Qumqo‘rg‘on tumanida ehtiyojmand oilalarni qo‘llab-quvvatlash bo‘yicha amaliy ishlar davom etmoqda
2026-05-12 13:00:00 / Yangiliklar
Bugun Qumqo‘rg‘on tumanida tuman hokimi Farrux Xoliqov boshchiligida “Ijtimoiy himoya reyestri”ga kiritilgan hamda moddiy yordamga muhtoj bo‘lgan fuqarolarni qo‘llab-quvvatlash maqsadida navbatdagi amaliy tadbir tashkil etildi.
Mazkur tadbir davomida tumandagi 300 nafar ehtiyojmand oilaga turli yo‘nalishlarda daromad manbaini yaratish va bandligini ta’minlash bo‘yicha ssuda asosida asbob-uskunalar topshirildi. Xususan, xonadonlarga, payvandlash apparatlari, benzopilalar, tikuv mashinalari hamda boshqa turdagi zarur jihozlar tarqatildi.
Ta’kidlanganidek, ushbu tashabbusdan asosiy maqsad — tumanda kambag‘allik darajasini qisqartirish, aholi bandligini oshirish, oilalarning daromad topish imkoniyatlarini kengaytirish hamda ijtimoiy himoyaga muhtoj qatlamni har tomonlama qo‘llab-quvvatlashdan iboratdir.
Tadbir davomida mas’ullar tomonidan fuqarolar bilan muloqot qilinib, ulardan samarali foydalanish, oilaviy tadbirkorlikni rivojlantirish va yangi ish o‘rinlarini yaratish bo‘yicha tavsiyalar berildi.
Bugungi kunda Qumqo‘rg‘on tumanida aholi farovonligini oshirish, kambag‘allikni qisqartirish va ijtimoiy himoya tizimini yanada mustahkamlash borasida tizimli ishlar izchil davom ettirilmoqda.