G‘alla o‘rim-yig‘imini uyushqoqlik bilan o‘tkazib, mo‘l hosil olishga erishing!
2026-06-12 13:00:00 / Press-relizlar
Qo‘ng‘irot tumani Fermerlar kengashi Rayosati a’zolarining murojaati
Hurmatli fermerlar!
Mamlakatimizda halol mehnat qilayotgan dehqon va fermerlarning zahmatlari evaziga dalalarda mo‘l va barakali g‘alla hosili yetishtirildi.
Davlatimiz rahbari tomonidan qabul qilinayotgan farmon va qarorlar Siz, aziz fermerlarning qishloq xo‘jaligi mahsulotlari yetishtirishdagi yutuqlariga mustahkam zamin yaratmoqda.
Bugungi kunda respublikamizning ko‘plab hududlarida fermer xo‘jaliklari g‘alla o‘rim-yig‘imini uyushqoqlik bilan olib borib, davlat zaxirasiga don topshirmoqda hamda yetishtirilgan mo‘l hosil evaziga yuqori daromadga erishmoqda.
Aziz fermerlar!
G‘allachilik sohasida yaratilgan imkoniyat va imtiyozlardan samarali foydalaning. Prezidentimizning 2026-yil 8-maydagi “G‘o‘za va bug‘doy yetishtiruvchilarni moliyaviy qo‘llab-quvvatlashning qo‘shimcha chora-tadbirlari to‘g‘risida”gi PF–82-son Farmoni hamda boshqa normativ-huquqiy hujjatlar bilan fermerlar uchun qator qulayliklar yaratildi.
Jumladan:
- bug‘doy yetishtirish xarajatlari uchun ajratilgan imtiyozli kreditlarni hosil yilining 1-avgustiga qadar to‘liq qoplagan xo‘jaliklarga kredit bo‘yicha to‘langan foizlarning 4 foizlik qismi qaytarib beriladi;
- 2026-yil hosilidan boshlab g‘allani o‘z mablag‘lari yoki tijorat kreditlari hisobidan yetishtirib, uni belgilangan tartibda birja savdolari yoki davlat resurslari uchun realizatsiya qilgan qishloq xo‘jaligi korxonalariga mahsulot qiymatining 10 foizi miqdorida subsidiya ajratiladi;
- o‘z mablag‘lari hisobidan yomg‘irlatib sug‘orish texnologiyasini joriy qilayotgan fermerlarga subsidiya mablag‘larining 50 foizi oldindan, qolgan 50 foizi esa texnologiyalar ishga tushirilgandan so‘ng to‘lab beriladi;
- davlat buyurtmasi asosida boshoqli don yetishtirish amaliyoti bekor qilinib, sohada bozor tamoyillari bosqichma-bosqich joriy etildi;
- fermerlarga ajratilgan imtiyozli kredit mablag‘laridan erkin foydalanish, xizmat ko‘rsatuvchi va resurs yetkazib beruvchilarni mustaqil tanlash huquqi berildi;
- don xarid qilish va sotishda birja mexanizmlarining joriy etilishi fermerlarning iqtisodiy manfaatdorligini oshirmoqda.
Qadrli fermerlar!
Har bir kun g‘animat ekanligini chuqur anglagan holda quyidagi vazifalarni o‘z vaqtida amalga oshirishni unutmang:
Birinchidan, yetishtirilgan hosilni qisqa muddatlarda va nobudgarchiliksiz yig‘ib oling. O‘rim-yig‘imning har bir kun kechikishi hosildorlikning pasayishiga olib kelishi mumkin. Donni davlat zaxirasiga topshirib, majburiyatlaringizni to‘liq bajaring hamda imtiyozli kreditlarni o‘z vaqtida qaytarib, mavjud imtiyozlardan foydalaning.
Ikkinchidan, har gektar maydondan yuqori hosildorlikka erishib, xo‘jaligingiz daromadini oshiring.
Uchinchidan, g‘alladan bo‘shagan maydonlarni tezkorlik bilan somondan tozalab, daromadli va eksportbop takroriy ekinlar ekishni tashkil eting.
To‘rtinchidan, mahallangizdagi kam ta’minlangan oilalar, yoshlar hamda xotin-qizlarga takroriy ekin ekish uchun yer ajratib, saxovat va hamjihatlik namunalarini ko‘rsating.
Beshinchidan, mamlakatimiz aholisini sifatli non va non mahsulotlari bilan ta’minlash ishiga munosib hissa qo‘shing.
Unutmang, xalqimiz dasturxonining to‘kinligi, bozorlarimizda non va non mahsulotlarining mo‘l-ko‘lligi hamda mamlakatimiz oziq-ovqat xavfsizligi ko‘p jihatdan Sizning bugungi fidokorona mehnatingizga bog‘liq.
Barchangizni g‘alla o‘rim-yig‘im mavsumini uyushqoqlik bilan o‘tkazishga, davlat va xalq oldidagi mas’uliyatni chuqur his etgan holda samarali mehnat qilishga chorlaymiz.
Qo‘ng‘irot tumani Fermerlar kengashi Rayosati a’zolar