Uchrashuvda tomonlar joriy yilda “O‘zbekiston – 2030” strategiyasi doirasida hukumat tomonidan amalga oshirilishi rejalashtirilgan asosiy makroiqtisodiy islohotlarni muhokama qildi. Xususan, energetika, transport, telekommunikatsiya tarmoqlarini isloh qilish, ishbilarmonlik muhitini yaxshilash, davlat korxonalarini transformatsiya qilish masalalariga to‘xtalib o‘tildi.

Yig‘ilish ishtirokchilari Jahon banki guruhi va O‘zbekiston o‘rtasidagi 2022–2026-yillarga mo‘ljallangan sheriklik dasturini amalga oshirishda erishilgan yutuqlarni alohida qayd etdi.

Ma’lumot uchun: mazkur dasturning maqsadi mamlakatga aniq ijtimoiy-iqtisodiy natijalarga erishish, jumladan, kambag‘allikni qisqartirish, xususiy sektorni kengaytirish, inson kapitalini rivojlantirish va “yashil” iqtisodiyotni shakllantirishda ko‘maklashishdan iborat.

Shuningdek, O‘zbekiston hukumati tomonidan Jahon banki bilan birgalikda iqtisodiyotning turli tarmoqlarida amalga oshirilayotgan loyihalar soni ortib, sifati yaxshilangani ta’kidlab o‘tildi. Xususan, yaqinda tasdiqlangan O‘zbekistonda raqamli iqtisodiyotni rivojlantirish loyihasi shular jumlasidandir. Uchrashuv ishtirokchilari ayni paytda ishlab chiqilayotgan loyihalarni ham muhokama qildi.

Uchrashuv yakunlari bo‘yicha ishtirokchilar inklyuziv bozor iqtisodiyotini barpo etish va mamlakat fuqarolari farovonligini oshirishga qaratilgan islohotlarni amalga oshirish doirasida faol muloqotni davom ettirishga tayyor ekanligini bildirdi.