YUNISEFning O‘zbekistondagi vakolatxonasi rahbarining tashrifi
2023-02-14 20:30:58 / Yangiliklar
Bugun, 14-fevral kuni UNISEFning Oʻzbekistondagi vakolatxonasi rahbari Munir Mamedzade Yoshlar siyosati va sport vazirligiga tashrif buyurdi.
Yoshlar siyosati va sport vaziri Adham Ikramov bilan boʻlib oʻtgan uchrashuv samimiy ruhda boshlanib, avvalambor UNISEFning Oʻzbekistonda ijtimoiy sohalarni oʻz ichiga qamrab olgan loyihalari keng koʻlamda amalga oshirilayotgani, shuningdek mazkur loyihalar oʻzining yuqori natijalarini berayotgani taʼkidlandi. Shuningdek, ushbu xalqaro tashkilot amalga oshirayotgan loyihalarning eng ustuvorlaridan biri bu yoshlar sohasini rivojlantirish hisoblanadi.
Bu borada vazir bilan boʻlgan uchrashuvda ham yoshlar masalalari koʻp bor tilga olindi.
Xususan uchrashuvda yoshlar balansini shakllantirish, ularni boʻsh vaqtini mazmunli tashkil qilish, dunyoqarash va qiziqishlarni inobatga olgan holda ularni natijador sohalarga tayyorlash, sport, madaniyat, IT texnologiyalar va kasblarga oʻrgatish borasida vazirlik va xalqaro tashkilot oʻrtasida uzoq muddatli hamkorlikni yoʻlga qoʻyish boʻyicha muzokaralar olib borildi.
Qolaversa, sport sohasi vakillarining asosiy qatlami yoshlar ekanligini inobatga olgan holda, ular uchun jismoniy tarbiya va professional sport sohalarida qulay shart-sharoitlar yaratish boʻyicha tashabbuslar ilgari surildi.
Qayd etish lozimki, ayni vaqtda mamlakatimizning 6ta hududida UNICEF tashkiloti bilan hamkorlikda “ImkonLab” grant loyihasi amalga oshirilmoqda. Ayni kunlarda esa Andijon viloyatining Asaka tumani va Fargʻona viloyatining Qoʻqon shaharlarida yoshlar ijtimoiy tadbirkorlik va ijtimoiy loyihalarning ishlab chiqish boʻyicha treninglarda ishtirok etishmoqda.
Ushbu loyiha tez fursatda yoshlarni oʻziga jalb qilgani bilan ahamiyatli boʻlib, kelgusida loyiha manzillari Yangibozor, Boʻston kabi viloyatlar boʻlishi rejalashtirilgan. Uchrashuv yakunida ikki tomonning takliflari boʻyicha alohida dastur ishlab chiqish, doimiy muloqotda boʻlish va yangi loyihalarni amalga oshirishda hamkorlik qilishga kelishib olindi.