Kattaqo‘rg‘on tumani Ichki ishlar bo‘limi boshlig‘i O.Jalilovning tuman aholisi va mehmonlariga murojaati
2026-11-11 17:00:00 / MUROJAAT
Assalomu alaykum, hurmatli Kattaqo‘rg‘on tumani aholisi, aziz yurtdoshlar va tumanimiz mehmonlari!
Muhtaram Prezidentimiz tomonidan belgilangan vazifalar ijrosini ta’minlash, tumanimizda kriminogen vaziyatni barqarorlashtirish hamda jinoyatchilikni barvaqt oldini olish maqsadida har oy yakuni bo‘yicha aholiga “profilaktik-ogohlantiruvchi murojaat” yo‘llab borilmoqda.
Bugun Sizlarga tumanimizda joriy yilning oktabr oyida sodir etilgan jinoyatlar bo‘yicha qisqacha ma’lumot bermoqchiman.
Joriy yilning oktabr oyida tumanimiz hududida jami 110 ta jinoyatlar sodir etilgan bo‘lib, sentabr oyiga nisbatan 32 taga kamayishiga erishildi.
Shuningdek, oktabr oyida qayd etilgan jinoyatlarning 16 tasi tashabbus bilan aniqlanadigan, 37 tasi oldini olish mumkin bo‘lgan hamda 57 tasi axborot texnologiyalari orqali sodir etilgan jinoyatlar tashkil qiladi.
Olib borilgan profilaktik chora-tadbirlar natijasida oktabr oyida tumanimizda qotillik, bosqinchilik, qasddan og‘ir tan jarohati yetkazish va oilaviy zo‘ravonlik kabi og‘ir jinoyatlar sodir etilishiga yo‘l qo‘yilmadi.
Bugungi kunda mahallalarda xavfsiz muhitni yaratish borasida ham tizimli ishlar olib borilmoqda.
Tumanimizdagi jami 69 ta mahallaning oktabr oyi yakuni bo‘yicha 26 tasi «yashil», 31 tasi «sariq» va 12 tasi «qizil» toifaga kiritilgan.
Ayniqsa, jinoyatchiligi oshgan mahallalarda jinoyat sodir etilishiga sabab bo‘layotgan omillarni bartaraf etish va huquqbuzarliklarning oldini olish bo‘yicha manzilli chora-tadbirlar amalga oshirilmoqda.
Hurmatli fuqarolar!
Tumanimizda so‘nggi vaqtlarda o‘g‘irlik, firibgarlik, oilaviy zo‘ravonlik va tan jarohati yetkazish bilan bog‘liq jinoyatlar soni o‘tgan yilning mos davriga nisbatan oshgani kuzatilmoqda.
Ayniqsa, o‘g‘irlik va firibgarlik jinoyatlarining oldini olishda fuqarolarning shaxsiy ehtiyotkorligi juda muhim.
Uy-joylaringizni, mol-mulkingizni qarovsiz qoldirmang, notanish shaxslarga ishonib, bank kartangiz ma’lumotlari, SMS-kodlar va shaxsiy ma’lumotlaringizni oshkor qilmang, har qanday nizo va kelishmovchiliklar yuzasidan ichki ishlar organlariga murojaat qiling.
Shu o‘rinda, siz aziz yurtdoshlarimizni quyidagi muhim profilaktik talablarga qat’iy rioya etishga chaqiraman:
-Kiberjinoyatchilikdan himoyalanish uchun kiberxavfsizlik qoidalariga amal qiling. O‘zingiz va oila a’zolaringizning mobil telefonlariga «APK Qo‘riqchi» ilovasini o‘rnating. Shubhali havolalarga kirmang, noma’lum shaxslarga telefon orqali kelgan tasdiqlash kodlarini bermang.
-Xonadonlaringiz va boshqa mol-mulklaringiz xavfsizligini ta’minlash maqsadida ularni qo‘riqlash pultiga ulashni tavsiya qilaman.
-Ko‘chalarda, jamoat joylarida yoki mahallalarda shubhali shaxslar va holatlarni ko‘rsangiz, bu haqda zudlik bilan mahalla profilaktika inspektoriga yoki 112 raqamiga xabar bering.
Hurmatli Kattaqo‘rg‘onliklar tumanimiz hududida:
-jinoyat va huquqbuzarliklarni oldini olish,
-jinoyatchilikka qarshi kurashish,
-mahallalarda xavfsiz muhitni yaratish borasidagi chora-tadbirlarni amalga oshirishda albatta keng jamoatchilik vakillari va Siz aziz fuqarolarimizga tayanamiz.
Murojaatim yakunida, Siz azizlarni yana bir bor ogohlikka chaqiraman.
O‘z uyimiz, o‘z mahallamizni osoyishtaligini birgalikda o‘zimiz asraylik!
Aziz yurtdoshlar.