Kattaqo‘rg‘on tumani Mo‘ndiyon mahallasi Saroy qishlog‘ida aholiga tibbiy xizmat ko‘rsatish imkoniyatlarini kengaytirishga qaratilgan yana bir muhim loyiha amalga oshirildi.

Tadbirkor Husniddin Mustofoevga tegishli binoda vrach Jasur To‘raev tashabbusi bilan «ENDO NEVRO CLINIC» xususiy klinikasi tashkil etilib, uning ochilish marosimi bo‘lib o‘tdi.

Ochilishda Kattaqo‘rg‘on tumani hokimi Jamshid Nasriddinov, hokimlik vakillari, soha mutasaddilari hamda keng jamoatchilik ishtirok etdi.

Tadbirda so‘zga chiqqanlar mamlakatimiz mustaqillik yillarida, ayniqsa, sog‘liqni saqlash tizimida amalga oshirilayotgan islohotlar, aholiga sifatli tibbiy xizmat ko‘rsatish uchun yaratilayotgan imkoniyatlar xususida fikr bildirdilar.

25 o‘ringa mo‘ljallangan yangi klinikada endokrinologiya, nevrologiya va kardiologiya yo‘nalishlarida tibbiy xizmatlar ko‘rsatish yo‘lga qo‘yilgan.

E’tiborlisi, xususiy tibbiy muassasalar sonining ortishi sohada sog‘lom raqobatni kuchaytirib, aholiga sifatli, zamonaviy va qulay tibbiy xizmatlarni yaqinlashtirishga xizmat qilmoqda.

Yangi klinika faoliyatiga muvaffaqiyat tilab, aholi salomatligini asrash yo‘lida samarali xizmat qilishiga ishonamiz.