Samarqand viloyati Nurobod tumani hokimligi

Bugun Nurobod tumanida viloyat Fermerlar Kengashi raisi A.Rabbimov, tuman hokimligi mas’ullari, qishloq xo‘jaligi sohasi vakillari hamda fermer xo‘jaliklari ishtirokida g‘o‘zaning ko‘saklash va hosil to‘plash davrida o‘sishni boshqaruvchi stimulyatorlardan samarali foydalanish masalasiga bag‘ishlangan amaliy seminar bo‘lib o‘tdi.

Ayni paytda, avgust oyining o‘rtalarida g‘o‘za ko‘saklash va hosil to‘plashning muhim bosqichiga kirgan. Shu sababli bu davrda o‘simlikning vegetativ o‘sishini me’yorida ushlab turish, oziqa moddalarining hosil elementlariga yo‘naltirilishini ta’minlash va pishib yetilish jarayonini to‘g‘ri boshqarish muhim ahamiyat kasb etadi.

Seminarda mutaxassislar tomonidan g‘o‘za o‘sishini boshqaruvchi stimulyatorlarni qo‘llashning maqsadi, qo‘llash muddati, me’yorlari va agrotexnik talablari yuzasidan fermerlarga batafsil tushuntirishlar berildi.

Amaliy mashg‘ulot davomida g‘o‘zaning rivojlanish holati dalaning o‘zida ko‘zdan kechirilib, o‘simlikning bo‘yi, shoxlanishi, ko‘saklar soni va umumiy holatidan kelib chiqib yondashish zarurligi ta’kidlandi.

Mutaxassislar stimulyatorlardan foydalanishda “ko‘proq qo‘llash — ko‘proq hosil” degan noto‘g‘ri tushunchaga yo‘l qo‘ymaslik, preparatlarni faqat tavsiya etilgan me’yor va texnologiya asosida qo‘llash lozimligini qayd etdilar.

Shuningdek, g‘o‘zaning rivojlanish bosqichini, ob-havo sharoitini, tuproq namligini va nav xususiyatlarini hisobga olish zarurligi tushuntirildi.

Seminar davomida fermerlar o‘zlarini qiziqtirgan savollar bilan mutaxassislarga murojaat qilib, g‘o‘za parvarishining ayni bosqichida yuzaga kelayotgan muammolar bo‘yicha amaliy tavsiyalar oldilar.

Mas’ullarga dalalarni muntazam o‘rganish, fermerlarga zarur agrotexnik tavsiyalarni o‘z vaqtida yetkazish hamda hosilni saqlab qolish va yuqori natijaga erishish uchun mavjud imkoniyatlardan samarali foydalanish bo‘yicha vazifalar belgilandi.

Ayni paytda dalada har bir kun muhim. G‘o‘zaning bugungi parvarishi — ertangi hosilning miqdori va sifatini belgilaydi. Nurobodda fermerlar bilan bunday amaliy seminar va maslahatlar davom ettiriladi.