Qo‘ng‘irot tumanida ta’lim sohasida yangi davr boshlanmoqda. Bugun tumandagi ilk xususiy maktab — “Utegenov School” tantanali ravishda o‘z faoliyatini boshladi.

Yangi ta’lim maskanining ochilish marosimi O‘zbekiston Respublikasi Davlat mustaqilligining 35 yilligi arafasida ko‘tarinki va bayramona ruhda o‘tdi. Unda O‘zbekiston Respublikasi Oliy ta’lim, fan va innovatsiyalar vaziri Sharipov Kongratbay Avezimbetovich, Qo‘ng‘irot tumani hokimi, maktab jamoasi, ustozlar, o‘quvchilar, ota-onalar hamda jamoatchilik vakillari ishtirok etdi.

Tadbirda mamlakatimizda ta’lim tizimini rivojlantirish, yosh avlodga zamonaviy va sifatli ta’lim olish uchun munosib sharoitlar yaratish borasida amalga oshirilayotgan islohotlar xususida so‘z yuritildi.

Ayniqsa, Prezidentimizning 2025-yil 1-apreldagi PQ-132-son qarori asosida Qo‘ng‘irot tumanini jadal kompleks rivojlantirish, jumladan, yoshlar uchun zamonaviy ta’lim va ijtimoiy infratuzilmani shakllantirish bo‘yicha belgilangan vazifalarning amaliy natijalari qayd etildi.

500 nafar o‘quvchiga mo‘ljallangan “Utegenov School” — Qo‘ng‘irotda xususiy ta’lim sohasidagi muhim tashabbuslardan biridir. Maktabda o‘quvchilarning sifatli bilim olishi, zamonaviy ko‘nikmalarni egallashi, mustaqil fikrlashi va o‘z iqtidorini ro‘yobga chiqarishi uchun zarur sharoitlar yaratilgan.

Tantanali ochilish marosimida so‘zga chiqqan O‘zbekiston Respublikasi Oliy ta’lim, fan va innovatsiyalar vaziri Sharipov Kongratbay  Avezimbetovich yangi ta’lim maskanini rasman ochib berdi hamda maktab jamoasi va o‘quvchilarni ushbu muhim voqea bilan samimiy muborakbod etdi.

Vazir o‘z nutqida xususiy ta’lim muassasalarining ko‘payishi ta’lim sohasida sog‘lom raqobat muhitini shakllantirish, ta’lim sifatini oshirish va yoshlar uchun yangi imkoniyatlar yaratishda muhim ahamiyatga ega ekanini ta’kidladi.

Shuningdek, maktab tashabbuskori G‘ayratdin Utegenov va jamoasiga ushbu ezgu tashabbusni amalga oshirgani uchun minnatdorlik bildirilib, ta’lim sifatini yuksaltirish, o‘quvchilarning bilim va salohiyatini rivojlantirish borasidagi faoliyatiga muvaffaqiyatlar tilandi.

Tadbir davomida Qo‘ng‘irot tumani hokimi ham o‘quvchilar bilan samimiy suhbatlashib, ularni yangi maktab bilan tabrikladi. Yoshlarning kelgusi o‘qishlarida omad, yuqori natijalar va katta yutuqlarga erishishini tilab, yaratilgan imkoniyatlardan unumli foydalanishga chaqirdi.

Ochilish marosimida ta’lim sifatini oshirishda maktab — oila — jamoatchilik hamkorligining ahamiyati alohida ta’kidlandi. Zero, bilimli, mustaqil fikrlaydigan va vatanparvar avlodni tarbiyalash — barchamizning umumiy maqsadimizdir.

Yangi maktabning ishga tushirilishi Qo‘ng‘irot tumanida ta’lim sohasida sog‘lom raqobat muhitini shakllantirish, ota-onalar uchun ta’lim tanlovlarini kengaytirish hamda yoshlar uchun zamonaviy ta’lim olish imkoniyatlarini yanada oshirish yo‘lidagi muhim qadam bo‘ldi.

“Utegenov School” — bugun o‘z eshiklarini ochgan yana bir ta’lim maskani emas. Bu Qo‘ng‘irot yoshlarining katta orzulari, yangi bilimlari va porloq kelajagi sari ochilgan yangi eshikdir.

Yangi ta’lim maskaniga fayz-u baraka, ustozlarga kuch-g‘ayrat, o‘quvchilarga esa ilm yo‘lida ulkan zafarlar tilaymiz!

Ilmli avlod — yurtning eng katta boyligi!