O‘zbekiston Respublikasi Qishloq xo‘jaligi vazirligi hamda O‘zbekiston Fermerlari kengashining tomorqa yer egalari, dehqon va fermer xo‘jaliklariga

MUROJAATI

Hurmatli tomorqa yer egalari, dehqon va fermerlar!

Bugungi kunda oziq-ovqat xavfsizligini ta’minlash – aholi farovonligini oshirishning eng ustuvor yo‘nalishlaridan biridir.

Bir yilda ikki-uch marta hosil olish imkonini beradigan betakror iqlimimiz va unumdor tuprog‘imizning qadriga yeting. Har bir qarich yerdan oqilona foydalangan holda kartoshka, piyoz, sarimsoqpiyoz va to‘qsonbosti usulida sabzavot ekinlarini ekib, dasturxonimizni yanada to‘kin qilishga munosib hissangizni qo‘shing.

Tomorqa yerlari, bog‘ qator oralaridan hamda dala chetlaridan unumli foydalaning. Bunda davlatimiz rahbarining farmon va qarorlari bilan belgilangan hamda Kambag‘allikni qisqartirish va bandlik vazirligi huzuridagi Dehqon xo‘jaliklari va tomorqa yer egalarini qo‘llab-quvvatlash jamg‘armasining quyidagi imtiyozlaridan foydalaning:

– yerdan samarali foydalanib, bir sotixdan 5 million so‘mdan yuqori rasmiy daromad toping va yer solig‘ining 90 foizini «keshbek» tarzida qaytarib oling;

– tomorqangizda eng namunali va innovatsion loyiha uchun bazaviy hisoblash miqdorining 100 baravaridan oshmagan miqdorda grantlar yutish imkoniyatidan foydalaning;

– usta dehqonlar tomonidan qisqa muddatli o‘quv kurslarini tashkil eting va har bir kurs uchun bazaviy hisoblash miqdorining 15 baravarigacha miqdorda subsidiya oling;

– mahallangizda 50 foiz xonadonlarning tomorqasida eksportbop mahsulot yetishtirishni yo‘lga qo‘yishga ko‘maklashib, 100 million so‘mgacha subsidiya oling;

– tomorqa yer egalari va dehqon xo‘jaliklarining qishloq xo‘jaligi mahsulotlarini yetishtirish, quritish, saqlash va qadoqlash loyihalari uchun 7 yilgacha muddatga 18 foiz stavkada kreditlar oling;

– ixcham muzlatkichli omborxonalar, qadoqlash, quritish va qayta ishlash uskunalari hamda tayyor holatdagi issiqxonalarni 5 yilda bo‘lib to‘lash sharti bilan lizingga oling;

– aholi tomorqalarida samarasiz eski bog‘larni rekonstruksiya qilish va yangilarini barpo etish uchun subsidiyalar oling;

– suv ta’minoti og‘ir bo‘lgan hududlarda yer uchastkalarini sug‘orish uchun tik quduqlarni burg‘ilash va ishga tushirish uchun subsidiyalar oling;

– suv resurslaridan tejamkorlik bilan foydalanib, tomorqa yer maydonlarida serhosil va yuqori daromadli qishloq xo‘jaligi mahsulotlarini yetishtiring;

– Kengash huzuridagi tomorqachilikni rivojlantirish tajriba maydonchalarida tomorqadan samarali foydalanish va yuqori hosil olish bo‘yicha aholining bilim va ko‘nikmalarini oshiring;

– Qishloq xo‘jaligi vazirligi huzuridagi Sabzavotchilik ilmiy-tadqiqot instituti olimlari tomonidan ishlab chiqilgan qo‘llanmalardan foydalanib, yuqori hosil olishga erishing.

Muhim!

Tomorqa yer maydonlari hamda dehqon xo‘jaliklariga ijaraga berilgan yerlarda ekin to‘liq ekilmagan yoki qarovsiz qoldirilgan hollarda:

– tomorqa yer egalari va dehqon xo‘jaliklariga davlat dasturlari doirasidagi imtiyozli kreditlar berilmaydi;

– Ijtimoiy himoya yagona reyestriga kiritilgan fuqarolar uchun nazarda tutilgan imtiyozlar to‘xtatiladi;

– «Onlayn mahalla» elektron platformasi ma’lumotlari asosida ekin ekilmaganligi aniqlangan yil uchun yer solig‘i stavkasi uch karra miqdorida hisoblanadi.

KECHKI KARTOSHKA YETISHTIRISHDA:

– kechki kartoshka uchun yerni ekin qoldiqlaridan tozalang, talab etilgan chuqurlikda shudgorlash va ekish uchun ariq-egatlarni tayyorlang;

– yerning haroratini inobatga olib, ekishni tashkil eting;

– suv resurslaridan tejamkorlik bilan foydalanib, 1–2 suv oralig‘ida mineral o‘g‘itlarni tavsiya etilgan miqdorda solish yuqori hosil yetishtirishda muhim ahamiyat kasb etadi;

– kartoshkani parvarishlashda rivojlanish fazasini doimiy nazoratga oling. Tananing o‘sib borishi va barglar rangining o‘zgarishiga e’tibor bering;

– gullash davridan avval zararkunandalarga, jumladan, kolorado qo‘ng‘izi, simqurt va boshqalarga qarshi kimyoviy ishlov berishni unutmang;

– kartoshka gullagandan so‘ng suvni belgilangan me’yorlarda berishga alohida e’tibor qarating;

– kuz oylarida qisqa muddatli sovuq havo yuzaga kelganda, ekin ustini yoy shaklida o‘rnatilgan plyonka yoki agrovolokno bilan yoping.

AVGUST-SENTYABR PIYOZI VA SARIMSOQPIYOZ YETISHTIRISHDA:

– yerni ekin qoldiqlaridan tozalang, talab etilgan chuqurlikda shudgorlash orqali ekishga tayyorlang;

– piyoz va sarimsoqpiyozni sentyabr oyi ichida ekish sifatli ko‘chat olish hamda o‘simliklarning yaxshi ildiz otishida muhim ahamiyatga ega;

– suv resurslaridan tejamkorlik bilan foydalaning;

– o‘simliklarni parvarishlashda rivojlanish fazasini doimiy nazoratga oling, begona o‘tlardan toza tuting;

– ekinlarni kasallik va zararkunandalardan samarali himoya qiling, mineral va organik o‘g‘itlardan belgilangan me’yorlarda foydalanib, yuqori hosil va qo‘shimcha daromadga erishing.

TO‘QSONBOSTI USULIDA SABZAVOTLAR YETISHTIRISHDA:

To‘qsonbosti usuli nafaqat yaxshi daromad manbai, balki aholining qish va bahor oylaridagi sabzavot ehtiyojini qondirib, bozorlarimizda barqaror narx va to‘kinlikni ta’minlashning ham muhim omilidir.

– yerni oldingi ekin qoldiqlaridan tozalab, talab etilgan chuqurlikda shudgorlash orqali ekishga tayyorlang;

– kuzda sovuq va namgarchilik boshlanishidan oldin to‘qsonbosti usulida ekish uchun sovuqqa chidamli sabzi, ko‘k piyoz, osh lavlagi, karam hamda turli ko‘katlar (ismaloq, ukrop, petrushka, selderey, kashnich, salat) urug‘larini tayyorlab, kechiktirmasdan eking;

– urug‘larni tavsiya etilgan me’yor va chuqurlikda ekib, dastlabki suvni o‘z vaqtida bering;

– ekinlarni kasallik va zararkunandalardan himoya qiling, begona o‘tlardan toza tutib, yuqori hosil olishga erishing.

HURMATLI TOMORQA YER EGALARI, DEHQON VA FERMERLAR!

Barchangizni tomorqa yerlaridan, bog‘ qator oralaridan va dala chetlaridan unumli foydalanib, kartoshka, avgust-sentyabr piyozi, sarimsoqpiyoz hamda to‘qsonbosti usulida qishloq xo‘jaligi ekinlarini belgilangan muddatlarda ekish ishlarini yakunlashga chaqiramiz.

Esingizda bo‘lsin: bugungi harakat – ertangi to‘kinlik va farovon hayotimizning mustahkam poydevoridir!

Yerimiz barakali, rizqimiz but, xonadonlarimiz hamisha tinch va obod bo‘lsin!

Iqtisodiyotimizni yuksaltirish va ona yurtimizni yanada obod etish yo‘lida munosib hissangizni qo‘shing — qishloq xo‘jaligi ekinlarini o‘z muddatida eking va yuqori hosilga erishing!

O‘zbekiston Respublikasi Qishloq xo‘jaligi vazirligi

O‘zbekiston Fermerlari kengashi