Surxondaryo viloyati Qumqo‘rg‘on tumani hokimligi

Joriy yilning 12–14-may kunlari Qumqo‘rg‘on tumanida favqulodda vaziyatlarning oldini olish, aholi xavfsizligini ta’minlash hamda mutasaddi tashkilotlarning o‘zaro hamkorligini yanada mustahkamlash maqsadida keng ko‘lamli qo‘mondonlik-shtab o‘quv mashg‘ulotlari tashkil etildi.

Mazkur o‘quv mashg‘ulotlari davomida favqulodda holatlarda tezkor va muvofiqlashtirilgan harakat qilish, mavjud kuch va vositalardan samarali foydalanish, aholiga tezkor yordam ko‘rsatish hamda mas’ul xizmatlarning amaliy tayyorgarlik darajasini oshirish masalalariga alohida e’tibor qaratildi.

Mashg‘ulotlar jarayonida turli shartli favqulodda vaziyatlar asosida amaliy sinovlar o‘tkazilib, favqulodda vaziyatlarda aholini xavfsiz hududlarga evakuatsiya qilish, jabrlanganlarga birinchi tibbiy yordam ko‘rsatish, yong‘inlarni bartaraf etish, qidiruv-qutqaruv ishlarini olib borish hamda tegishli xizmatlarning hamkorlikdagi harakatlari amaliy jihatdan sinovdan o‘tkazildi.

Shuningdek, mashg‘ulotlar davomida tezkor qaror qabul qilish, axborot almashinuvi, maxsus texnika va vositalardan samarali foydalanish hamda favqulodda vaziyatlarda harakatlanish tartibi bo‘yicha mutasaddi tashkilotlarning salohiyati yana bir bor mustahkamlandi.

Xususan, bugun qo‘mondonlik-shtab o‘quv mashg‘ulotlarining yakuniy muhokama yig‘ilishi bo‘lib o‘tdi. Unda mashg‘ulotlar davomida amalga oshirilgan ishlar batafsil tahlil qilinib, erishilgan natijalar sarhisob qilindi. Yo‘l qo‘yilgan ayrim kamchiliklar ko‘rsatib o‘tilib, ularni bartaraf etish yuzasidan mas’ullarga tegishli tavsiya va topshiriqlar berildi.

Yig‘ilish davomida mashg‘ulotlarda faol, tashabbuskor va namunali ishtirok etgan tashkilotlar, xizmatlar hamda mutaxassislarning samarali faoliyati alohida e’tirof etildi. Ularga Surxondaryo viloyati Favqulodda vaziyatlar boshqarmasi boshlig‘i hamda Qumqo‘rg‘on tumani hokimining tashakkurnomalari va esdalik sovg‘alari tantanali ravishda topshirildi.

Ta’kidlash joizki, bunday qo‘mondonlik-shtab o‘quv mashg‘ulotlari hududlarda favqulodda vaziyatlarga tayyorgarlikni kuchaytirish, tashkilotlar o‘rtasidagi hamkorlikni mustahkamlash, tezkor xizmatlarning amaliy ko‘nikmalarini oshirish hamda aholi xavfsizligini ta’minlashda muhim ahamiyat kasb etadi.