda reja va hisob-kitob ishlari olib borilmoqda. Nasib bo‘lsa, yaqin vaqtlarda teleradiokanal butunlay boshqacha qiyofaga kiradi, ijodkorlar uchun esa hamma sharoit muhayyo etiladi.

Qadrli jurnalistlar!

Mamnuniyat bilan ta’kidlamoqchiman, mustaqillik yillarida Samarqand jurnalistika maktabi munosib natijalarga erishdi. Viloyatimiz jurnalistlarining ko‘plab davlat mukofotlari va nufuzli tanlovlardagi g‘alabalari barchamiz uchun faxr manbaidir.

Xususan, shu paytgacha samarqandlik jurnalistlarning to‘qqiz nafari “O‘zbekistonda xizmat ko‘rsatgan jurnalist” faxriy unvoni bilan taqdirlangan bo‘lsa, “Oltin qalam” xalqaro milliy mukofotining turli nominatsiyalarida erishilgan yutuqlar ham soha vakillarining yuksak salohiyatidan dalolat beradi.

Yaxshi xabarning qo‘sh qanoti bor, deyishadi. Shu kunlarda ham soha haqida, ushbu kasbning fidoyi xodimlari to‘g‘risida biri boshqasidan haroratli bo‘lgan yaxshi xabarlar tarqalmoqda.

O‘zbekiston Milliy teleradiokompaniyasi tomonidan e’lon qilingan “MTRK Award” media mukofoti” an’anaviy ko‘rik-tanlovida “Samarqand” radiokanali jamoasi “Xabarlar” dasturi bilan g‘olib deb topildi.

Kuni kecha O‘zbekiston Respublikasi Prezidentining “Matbuot va ommaviy axborot vositalari xodimlari kuni munosabati bilan soha xodimlaridan bir guruhini mukofotlash to‘g‘risida”dagi Farmoni e’lon qilindi.

Mazkur farmonga ko‘ra, “Zarafshon” va “Samarkandskiy vestnik” gazetalari tahririyati katta musahhihi Rim Munirovich Mustakimov “Do‘stlik” ordeni bilan taqdirlandi. Fursatdan foydalanib, Rim akani yana bir bor tabriklaymiz.

Biroz oldin “Oltin qalam” xalqaro Milliy mukofoti haqida gapirib o‘tgan edim. Bugun yana bir xushxabar oldik – samarqandlik ijodkorlar orasida ushbu xalqaro Milliy mukofot sovrindorlari yana bir kishiga ko‘paydi.

Viloyat “Ovozi Samarqand” gazetasi muxbiri Dilafro‘z Obloqulova “Oltin qalam” Milliy mukofoti uchun xalqaro tanlovida sovrindorlar qatoridan joy oldi.

Hurmatli tadbir ishtirokchilari!

Bugungi kunda axborot xizmati tizimi davlat va jamiyat o‘rtasidagi muhim muloqot maydoniga aylanmoqda. Viloyatimizdagi 80 nafar axborot xizmati vakillari fuqarolarni o‘z vaqtida va ishonchli ma’lumotlar bilan ta’minlash, davlat organlari faoliyatining ochiqligini ta’minlashda munosib hissa qo‘shib kelmoqda.

Ayniqsa, aholini qiynayotgan muammolarni o‘rganish, ularning yechimiga ko‘maklashish, murojaatlarga tezkor munosabat bildirish borasida jurnalistlar va axborot xizmati xodimlarining hamkorligi muhim ahamiyat kasb etmoqda.

So‘nggi yillarda blogerlik harakati ham jamiyat hayotining ajralmas qismiga aylandi. Faol va tashabbuskor blogerlar jamoatchilik fikrini shakllantirish, dolzarb masalalarni ko‘tarish va aholi bilan muloqotni kuchaytirishga munosib hissa qo‘shmoqda.

Aziz jurnalistlar!

Sizlar nafaqat voqealarni yoritasiz, balki jamiyat kayfiyatini his qilasiz, odamlarning dardu tashvishlarini eshitasiz, ularning orzu-intilishlarini xalqimizga va mas’ullarga tezkor ravishda yetkazasiz. Shu bois jurnalist kasbi har doim katta mas’uliyat, xolislik va fidoyilikni talab qiladi.

Samarqand viloyatida amalga oshirilayotgan keng ko‘lamli bunyodkorlik ishlari, yangi investitsiya loyihalari, zamonaviy sanoat korxonalari, ta’lim va tibbiyot muassasalari, madaniy va sport ob’ektlarining barpo etilishi haqida keng jamoatchilikni xabardor qilishda sizlarning mehnatingiz beqiyosdir.

Biz har doim jurnalistlarning tanqidiy va xolis fikrlarini qadrlaymiz. Chunki haqqoniy tanqid taraqqiyotga, muammolarni bartaraf etishga va ish samaradorligini oshirishga xizmat qiladi.

Keyingi yillarda jurnalistlar, axborot xizmati xodimlari va blogerlarning bilim va ko‘nikmalarini oshirish maqsadida turli o‘quv seminarlari, davra suhbatlari, press-turlar va amaliy tadbirlar tashkil etilmoqda. Bu ishlar kelgusida ham davom ettiriladi.

Bugungi bayram arafasida o‘tkazilgan press-turlar, intellektual o‘yinlar va sport musobaqalari ham media hamjamiyatining yanada jipslashuviga xizmat qilmoqda.

Muhtaram bayram qatnashchilari!

Fursatdan foydalanib, viloyatimiz hayotini xolis yoritib kelayotgan barcha jurnalistlar, muharrirlar, fotomuxbirlar, operatorlar, matbaa va nashriyot xodimlari, matbuot kotiblari, blogerlar va axborot sohasining barcha fidoyilariga samimiy minnatdorchilik bildiraman.

Sizlarning mehnatingiz tufayli xalqimiz mamlakatimizda kechayotgan ulkan o‘zgarishlardan xabardor bo‘lmoqda. Sizlar haqiqatni izlash, xolislikni ta’minlash va jamoatchilik manfaatlarini himoya qilishdek sharafli vazifani sidqidildan bajarmoqdasiz.

Yana bir bor barchangizni kasb bayramingiz bilan chin qalbimdan tabriklayman.

Sizlarga mustahkam sog‘liq, oilaviy baxt-saodat, ijodiy zafarlar, yangi g‘oya va tashabbuslar, mamlakatimiz taraqqiyoti yo‘lidagi sharafli faoliyatingizda ulkan muvaffaqiyatlar tilayman.

Bayramingiz muborak bo‘lsin!

E’tiboringiz uchun rahmat.