Samarqand viloyati Kattaqo’rg’on tuman hokimligi

Kattaqo‘rg‘on tumani prokurori Nozimov Mirzaxon Xojievichning huquqbuzarliklarning barvaqt profilaktikasi va jinoyatchilikning oldini olish bo‘yicha tumanimiz aholisiga yo‘llagan MUROJAATI Assalomu alaykum, hurmatli Kattaqo‘rg‘on tumani aholisi! Barchangizga ma’lumki, har qanday mamlakatning taraqqiyoti va yuksalish darajasi aholi osoyishtaligi va xavfsiz hayotini hamda jinoyat uchun jazo muqarrarligini ta’minlash samaradorligi bilan baholanadi. Hurmatli Prezidentimizning rahbarligida mamlakatimizda barcha sohalarda ulkan islohotlar amalga oshirilmoqda. Bu islohotlarning tub mohiyati avvalo inson qadrini ulug‘lash, fuqarolarning konstitutsiyaviy huquq va erkinliklarini ro‘yobga chiqarish, xalqimizning tinchligi va osoyishtaligini ta’minlash, turmush farovonligini oshirishga qaratilganligi bilan ham ahamiyatlidir. Muhtaram Prezidentimizning mahallalarda xavfsiz muhitni yaratish bo‘yicha PQ-1-sonli Qarori ijrosini ta’minlash, Siz azizlarni jinoyatlardan jabrlanib qolish ehtimolingizni oldini olish maqsadida tumanimizdagi kriminogen vaziyat yuzasidan mazkur murojaatimni yo‘llamoqdaman. Bu borada “O‘zbekiston Respublikasi jamoat xavfsizligi konsepsiyasi”da belgilangan vazifalar ijrosini ta’minlashda “Obod va xavfsiz mahalla” tamoyili asosida mahallalarda xavfsiz muhitni yaratishni o‘z ichiga olgan keng ko‘lamli “konsepsiya” hayotga tatbiq etilgan. Unga ko‘ra, “Mahalla yettiligi”ning mahallalarda huquqbuzarlik sodir etishga moyil shaxslar bilan ishlash borasida aniq vazifalari belgilab berilib, huquqni muhofaza qiluvchi organlarning jamoat tashkilotlari bilan hamkorligi kuchaytirildi. Eng asosiysi, bu soha huquqbuzarliklar oqibati bilan kurashish emas, balki ularning barvaqt oldini olish zarurligi haqidagi muhim hayotiy siyosiy tamoyil asosida isloh qilinmoqda. Hurmatli fuqarolar ! Tuman hududida jinoyatchilikning barvaqt oldini olish va huquqbuzarlikka qarshi kurashish bo‘yicha 2025 yilda muayyan ishlar amalga oshirilgan. Xususan, tumanda jinoyatchilikning barvaqt oldini olish va huquqbuzarlikka qarshi kurashish borasida amalga oshirilgan ishlar holati atroflicha o‘rganilib, xalq deputatlari Kengashining qo‘shma yig‘ilishlarida tanqidiy muhokama etilib, tegishli qarorlar qabul qilingan. Jinoyatlarning soni oshgan ayrim mahallalarda jinoyat sodir etilishiga imkon berayotgan shart-sharoitlar o‘rganilib, har bir jinoyat turi bo‘yicha ularning barvaqt oldini olishga qaratilgan “Yo‘l xaritasi” ishlab chiqilib, amaliyotga tatbiq etilmoqda. Shunga qaramasdan, 2025 yil dekabr oyida tumanda oldini olish mumkin bo‘lgan jinoyatlar o‘tgan oyga nisbatan 14 taga ko‘paygan. Ushbu oldini olish mumkin bo‘lgan jinoyatlar, jumladan o‘g‘irlik jinoyati tumandagi Mirzo Ulug‘bek, Mundiyon, Kumushqirg‘oq, Moybuloq, Qo‘shhovuz, Tavaron, Qoradaryo, Yangiqiyot, Javlon, Yangiravot, Alijon, Omonkalxat va Bog‘ot mahallalarida, tan jarohat yetkazish jinoyatlari Yakkabog‘, Andoqsoy, Omonkalxat, Qoradaryo, Charog‘on, Qoqsoy va Moybuloq mahallalarida, oilaviy zo‘ravonlik jinoyati “Vayrot” mahallasida sodir bo‘lgan. Ushbu mahallalarda sodir bo‘lgan o‘g‘irlik jinoyati asosan fuqarolarning qoramollarini qarovsiz qoldirilishi natijasida sodir bo‘lgan. Tan jarohati bilan bog‘liq jinoyatlarning fuqarolarning muomila madaniyatiga rioya qilmasligi, oilada mehr-muhabbatni, o‘zidan yoshi kattalarni hamda bir-birini hurmat qilmasligi va qonunlarga bo‘ysunmasligi sabab bo‘lmoqda. Tumandagi 69 ta mahallaning 23 tasida jinoyat sodir etilmagan bo‘lsa, 38 tasida barqaror saqlangan va kamaygan bir vaqtda, 8 tasida oshgan. Misol uchun, tumandagi “Qoradaryo” MFYda 12 oy davomida 24 nafar shaxs tomonidan 17 ta jinoyat sodir qilingan bo‘lib, shuning 14 tasi mahalla hududida yashovchilar tomonidan, 7 tasi boshqa tumanlarda yashovchi fuqarolar tomonidan sodir qilingan. Aziz tumanimiz aholisi, tuman hududida sodir etilayotgan jinoyatlarni oldini olishda olib borilayotgan profilaktik ishlarga e’tiborsiz bo‘lmang, ushbu tadbirlarda huquqni muhofaza qiluvchi organlarga yaqindan yordamingizni ayamang, qonunlarga rioya qiling.