“Gemetis” kompaniyasi vakillari bilan uchrashuv bo‘lib o‘tdi

Uchrashuvda Iqtisodiyot va moliya vaziri o‘rinbosari Bobur Xodjaev, Savdo-sanoat palatasi raisi o‘rinbosari Jamshid Urakov, “O‘zbekiston Respublikasi Tashqi iqtisodiy faoliyat milliy banki” AJ raisi Alisher Mirsoatov, Iqtisodiyot va moliya vazirligi huzuridagi Davlat asillik darajasi nazorati inspeksiyasi boshlig‘i Shaxobiddin Ortiqov ishtirok etishdi.

Xorij tomondan Gemetis kompaniyasining bosh ijrochi direktori Muhammad Emin Ozgur, Gemetis raisining maslahatchisi Murat Uzunoglu va “Gold Art Expert” kompaniyasining oltin san’ati bo‘yicha mutaxassisi Mehmet Gazi Ozkanlar qatnashishdi.

Yig‘ilish doirasida O‘zbekistonda zargarlik sohasida yaratilgan imkoniyatlar muhokama qilindi. Turkiyaning mazkur sohadagi uzoq yillik va ilg‘or tajribasini o‘rganish, xususan zargarlikka ixtisoslashgan taʼlim maskanlarini tashkil etish orqali malakali mutaxassislarni yetishtirish, tadbirkorlik subyektlariga qo‘shimcha imkoniyatlar yaratish muhimligi ta’kidlandi.

Xorijiy tomon O‘zbekistonning zargarlik markazlari, jumladan Samarqand va Buxoro shaharlarida zargarlik mahsulotlarini ishlab chiqaruvchilar faoliyati, xom-ashyo, yaratilgan imkoniyatlarni o‘rganib chiqib, o‘z takliflarini taqdim etishini ma’lum qildi.

Uchrashuvda O‘zbekiston va Gemetis nafaqat zargarlik buyumlari ishlab chiqarish salohiyatini oshirish, balki mintaqaning umumiy iqtisodiy farovonligiga ham hissa qo‘shadigan samarali hamkorlikni yo‘lga qo‘yishga intilishi ta’kidlandi.

Ma’lumot uchun: 1962-yilda “Özgür Kuyumculuk” nomi bilan tahkil etilgan kompaniya bugungi kunda “Gemetis Alyans ve Pırlanta” nomi bilan zargarlik bozorida faoliyat olib bormoqda. 2020-yildan boshlab Gemetis kompaniyasi nikoh uzuklari va olmoslar ishlab chiqarishga qaratib, ayni damda 3000 dan ortiq turdagi uzuklarni Turkiya va boshqa davlatlar bozoriga yetkazib kelmoqda.