Samarqand viloyati hokimi Boboyev Adiz Muzafarovichning bahorning eng go‘zal bayrami, ezgu niyatlarimizning timsoli bo‘lgan "NAVRO‘Z" bayramiga bag‘ishlangan tabrik so‘zi
2026-03-21 21:00:00 / Rahbariyatning bayonotlari va nutqlari
Assalomu alaykum, aziz samarqandliklar,
qadrli mehmonlar, tantana ishtirokchilari!
Sizlarni va Sizlar orqali butun viloyatimiz ahlini hamda aziz mehmonlarimizni bahorning eng go‘zal bayrami, ezgu niyatlarimizning timsoli bo‘lgan NAVRO‘ZI OLAM bilan chin qalbimdan tabriklayman!
NAVRO‘Z necha asrlarki xalqimizning umrboqiy an’analari mujassam bo‘lgan yasharish va uyg‘onish,
mehr-oqibat, saxovat va hamjihatlik ayyomi sifatida keng nishonlanib kelinmoqda!
Bu bayram barcha davrlarda milliy qadriyatlarimizni, o‘zligimizni va an’analarimizni o‘zida mujassam etgani bilan qadrli bo‘lib kelgan. Yil bo‘yi orziqib kutilgan. Ulug‘ ajdodlarimiz asarlarida ham “NAVRO‘Z” falsafasi, uning mohiyati madh etilgan, keng targ‘ib qilingan.
Xususan, buyuk alloma Hakim at-Termiziy o‘zining “Navro‘znoma” asarida “Navro‘z – bu shunday kunki, unda zamin uyg‘onib, tabiat yangi hayotga kiradi. Odamlar ham bu kunni xayr-saxovat, poklik va shodlik bilan qarshi olsalar, yil barakali bo‘ladi”, deb yozgan. Bu esa ushbu ayyomni ko‘tarinki kayfiyatda qarshi olsak, yilimiz qut-barakali bo‘lishidan dalolat beradi.
Bugun Samarqand ahliga ana shunday baxt nasib etib turibdi, desak mubolag‘a bo‘lmaydi. Chunki bayram arafasida viloyatimizga hurmatli Prezidentimiz Shavkat Mirziyoev tashrif buyurib, Samarqandni yanada rivojlantirish va yurtimizdagi namunali hududga aylantirish bo‘yicha navbatdagi vazifalarni belgilab berdilar.
Davlatimiz Rahbari Samarqand ishsizlik va kambag‘allikdan xoli, investitsiya va eksport masalalarida boshqalarga namuna bo‘lishi kerakligini qayd etdilar. Buning uchun zarur resurs, mablag‘lar ajratilishi aytildi. Xususan, mahallalar infratuzilmasini yaxshilash uchun 100 mln. Dollar berildi. Umuman, bu yil viloyatimizga barcha manbalar hisobidan 11 trln. so‘m mablag‘ yo‘naltirilmoqda. Tadbirkorlarga kredit uchun yana 18 trln. so‘m resurs berilmoqda.
Bu imkoniyatlar asosida oldimizga kamida 9 foizli iqtisodiy o‘sish qilib, yalpi hududiy mahsulotni
144 trln. so‘mdan oshirish, 3 mlrd. dollar xorijiy investitsiya jalb etib, eksportni 1,2 mlrd. dollarga yetkazish vazifasi qo‘yildi. Nasib etsa, bu vazifalarni sizlar bilan birga bajarib, viloyatimizni chinakam namunali hududga aylantiramiz, hurmatli Prezidentimiz va xalqimiz oldida yuzimiz yorug‘ bo‘ladi.
Aziz do‘stlar!
Davlatimiz Rahbarining ushbu tashriflari davomida buyuk muhaddis bobomiz Imom Buxoriy majmuasi tantanali ochildi va kuni kecha ushbu muazzam maskanda
50 ming nafarga yaqin mo‘min-musulmonlar ishtirokida Ramazon hayiti o‘qildi. Bu ushbu majmuaning ziyorat turizmi uchun qanchalik katta imkoniyat va salohiyatga ega ekanligini bildiradi.
Samarqand shahridagi O‘zbekiston ko‘chasida Yoshlar kreativ shaharchasi va jamoat bog‘i foydalanishga topshirilgani ham barchamiz uchun quvonchli voqea bo‘ldi. Bu bog‘da yoshlar uchun zamonaviy va raqamli kutubxona, ko‘p tarmoqli o‘quv markazi, kreativ to‘garaklar, sun’iy intellekt, 3D modellashtirish, robototexnika va kibersport o‘yinlari markazlari faoliyati yo‘lga qo‘yilib, Axborot-resurs markazi, sport zallari va Vork out maydonlari, yer osti ekomuzeyi tashkil etildi. Bu yer yoshlar uchun nafaqat dam olish maskani, balki axborot texnologiyalari sohasi va sport bilan shug‘ullanish, startap loyihalarni amalga oshirish uchun qulay joy bo‘ladi. Bog‘da sun’iy ko‘l va yashil hududlar tashkil etilib, yurtdoshlarimizning hordiq chiqarishlari uchun barcha sharoitlar yaratildi.
Aytish mumkinki, Prezidentimizning viloyatimizga bu galgi tashriflari va tarixiy ob’ektlarning ochilishi samarqandliklar uchun Ramazon hayitiga va Navro‘zga juda katta sovg‘a bo‘ldi.
Shuning uchun ham bugun viloyatimiz ahlining kayfiyati juda yuqori, g‘ayrat-shijoati har qachongidan ham baland.
Biz bu yil Navro‘zni ana shunday ko‘tarinki ruhda, o‘zgacha kafiyatda nishonlayapmiz va bu ko‘tarinkilik yil bo‘yi barchamizga hamroh bo‘ladi, yanayam katta yutuq va muvaffaqiyatlarga erishamiz, desam fikrimni qo‘llab-quvvatlaysizlar, albatta.
Hurmatli tantana ishtirokchilari!
Bugungi Navro‘z bayrami tadbirlarida ko‘p millatli viloyatimiz ahli bilan birga qardosh Turkiyaning Hatay viloyatidan kelgan mehmonlar ham ishtirok etishmoqda. Aziz mehmonlarimizga qadimiy va hamisha navqiron Samarqandga xush kelibsiz, deyman. O‘zbekiston bo‘ylab sayohatingiz davomida yurtimizda kechayotgan o‘zgarish va yangilanishlar, umrboqiy qadriyatlarimiz timsoli bo‘lgan Navro‘z bayrami shodiyonalaridan yaxshi taassurotlarga ega bo‘lasiz, degan umiddaman.
Qadrli bayram ishtirokchilari!
Joriy yilda Samarqand yana qator xalqaro sammit va anjumanlarga mezbonlik qiladi. Xususan, Samarqand shahrida Yoshlar parlamenti a’zolarining 12-global konferensiyasi, “Take Off” xalqaro startap sammiti va 46-Butunjahon shaxmat olimpiadasi o‘tkaziladi.
Ushbu xalqaro tadbirlarni ham viloyatimiz ahlining tashabbuskorligi va mehmondo‘stligi bilan yuqori darajada tashkil etamiz, albatta.
Aziz do‘stlar!
Bugungi tahlikali zamonda, dunyoning turli mintaqalarida notinchlik kuzatilayotgan bir paytda bag‘rikeng xalqimiz uchun eng katta boylik bu – osmonimizning tinchligi, hayotimizning osoyishtaligi, yurtdoshlarimizning bir-biriga bo‘lgan mehr-muhabbati va hurmatidir. Bu boylikni asrab-avaylash, qadriga yetish har birimiz uchun muqaddas burch sanaladi.
Biz aslida bahorni tabiatning uyg‘onishi, qalbimizning poklanishi bilan bog‘laymiz. Ayniqsa, bu yilgi NAVRO‘Z ayyomining muqaddas RAMAZON HAYITIning uzviy davomi sifatida nishonlanayotganida ham hikmat bor, deb o‘ylayman.
Inson qadri ulug‘lanayotgan yurtimizda har bir loyiha, har bir harakat xalq bilan bamaslahat, yurtdoshlarimizning manfaatlari hisobga olingan holda amalga oshirilmoqda. Qabul qilinayotgan mukammal qonunlar, hurmatli Davlatimiz Rahbarining Farmon va qarorlari – bularning barchasi Yangi O‘zbekistonda har bir insonning hayotini yanada farovon va fayzli qilishga yo‘naltirilgan.
Jonajon Vatanimizning xalqaro maydondagi nufuzi kundan-kunga ortib borayotganligi ham shu kunlarda barchamizga o‘zgacha kayfiyat bag‘ishlamoqda.
Aziz yurtdoshlar!
Fursatdan foydalanib, viloyatimizni rivojlantirish uchun chinakam fidoyilik ko‘rsatib mehnat qilayotgan safdoshlarimizga, tadbirkor va ziyolilarimiz, faollarimizga va barcha Samarqand ahliga samimiy minnatdorlik bildiraman!
Qadrli shodiyona ishtirokchilari!
Sizlarni yana bir bor NAVRO‘Z ayyomi bilan tabriklab, sharqona yangi yil barchamiz uchun qut-barakali va unutilmas yil bo‘lishini tilayman!
Oldimizga qo‘ygan yuksak marralarimizga birgalikda erishib, xalqimiz va hurmatli davlatimiz rahbarining oldida yuzimiz yorug‘ bo‘lsin, kelgusi yil shu kunlarga barchamizni sog‘-salomat, ulkan ezgu rejalarimiz amalga oshgan holda yetkazsin!
Navro‘z bayrami barchangizga muborak bo‘lsin!