Turkiya kompaniyasi bilan ko‘p tarmoqli klinika qurish loyihasi muhokamasining navbatdagi bosqichi bo‘lib o‘tdi

Unda Iqtisodiyot va moliya vaziri o‘rinbosarlari Bobur Xodjayev hamda Otabek Fozilkarimov, vazir maslahatchisi Odilbek Isoqov, Sog‘liqni saqlash vaziri o‘rinbosari Farxodjon Tashpulatov va bir qator mas’ullar ishtirok etdi. Xorijiy tomondan kompaniya rahbariyati vakillari, jumladan, “Rönesans Healthcare Investment” boshqaruvi raisi Kamil Yanikomero‘g‘lu, “Rönesans Holding”ning Yevrosiyo bo‘yicha mintaqaviy direktori Jem O‘zog‘uz, “Rönesans Holding” bosh direktori o‘rinbosari Volkan Xatino‘g‘lu qatnashdi.

Uchrashuvda Toshkent viloyatida qurilishi rejalashtirilayotgan ko‘p tarmoqli klinika loyihasi muhokamasining navbatdagi bosqichi bo‘lib o‘tdi. Loyiha davlat-xususiy sheriklik doirasida amalga oshirilishi nazarda tutilgan.

Dastlab Turkiya kompaniyasi vakillari vazirlik rahbariyatiga istiqboldagi rejalar, shifoxonani qurish va ishga tushirish yuzasidan boshqa tegishli idoralar vakillari bilan olib borilgan muzokaralar natijalari bo‘yicha ma’lumot berdi. Shuningdek, hamkorlikning boshqa tafsilotlari va aholiga sifatli tibbiy xizmat ko‘rsatish imkoniyatlariga batafsil to‘xtalib o‘tildi.

Tomonlar tibbiy xizmatlardan foydalanish imkoniyatlarini yaxshilash va aholi turmush darajasini oshirishga qaratilgan mazkur loyiha bo‘yicha olib borilayotgan muzokaralar ijobiy davom etishiga umid bildirishdi.

Yakunda shifoxona qurilish bo‘yicha hamkorlikning dolzarb masalalari yuzasidan maslahatlashuvlarni yanada faol olib borishga kelishib olindi.