Kattaqo‘rg‘on tumani delegatsiyasi Belarusda: tajriba, hamkorlik va yangi imkoniyatlar
2026-08-17 09:05:00 / Yangiliklar
Samarqand viloyati hokimi Adiz Boboyev boshchiligidagi delegatsiyaning Belarus Respublikasiga amaliy tashrifi doirasida Kattaqo‘rg‘on tumani hokimi Jamshid Nasriddinov boshchiligidagi tuman delegatsiyasi ham ishtirok etmoqda.
Tashrif davomida Samarqand viloyati va Belarus o‘rtasida qishloq xo‘jaligi, oziq-ovqat sanoati, qayta ishlash hamda to‘qimachilik sohalaridagi hamkorlikni kengaytirishga qaratilgan muzokaralar o‘tkazilmoqda.
Viloyat delegatsiyasi Belarus Respublikasi Qishloq xo‘jaligi va oziq-ovqat vazirligi vakillari, «Bellegprom» konserni rahbariyati hamda qator yirik qishloq xo‘jaligi korxonalari faoliyati bilan tanishib, to‘g‘ridan-to‘g‘ri ishlab chiqarish aloqalarini yo‘lga qo‘yish, qo‘shma loyihalarni amalga oshirish va ilg‘or tajribani o‘zaro tatbiq etish masalalarini muhokama qilmoqda.
Shuningdek, delegatsiya a’zolari Belarusning «Prigranichnыy» va «Subbotniki» kommunal qishloq xo‘jaligi unitar korxonalarida bo‘lib, ishlab chiqarish jarayonlarining tashkil etilishi, chorvachilikni rivojlantirish, zamonaviy yondashuvlar va samarali boshqaruv tajribasini o‘rganmoqda.
Mazkur jarayonlarda Kattaqo‘rg‘on tumani delegatsiyasining ishtiroki alohida ahamiyatga ega. Zero, bugungi kunda tumanda qishloq xo‘jaligi, chorvachilik, oziq-ovqat mahsulotlarini yetishtirish va qayta ishlash yo‘nalishlarida yangi loyihalarni amalga oshirish, ishlab chiqarish samaradorligini oshirish va zamonaviy texnologiyalarni joriy etish muhim vazifalardan biri hisoblanadi.
Belarusning agrar sohadagi tajribasini o‘rganish esa Kattaqo‘rg‘on tumanida mavjud imkoniyatlardan yanada samarali foydalanish, ilg‘or texnologiyalarni joriy etish va xorijiy hamkorlar bilan yangi ishlab chiqarish loyihalarini shakllantirish uchun muhim asos bo‘lishi mumkin.
Eng muhimi, ushbu tashrif oddiy tajriba almashinuvi bilan cheklanib qolmasdan, Samarqand viloyati, jumladan, Kattaqo‘rg‘on tumani uchun yangi investisiyaviy va ishlab chiqarish hamkorliklariga yo‘l ochishi kutilmoqda.
Kattaqo‘rg‘on tumani delegatsiyasining viloyat delegatsiyasi tarkibidagi ishtiroki ham tumanning qishloq xo‘jaligi va qayta ishlash sohalaridagi salohiyatini xalqaro hamkorlik maydonida namoyon etish, yangi tajribalarni o‘rganish va ularni hudud amaliyotiga tatbiq etish nuqtai nazaridan muhim qadamdir.