Samarqand viloyati Kattaqo’rg’on tuman hokimligi

Kattaqo‘rg‘on tumani hokimi Jamshid Nasriddinovning tuman aholisiga MUROJAATI

Hurmatli tumandoshlar, aziz hamyurtlar!

Giyohvandlik inson salomatligi, oila mustahkamligi, yoshlar tarbiyasi va jamiyat taraqqiyotiga jiddiy xavf tug‘diruvchi eng og‘ir ijtimoiy illatlardan biridir. Ushbu baloning domiga tushgan inson nafaqat o‘z hayotini, balki oilasi, yaqinlari va kelajagini ham xavf ostida qoldiradi. Ayniqsa, uning yoshlar orasida tarqalishi barchamizni tashvishga solishi tabiiy.

Yoshlar – yurtimizning ertangi kuni, xalqimizning ishonchi va tayanchi hisoblanadi. Shu bois ularning sog‘lom, bilimli, ma’naviy barkamol, vatanparvar insonlar bo‘lib voyaga yetishi barchamizning ustuvor vazifamizdir.

Qadrli nuroniylar, mahalla faollari va jamoatchilik vakillari!

Farzandlarimiz taqdiriga befarq bo‘lmasligimiz lozim. Ularning bo‘sh vaqtini mazmunli tashkil etish, sport, kitobxonlik, san’at, ilm-fan, zamonaviy kasb-hunar va tadbirkorlikka qiziqtirish orqali turli salbiy illatlar va zararli odatlardan asrashimiz mumkin.

Nuroniylarimizning hayotiy tajribasi, dono maslahatlari va yuksak obro‘si yoshlar tarbiyasida muhim o‘rin tutadi. Yoshlar bilan muloqotni kuchaytirish, ularni milliy va umuminsoniy qadriyatlarga hurmat ruhida tarbiyalash, muammolariga befarq bo‘lmaslik bugungi kunning dolzarb vazifalaridan biridir.

Mahalla faollari, yoshlar yetakchilari hamda mutasaddi tashkilotlar tomonidan har bir yoshning qiziqishi va ehtiyojini o‘rganish, xavf guruhiga kiruvchi yoshlar bilan manzilli ishlash, ularni sport, madaniyat va ma’rifiy tadbirlarga keng jalb etish ishlari yanada kuchaytirilishi zarur.

Aziz yoshlar!

Sizlar mamlakatimiz kelajagi, xalqimizning eng katta boyligi va umidisiz. Oldingizda turgan eng muhim vazifa — puxta bilim olish, zamonaviy kasb-hunarlarni egallash, sog‘lom turmush tarziga amal qilish va Vatan ravnaqi uchun munosib hissa qo‘shishdir.

Har qanday zararli odatlar, giyohvandlik va boshqa salbiy illatlarga nisbatan qat’iy va murosasiz munosabatda bo‘ling. O‘zingizni va tengdoshlaringizni bunday xavf-xatarlardan asrang, sog‘lom va maqsadli hayot yo‘lini tanlang.

Hurmatli tumandoshlar!

Farzandlarimizning baxtli kelajagi, mahallalarimiz tinchligi va yurtimiz ravnaqi yo‘lida barchamiz birlashib harakat qilsak, giyohvandlikka qarshi kurashishda yanada samarali natijalarga erishamiz.

Keling, sog‘lom avlodni tarbiyalash, tinch va farovon hayotni mustahkamlash yo‘lida birgalikda mas’uliyat bilan faoliyat olib boraylik.

Yurtimiz tinchligi, farzandlarimiz kamoli va xalqimiz farovonligi yo‘lida barchangizni hamjihatlikka chorlayman.