Yaponiya Tashqi savdo tashkiloti raisi va bosh direktori bilan hamkorlikni rivojlantirish masalalari muhokama qilindi

Uchrashuvda Yaponiya va O‘zbekiston o‘rtasidagi hamkorlikni rivojlantirish masalalari yuzasidan fikr almashildi. 

Shubilan birga, O‘zbekiston tomonidan mamlakatning IT va muhandislik autsorsing sohalaridagi imkoniyatlari, IT Park Uzbekistan tomonidan taqdim etilayotgan soliq va vizaviy imtiyozlar, kadrlar tayyorlash dasturlari, shuningdek Yaponiya kompaniyalari uchun yaratilayotgan qulay shart-sharoitlar haqida batafsil ma’lumot berildi.

Uchrashuvning asosiy maqsadlaridan biri sifatida O‘zbekistonning yangi IT va muhandislik autsorsing manzili sifatidagi salohiyatini taqdim etish, kadrlar salohiyati va xalqaro IT mutaxassislar almashinuvini yo‘lga qo‘yish masalalari muhokama qilindi.

O‘z navbatida, JETRO O‘zbekistondagi inson kapitali salohiyatini yuqori baholab, Yaponiya kompaniyalari o‘zbekistonlik mutaxassislar bilan ishlash samaradorligini allaqachon his qilganini ta’kidladi. 

Yaponiya kompaniyalarini xalqaro startaplar bilan bog‘lashga qaratilgan "J-Bridge" dasturi haqida ma’lumot berildi. Shuningdek, ta’lim sohasidagi hamkorlik zarurligi ta’kidlanib, O‘zbekistondagi yosh mutaxassislarning raqobatbardoshligini oshirish uchun sifatli ta’lim muhimligi qayd etildi. Bu yo‘nalish so‘nggi yillarda davlat siyosatining ustuvor yo‘nalishlaridan biriga aylangani alohida e’tirof etildi.

JETRO ko‘magida ilk bor ICT WEEK 2025 doirasida O‘zbekistonda Yaponiya pavilyonini tashkil etish tashabbusi muhim ahamiyat kasb etishi ta’kidlanib, buning uchun minnatdorchilik bildirildi.