O‘zbekiston Respublikasi Milliy investitsiya jamgʻarmasi tomonidan “Investor kuni” tadbiri tashkil etildi

Tadbir mamlakat iqtisodiyotining ustuvor tarmoqlaridagi investitsiya imkoniyatlarini namoyish etish uchun muhim platforma boʻldi hamda 67 dan ortiq mahalliy va xalqaro investitsiya kompaniyalari, fondlar, banklar va moliya institutlari vakillaridan iborat 200 dan ziyod ishtirokchini birlashtirdi. Ushbu kompaniyalar birgalikda 1 trillion AQSH dollaridan ortiq aktivlarni boshqaradi.

Tadbirda Shimoliy Amerika, Yevropa, Yaqin Sharq va Osiyoning yirik moliyaviy markazlaridan tashrif buyurgan ishtirokchilar qatnashdi, bu esa xalqaro investorlarning Oʻzbekistonga boʻlgan ortib borayotgan ishonchi va qiziqishini namoyon etdi.

Investor kuni dasturi UzNIF portfelidagi yetakchi kompaniyalarga tashriflar, makroiqtisodiy rivojlanish, energetika va moliya sohasi bo‘yicha panel muhokamalar, shuningdek investorlar bilan individual va guruh uchrashuvlarini o‘z ichiga oldi.

Tadbirning asosiy sessiyasida Oʻzbekiston Respublikasi Bosh vaziri oʻrinbosari – Iqtisodiyot va moliya vaziri Jamshid Qoʻchqorov hamda Oʻzbekiston Respublikasi Markaziy banki raisi Timur Ishmetov ma’ruza bilan chiqish qildi.

Franklin Templeton Global Investments kompaniyasining bosh investitsiya direktori Manraj Sekxon o‘z chiqishida Franklin Templeton uchun Oʻzbekistonning investitsion salohiyatini xalqaro hamjamiyatga taqdim etish katta sharaf ekanini ta’kidladi. Unga ko‘ra, 2017-yilda boshlangan islohotlar mamlakat iqtisodiyotida tub o‘zgarishlarga zamin yaratdi, xalqaro hamkorlik va investitsiyalar uchun keng imkoniyatlar ochildi. Yuksak malakali va yosh aholining salohiyati, shuningdek, biznesni qo‘llab-quvvatlovchi hukumat siyosati tufayli O‘zbekiston yangi tarmoqlar — aloqa, moliya, transport va energetika sohalarida jadal o‘sishni ta’minlamoqda. Shuningdek, xalqaro investorlar bilan ochiq muloqotning rivojlanayotgani ham muhim omil sifatida qayd etildi.

O‘z navbatida, Templeton Global Investments kompaniyasining Markaziy Osiyo bo‘yicha bosh direktori Marius Dan Oʻzbekiston bugungi kunda dunyodagi eng tez rivojlanayotgan iqtisodiyotlardan biriga aylanganini va bu tendensiya kelgusida ham davom etishiga ishonch bildirdi. U UzNIF portfelidagi kompaniyalar mamlakat iqtisodiyotining asosiy yo‘nalishlarini — energetika, kommunal xizmatlar, bank-moliya tizimi va transport sohasini qamrab olishini qayd etdi. Bu esa investorlar uchun O‘zbekiston iqtisodiyotining ichki tuzilmasi va uzoq muddatli rivojlanish istiqbollarini yanada chuqurroq anglash imkonini beradi.

“Investor kuni” tadbiri Oʻzbekistonning investitsion jozibadorligini oshirish, xalqaro investorlar bilan muloqotni mustahkamlash hamda mamlakat iqtisodiyotining yangi istiqbolli yo‘nalishlarini keng targ‘ib etish yo‘lida muhim qadamlardan biri bo‘ldi.