Qoraqalpog`iston Rеspublikаsi Qo'ng'irot tumani hokimligi

O‘zbekiston Respublikasi Vazirlar Mahkamasining 2024-yil 16-apreldagi “Yoqilg‘i-energetika sohasida bozor mexanizmlarini joriy etishning qo‘shimcha chora-tadbirlari to‘g‘risida”gi 204-sonli qaroriga asosan, tabiiy gaz va elektr energiyasini iste’mol qilishda bazaviy norma doirasidagi hamda bazaviy normadan oshgan narxlar o‘rtasidagi farqni kompensatsiya qilish tartibi belgilangan.

Mazkur kompensatsiya ijtimoiy himoyaga muhtoj oilalarni qo‘llab-quvvatlash, energiya resurslaridan foydalanishda ularning xarajatlarini yengillashtirish maqsadida joriy etilgan.

Kompensatsiya olish uchun murojaat qilish tartibi

Kompensatsiya olish uchun ariza beruvchi har oyning 16-sanasiga qadar vakolatli tashkilotga murojaat qiladi. Murojaat quyidagi tartibda amalga oshirilishi mumkin:

Davlat xizmatlari markazi orqali;

Vakolatli tashkilotga bevosita borgan holda;

Oila yashaydigan mahallaga biriktirilgan ijtimoiy xodim orqali;

“Yagona milliy ijtimoiy himoya” axborot tizimi orqali;

Yagona interaktiv davlat xizmatlari portali orqali erkin shaklda.

Ariza beruvchining oilasi reestrga kiritilganligi haqidagi ma’lumotlar tegishli axborot tizimlari orqali tekshiriladi. Oilaning elektr energiyasi va yoki tabiiy gazdan foydalanishi haqidagi ma’lumotlar esa “Hududiy elektr tarmoqlari” AJ hamda “Hududgazta’minot” AJning tegishli axborot tizimlaridan idoralararo elektron hamkorlik orqali olinadi.

Kompensatsiya tayinlash rad etiladigan holatlar

Quyidagi holatlarda kompensatsiya tayinlash rad etiladi:

Oilaning jon boshiga to‘g‘ri keladigan daromadi eng kam iste’mol xarajatlarining 1,5 baravaridan yuqori ekanligi aniqlanganda;

Ariza beruvchi yoki uning oila a’zolarining mulkida yoxud foydalanishida jami bittadan ortiq ko‘chmas mulk va yer uchastkasi mavjud bo‘lganda;

Ariza beruvchi yoki uning oila a’zolarining mulkida bir yoki undan ortiq noturar joy mavjud bo‘lganda;

Ariza beruvchi yoki uning oila a’zolari nomiga qonunchilik hujjatlarida belgilangan tartibda rasmiylashtirilgan, foydalanishida bo‘lgan yoki ishonchnoma asosida boshqarilayotgan texnik jihatdan soz avtotransport vositalari hamda maxsus texnikalar mavjud bo‘lganda.

Bunday vositalarga quyidagilar kiradi:

Ishlab chiqarilgan muddati 12 yildan oshmagan, texnik jihatdan soz bo‘lgan yengil avtotransport vositasi;

Oila a’zosi I yoki II guruh nogironligi bo‘lgan shaxs yoxud 18 yoshgacha bolalikdan nogironligi bo‘lgan shaxs bo‘lsa, ishlab chiqarilgan muddati 7 yildan oshmagan yengil avtotransport vositasi;

Ishlab chiqarilgan muddati 15 yildan oshmagan, texnik jihatdan soz bo‘lgan yuk tashuvchi avtotransport vositasi;

Avtobus, mikroavtobus, ekskavator, traktor, kombayn, yuk tashuvchi avtotransport vositalarining tirkamalari va yarim tirkamalari, avtokran hamda boshqa qurilish texnikalari;

Jami ikki va undan ortiq texnik jihatdan soz bo‘lgan yengil yoki yuk tashuvchi avtotransport vositalari hamda maxsus texnikalar.

Isitish mavsumi uchun tabiiy gaz bo‘yicha kompensatsiya miqdorini hisoblashda, mavsumning boshlanishi yoki yakunlanishi belgilangan sanaga to‘g‘ri keladigan oy isitish mavsumi oyi sifatida hisobga olinadi.

Kompensatsiyani to‘lab berish tartibi

O‘zbekiston Respublikasi Prezidenti huzuridagi Ijtimoiy himoya milliy agentligi “Yagona reestr” axborot tizimi orqali kompensatsiya oluvchi oilalar bo‘yicha to‘lovlar ro‘yxatini shakllantiradi.

Ushbu ro‘yxatlar so‘rovnoma to‘ldirilgan oydan keyingi oyning 5-sanasiga qadar AT “Xalq banki”ga yuboriladi.

Iqtisodiyot va moliya vazirligi bilan birgalikda kompensatsiya oluvchi oilalarga kompensatsiya to‘lovini to‘lab berish uchun zarur mablag‘lar har oyning 5-sanasidan 25-sanasiga qadar AT “Xalq banki”ga o‘tkazib beriladi.

AT “Xalq banki” kompensatsiya to‘lovini ariza berilgan oydan keyingi oyning 27-sanasiga qadar kompensatsiya oluvchining ijtimoiy kartasi yoki bank kartasiga to‘lab beradi.

Agar kompensatsiya oluvchining nomida ijtimoiy karta yoki bank kartasi bo‘lmasa, to‘lov AT “Xalq banki”da uning oila a’zolari nomiga ochilgan ijtimoiy karta yoki bank kartasiga to‘lab berilishi mumkin.

Qo‘ng‘irot tumani adliya bo‘limi
Davlat xizmatlari markazi yetakchi mutaxassisi: Shaxnoza Baltabayeva