Samarqand viloyati Kattaqo’rg’on tuman hokimligi

Kattaqo‘rg‘on tumani prokurori Nozimov Mirzoxon Xojievichning huquqbuzarliklarning barvaqt oldini olish va jinoyatchilikka qarshi kurashish bo‘yicha tuman aholisiga  MUROJAATI

Assalomu alaykum, hurmatli Kattaqo‘rg‘on tumani aholisi!

Barchangizga ma’lumki, har qanday davlatning taraqqiyoti va yuksalishi, avvalo, jamiyatda tinchlik-osoyishtalikning ta’minlangani, fuqarolarning xavfsiz hayot kechirishi hamda jinoyat sodir etgan shaxslarning muqarrar javobgarligi ta’minlanishi bilan baholanadi.

Muhtaram Prezidentimiz rahbarligida mamlakatimizda barcha sohalarda keng ko‘lamli islohotlar amalga oshirilmoqda. Ushbu islohotlarning bosh maqsadi inson qadrini yuksaltirish, fuqarolarning konstitutsiyaviy huquq va erkinliklarini ta’minlash, xalqimiz tinchligi va osoyishtaligini mustahkamlash hamda aholi farovonligini oshirishdan iborat.

Prezidentimizning mahallalarda xavfsiz muhitni ta’minlashga qaratilgan PQ–1-son qarori ijrosini ta’minlash, siz azizlarni huquqbuzarlik va jinoyatlardan jabrlanish ehtimolidan asrash maqsadida tumanimizdagi kriminogen vaziyat yuzasidan ushbu murojaatni yo‘llamoqdaman.

Bu borada «O‘zbekiston Respublikasi jamoat xavfsizligi konsepsiyasi» doirasida «Obod va xavfsiz mahalla» tamoyili asosida mahallalarda xavfsiz muhit yaratishning mutlaqo yangi tizimi joriy etildi.

Unga muvofiq, **«mahalla yettiligi»**ning huquqbuzarlik sodir etishga moyil shaxslar bilan ishlash borasidagi vazifalari aniq belgilab berildi, huquqni muhofaza qiluvchi organlarning davlat va jamoat tashkilotlari bilan hamkorligi yanada kuchaytirildi.

Eng muhimi, bu sohadagi islohotlar huquqbuzarliklar oqibatiga qarshi kurashish emas, balki ularning barvaqt oldini olishga qaratilgan yangi yondashuv asosida amalga oshirilmoqda.

Hurmatli fuqarolar!

Tuman hududida jinoyatchilikning barvaqt oldini olish va huquqbuzarliklarga qarshi kurashish bo‘yicha 2026 yilning o‘tgan davri mobaynida muayyan ishlar amalga oshirildi.

Jumladan, jinoyatchilik holati har tomonlama tahlil qilinib, Xalq deputatlari tuman Kengashining qo‘shma yig‘ilishlarida tanqidiy muhokama etildi va tegishli qarorlar qabul qilindi.

Jinoyatlar soni oshgan mahallalarda har bir jinoyat turi bo‘yicha sodir etilish sabab va shart-sharoitlari chuqur o‘rganilib, ularning barvaqt oldini olishga qaratilgan «Yo‘l xaritalari» ishlab chiqildi hamda amaliyotga tatbiq etilmoqda.

Shunga qaramasdan, 2026 yilning iyun oyi yakuni holatiga ko‘ra, tumanda oldini olish mumkin bo‘lgan jinoyatlar soni o‘tgan yilning mos davriga nisbatan 11 taga oshgan.

Xususan:

• o‘g‘rilik jinoyatlari Kadan, Mirzo Ulug‘bek, Valijon, Balandchordara, Melixo‘ja, Sho‘rak va Balandravot mahallalarida;
• qasddan tan jarohati yetkazish jinoyatlari Balandchordara, Qo‘shhovuz, Qoqsoy, Do‘stlik, Moybuloq va Nayman mahallalarida;
• jinsiy daxlsizlikka qarshi jinoyat Yakkabog‘ mahallasida sodir etilgan.

Tahlillar shuni ko‘rsatmoqdaki, o‘g‘rilik jinoyatlarining aksariyati fuqarolar tomonidan chorva mollarining qarovsiz qoldirilishi oqibatida sodir bo‘lgan.

Shuningdek, ayrim hollarda, ayniqsa yoshlar o‘rtasida muomala madaniyatiga rioya etmaslik, bir-birini hurmat qilmaslik, ehtirosga berilgan holda nizolarni kuch bilan hal qilishga urinish oqibatida tan jarohati yetkazish bilan bog‘liq jinoyatlar sodir etilmoqda.

Shu munosabat bilan mahallalarda yashovchi nuroniylar, oqsoqollar, otinoyilar hamda jamoatchilik orasida obro‘-e’tibor qozongan fuqarolardan yoshlar, xotin-qizlar va huquqbuzarlik sodir etishga moyil shaxslar bilan jinoyatlarning oqibatlari haqida tushuntirish ishlarini olib borishda **«mahalla yettiligi»**ga faol ko‘mak berishlarini so‘rab qolaman.

Tan jarohati bilan bog‘liq jinoyatlarning asosiy sabablari sifatida muomala madaniyatining yetishmasligi, oilada va jamiyatda o‘zaro hurmatning susayishi, kattalarni e’zozlamaslik hamda qonunlarga rioya etmaslik holatlari kuzatilmoqda.

Bugungi kunda tumandagi 69 ta mahallaning 45 tasida jinoyat sodir etilmagan, 15 ta mahallada jinoyatchilik holati barqaror saqlangan yoki kamaygan, ammo 9 ta mahallada jinoyatlar soni oshgani sababli ular «qizil» toifaga kiritilgan.

Aziz tumandoshlar!

Jinoyatchilikka qarshi kurashish faqat huquqni muhofaza qiluvchi organlarning vazifasi emas. Bu — barchamizning umumiy burchimizdir.

Shu bois, tumanimizda tinchlik va osoyishtalikni ta’minlash, huquqbuzarliklarning barvaqt oldini olish hamda jinoyatchilikka qarshi kurashishga qaratilgan profilaktik tadbirlarda faol ishtirok eting, huquqni muhofaza qiluvchi organlar bilan yaqin hamkorlik qiling, qonunlarga qat’iy rioya qiling.

Tinch va xavfsiz mahalla — farovon hayot garovidir.

E’tiboringiz uchun rahmat!