Samarqand viloyati hokimi Boboyev Adiz Muzafarovichning “8 mart - Xalqaro xotin-qizlar bayrami”ga bag‘ishlangan tabrik so‘zi
2026-03-07 21:15:00 / Rahbariyatning bayonotlari va nutqlari
Assalomu alaykum muhtarama onaxonlar!
Munis opa-singillar!
Hurmatli tadbir ishtirokchilari!
Sizlarni va sizlar orqali viloyatimizdagi barcha onalarimiz, opa-singillarimiz va mehribon qizlarimizni “ 8-mart - Xalqaro xotin-qizlar bayrami” bilan chin qalbimdan, samimiy tabriklayman!
Har yili xotin-qizlar bayrami hamda bahor va nafosat ayyomi munosabati bilan Siz – azizlarni xursand qilishga, o‘zingiz kabi go‘zal bayramingiz bilan tabriklashga intilamiz. Sizlardek biz ham yil davomida bu bayramni orziqib kutamiz.
Inson yaralibdiki, hamma vaqt ayollarga eng yaxshi ta’riflar aytilgan, ularning oila va jamiyatdagi yuksak mavqei e’tirof etilgan. Muqaddas kitoblarimizda “Jannat onalar oyog‘i ostidadur” deb bejizga qayd etilmagan.
Buyuk mutafakkir bobomiz Alisher Navoiy “Jannat bog‘idan bahramandlik istasang, avvalo, munis onani rozi qilgin”, deb ularning qadr-qimmatini ulug‘lagan.
Umuman, nafaqat so‘z ijodkorlari bo‘lgan shoir va yozuvchilar, balki har birimiz mo‘tabar ayollarimiz sha’niga shunday go‘zal ta’riflarni aytgimiz, ularni ulug‘lagimiz keladi. Sizlar hamma vaqt eng go‘zal ta’riflar, ezgu tilaklar va xush kalomga munosibsizlar!
Qadrli tadbirimiz ishtirokchilari!
Har bir jamiyatning obro‘si uning xotin-qizlarga bo‘lgan munosabati bilan belgilanadi. Shuning uchun ham hurmatli Prezidkentimiz tashabbuslari bilan mamlakatimizda ayollarni ijtimoiy muhofaza qilish va har tomonlama qo‘llab-quvvatlash, davlat va jamiyat hayotidagi ishtirokini kengaytirishga alohida e’tibor qaratilmoqda.
Buning amaliy ifodasini 2 milliondan ortiq viloyatimiz xotin-qizlarining hayoti misolida ko‘rishimiz mumkin. Ular bugun oila, farzand ta’lim-tarbiyasi bilan birga, jamiyat hayotining barcha sohalarida yurtimizning fidoyilari sifatida faol ishtirok etib kelishmoqda.
Xususan, viloyatimiz xotin-qizlarining ijtimoiy-siyosiy faolligini oshirish, ta’lim olish imkoniyatlarini kengaytirish, gender tenglikni ta’minlash borasidagi ishlar natijasida, har yili ijtimoiy ehtiyojmand oila vakillari, yetim yoki ota-onasining qaramog‘idan mahrum bo‘lgan
150 nafar talaba xotin-qizlarning bir yillik to‘lov shartnoma puli mahalliy budjet mablag‘lari hisobidan qoplab berilmoqda.
Oliy ta’lim muassasalarida to‘lov shartnoma asosida tahsil olayotgan boshqa xotin-qizlarimizga esa shartnoma to‘lovlari uchun foizsiz kredit resurslari ajratilishi, magistraturada o‘qiyotgan qizlarning shartnoma mablag‘lari davlatimiz tomonidan to‘lab berilishi ham juda katta imkoniyat, imtiyoz hisoblanishini sizlar yaxshi bilasizlar.
Ana shu e’tibor tufayli bugun oliy o‘quv yurtlari talabalari orasida xotin-qizlar ulushi 53 foizni tashkil etmoqda.
Hurmatli davlatimiz rahbarining 2025-yil 14-martdagi “Oila va xotin-qizlarni qo‘llab-quvvatlash tizimini yanada takomillashtirish chora-tadbirlari to‘g‘risida”gi qaroriga muvofiq, viloyatimizda xotin-qizlar faolligini oshirish, ayollar bandligini ta’minlash va tadbirkorligini qo‘llab-quvvatlash maqsadida ishlab chiqilgan dastur asosida o‘tgan yili 145 ming 268 nafar xotin-qizning bandligi ta’minlandi, 32 ming 513 nafari mehnat bozorida talab yuqori bo‘lgan kasb-hunarlarga va tadbirkorlikka o‘qitildi.
34 ming nafarga yaqin xotin-qizlarga tijorat banklari tomonidan 934 mlrd so‘m kredit mablag‘lari ajratildi.
Keyingi yillarda xotin-qizlarni ijtimoiy muhofaza qilish va og‘ir turmush vaziyatiga tushib qolgan opa-singillarimizga har tomonlama qo‘mak berishda “Ayollar daftari” samarali tizimga aylandi. O‘tgan 2025-yilda mazkur daftarga kiritilgan 104 ming 509 nafar ehtiyojmand xotin-qizga belgilangan tartibda amaliy yordam ko‘rsatildi.
Xususan, 44 ming 844 nafar ijtimoiy himoyaga muhtoj ishsiz xotin-qizlar bandligi ta’minlandi. Tadbirkorlik qilish istagida bo‘lgan 3292 nafar opa-singillarimizga kreditlar ajratildi va amaliy yordamlar berildi.
Boquvchisi bo‘lmagan ehtiyojmand 24 ming nafarga yaqin xotin-qizlarga bir marotabalik moddiy yordam pullari berildi va 266 nafarining uy-joyi ta’mirlandi.
Uy-joyga muhtoj 309 nafar xotin-qiz uy-joy bilan ta’minlandi, ularning ijara kompensatsiya pullari to‘lab berildi.
“Ayollar daftari”ga kiritilgan 2250 nafar xotin-qizlar Bo‘stonliq tumanida joylashgan dam olish maskanida bo‘lib, psixologik yordam ko‘rsatish va tadbirkorlik ko‘nikmalarini shakllantirish bo‘yicha motivatsion seminarda ishtirok etishdi. Bu ishlar davom ettirilib, 2026 yilning o‘tgan davrida 400 nafar ayollar ham sihatgohga borib, motivatsion seminarda qatnashib kelishdi.
Viloyatning barcha tuman va shaharlarida yoshlarni oilaviy hayotga tayyorlash, oilaviy nizolarning oldini olish hamda xotin-qizlarga huquqiy, tibbiy va psixologik yordam ko‘rsatish maqsadida “Oila va xotin-qizlar maskanlari” faoliyati yo‘lga qo‘yildi. Hokimliklar bilan hamkorlikda markazlar joy bilan ta’minlandi va xotin-qizlar uchun zarur sharoitlar yaratildi.
O‘tgan yil kattaqo‘rg‘onlik tadbirkor Gulmira Jumaeva “Yil ayoli” milliy tanlovining respublika bosqichida Gran Prini qo‘lga kiritib, Prezident sovg‘asi – “Oniks” avtomashinasi bilan taqdirlandi.
Bu yil viloyatimizda amalga oshiriladigan barcha dastur va rejalarimizda Siz muhtaram ayollar uchun munosib turmush va mehnat sharoitlarini yaratish, manfaatlaringizni himoya qilish asosiy ustuvor yo‘nalishlardan hamda asosiy vazifalarimizdan biri bo‘lib qoladi.
Hurmatli tadbir ishtirokchilari!
Bu yilgi bayram muqaddas Ramazon oyida nishonlanmoqda. Muborak oyga xos mehr-muruvvat, ezgu amallar ushbu shukuhli ayyomda ham o‘z ifodasini topmoqda.
Viloyatimizdagi barcha tuman va shaharlar, korxona va tashkilotlar, mahallalar va xonadonlarda aziz xotin-qizlarimizga alohida hurmat-ehtirom ko‘rsatilmoqda.
Biz bunga o‘zimizni doim burchli deb bilamiz!
Barchamiz uchun quvonarlisi, bayram arafasida hurmatli Prezidentimizning qarorlari va Farmonlari bilan:
Samarqand shahridagi 33-umumiy o‘rta ta’lim maktabining 11-sinf o‘quvchisi Mamedova Amaliya Parvizovna hamda Samarqand davlat universitetining amaliy psixologiya kafedrasi assistenti Tohirova Mohigul Umir qizining Zulfiya nomidagi Davlat mukofoti bilan;
O‘zbekiston Yozuvchilar uyushmasi a’zosi, shoira Bobomurodova Xosiyat “O‘zbekiston Respublikasi xalq shoiri” faxriy unvoni bilan;
Samarqand shahar nuroniylar jamoatchilik kengashi faoli Imamova Dilbar Babaqulovna II darajali “Sog‘lom avlod uchun” ordeni bilan;
Samarqand viloyati yakka kurash sport turlariga ixtisoslashtirilgan sport maktabining dzyudo bo‘yicha murabbiysi Xoliqova Xurshida Narzullaevna “Sog‘lom turmush” medali bilan;
Samarqand davlat muzey-qo‘riqxonasi gid-tarjimoni Zaxidova Nazira Saloxiddinovna hamda Toyloq tumani hokimining o‘rinbosari – oila va xotin-qizlar bo‘limi boshlig‘i Qambariddinova Noila Mehrojovna “Shuhrat” medali, ya’ni yurtimizning yuksak Davlat mukofotlari bilan taqdirlanganini alohida e’tirof etib, butun viloyatimiz xalqi nomidan ularni tabriklashga ijozat bergaysizlar!
Aziz opa-singillar, viloyatimizning fidoyi xotin-qizlari!
Sizlarga sihat-salomatlik, ishlaringizga va ijodiy faoliyatlaringizga yangi zafarlar, oilalaringizga fayz-u baraka va farovonlik tilayman!
Bayramingiz muborak bo‘lsin!